,,მოლოდინი და სურვილი არ მქონია ,,ოცნებასთან“ გზების გადაკვეთის“ _ დავით უსუფაშვილი

,,შენების მოძრაობის”, „თავისუფალი დემოკრატებისა” და „ეროვნული ფორუმის” საპრეზიდენტო კანდიდატი დავით უსუფაშვილი  მმართველი გუნდის მხრიდან სალომე ზურაბიშვილის მხარდაჭერას ,,გურია ნიუსთან“ აფასებს.

როგორც უსუფაშვილი გვეუბნება, ,,ქართული ოცნების“ გადაწყვეტილება მოულოდნელი არ ყოფილა. კითხვაზე _ რატომ აღმოჩნდა ,,ქართული ოცნების“ რჩეული სალომე ზურაბიშვილი?_ უსუფაშვილი გვპასუხობს, რომ საქმე გვაქვს პოლიტიკურ გემოვნებასთან.

,,არამგონია, რომ ვინმესთვის მოულოდნელი ყოფილიყო ,,ქართული ოცნების“ გადაწყვეტილება. გემოვნებაზე არ დაობენ, მათ შორის, პოლიტიკურ გემოვნებაზე. ,,ქართულ ოცნებასა“ და ქალბატონ სალომეს აღმოაჩნდათ სართო პოლიტიკური გემოვნება. ერთს მოსწონს მეორე და მეორეს _ პირველი“, _ გვითხრა უსუფაშვილმა.

,,გურია ნიუსის“ კითხვაზე _ ჰქონდა თუ არა მოლოდინი, რომ საპრეზიდენტო არჩევნებში მმართველი პარტია მხარდაჭერას მის სასარგებლოდ დააფიქსირებდა? _ უსუფაშვილი გვპასუხობს, მოლოდინი არ ჰქონდა, რადგან 2011 წლის გაზაფხულის შემდეგ, პარტიასთან გზების გადაკვეთის სურვილი არ გასჩენია.

,,ჩემი და მმართველი პარტიის პოლიტიკური გზები 2011 წლის გაზაფხულზე გაიყარა და მერე არც მოლოდინი და სურვილი მქონია ამ გზების გადაკვეთის“, _ გვითხრა უსუფაშვილმა.

დავით უსუფაშვილი იმ დაპირებებზე ამახვილებს ყურადღებას, რომელთა შესრულების უფლებამოსილება პრეზიდენტს არ გააჩნია. უსუფაშვილის თქმით, საპრეზიდენტო კანდიდატთა ნაწილი ე.წ. ცრუ დაპირებებით ამომრჩევლის გულის მოგებას ცდილობს, რაც არასწორია.

,,მესმის და გავიგებ საპრეზიდენტო კანდიდატის მიერ გამოთქმულ პოზიციებს  საჭირბოროტო საკითხთან დაკავშირებით. მესმის და გავიგებ სურვილებს, რომ ქვეყანაში იყოს მეტი სამუშაო ადგილი და მაღალი პენსია, მაგრამ არ მესმის და ვერ გავიგებ დაპირებას, რომ პრეზიდენტი თავისი უფლებამოსილების გამოყენებით გაზრდის პენსიას ან შექმნის სამუშაო ადგილებს. ვისურვებდი, რომ მოქალაქეები ამაში კარგად გაერკვნენ“,_ გვითხრა უსუფაშვილმა.

საპრეზიდენტო არჩევნები 28 ოქტომბერს გაიმართება.