“მომეტებული საფრთხე და შეფერხებები” _ ოზურგეთის მერია მოსახლეობას მოუწოდებს

ჭარბი ნალექის გამო, ოზურგეთის მუნიციპალიტეტში, გზებზე არის მომეტებული საფრთხე და შეფერხებები, _ ამის შესახებ მერიის მიერ გავრცელებულ ოფიციალურ განცხადებაშია აღნიშნული. ოზურგეთის მუნიციპალიტეტის მერია მოსახლეობას მოუწოდებს, თვალი მიადევნონ ინფორმაციას გზებზე არსებული მდგომარეობის შესახებ.

“დიდთოვლობის გამო ოზურგეთის მერია საგანგებო რეჟიმში განაგრძობს მუშაობას.

 მერია თანმიმდევრულად, არსებული ტექნიკური რესურსით, ინტენსიურად ახორციელებს გზების გაწმენდას. მობილიზებულია ყველა შესაბამისი სამსახური და ტექნიკა, რომელიც დღის განმავლობაში, უწყვეტ რეჟიმში იმუშავებს.

თავის მხრივ, “ენერგო პრო ჯორჯიას” თანამშრომლები მუშაობენ ცალკეულ უბნებზე ელექტროენერგიის მიწოდების აღსადგენად.

ვთხოვთ თანამოქალაქეებს, თვალი მიადევნონ ინფორმაციას გზებზე არსებული მდგომარეობის შესახებ, რომელიც პერიოდულად განახლდება ოზურგეთის მუნიციპალიტეტის მერიის და მასთან დაკავშირებულ გვერდებზე და გაითვალისწინონ აღნიშნული ინფორმაცია ავტოტრანსპორტით გადაადგილებისას.

დამატებითი ინფორმაციისთვის დაგვიკავშირდით ცხელ ხაზზე: 511 240 040.” _ აღნიშნულია ოზურგეთის მუნიციპალიტეტის მერიის მიერ გავრცელებულ ინფორმაციაში.