ჩოხატაურის მუნიციპალიტეტის სოფელ ქვაბღაში მოსახლეობა დახმარებას ითხოვს. ამის შესახებ “გურია ნიუსს” სოციალურ ქსელში გვერდი “ქვაბღა ქვაბღა” დაუკავშირდა და მოსახლეობის გასაჭირი გააცნო.
ჩვენთვის მოწოდებული ინფორმაციით, ბოლო დროს განვითარებულმა სტიქიურმა მოვლენებმა დააზიანა სოფლის ცენტრალური გზა, სახლები, მდინარას პირას მოსახლეობას ეზოების უკანა მხარეები წაართვა. გარდა ამისა, როგორც ეზოებში, ასევე გზებზე და გზების ნაპირებზე გაჩნდა ნაპრალები. მიწა ერთმანეთს შორდება და მოსახლეობას ეშინია, რომ ერთმა ძლიერმა წვიმამ გამოიწვიოს მეწყერი და ტრაგედია დაატრიალდეს, სოფელი სრულად განადგურდეს.
“უამინდობისგან გამოწვეული სტიქიის შედეგად სოფელში ყველა უბანზე ჩამოწვა ზვავები. მდინარის პირას მცხოვრები ოჯახების ეზოების უკანხა მხარეები წაღებულია. გარდა ამისა, სოფელ ჭენჭეხაში, ტბისყურში, გაღმა ქვაბღაში, საქონდრიაში, გაჩდა ნაპრალები ეზოებში, მიწა ერთმანეთს დაშორდა და ეს დაშორება დღითიდღე მატულობს. ერთი გაწვიმება უნდა და მეწყერი სოფელში მისასვლელ გზას წაიღებს. პატარა პრობლემები ადვილად მოსაგვარებელია, მაგრამ რაც ყველაზე დიდი პრობლემა კიდევ მოუგვარებელია. ვიცით, რომ დიდი პრობლემები შეიქმნა, მაგრამ ადამიანის უსაფრთხოებაზე წინ არაფერია. მოსახლეობა არის შიშში. როდის, რა დაემართებათ არ იციან და როდის რა მოხდება.
დიდი იმედი მაქვს დაგვეხმარება ადგილობრივი ხელისუფლება, რომ შიშში არ ვიცხოვროთ. ვითხოვთ, რომ გეოლოგებმა შეაფასონ მდგომარეობა და დადგინდეს, სოფლის სამომავლო ბედი”,_ ნათქვამია ჩვენთვის მოწოდებულ ინფორმაციაში.
კითხვაზე, იმყოფებოდა თუ არა სტიქიის შემდეგ სოფელში სტიქიის შემსწავლელი კომისია, გვპასუხობენ, რომ მათ მხოლოდ იმ სახლების მდგომარეობა შეაფასეს, რომელსაც ძლიერმა ქარმა სახურავი დაუზიანა.
“ძლიერმა ქარმა სახლებს გაადააძრო სახურავები და ამის გამო იყვნენ რამდენიმე ოჯახში მისულები. მერის წარმომადგენელმა გვითხრა, რომ მერიაში პრობლემის შესახებ იციანო, მაგრამ მარტო ცოდნა არ კმარა. ეს ზვავი სადაც არის ზემოდანც დასახლებაა და ქვემოდანაც, და აქედან გამომდინარე მთელ სოფელს მოიცავს”,_ გვწერენ სოციალურ ქსელში.
სოფლის მხარდამჭერი პროგრამის ფარგლებში კი სოფლის საერთო კრება ქვაბღაში 15 თებერვალს ჩატარდა. სადაც საუბარი ასევე შეეხო გზაზე შექმნილ ვითარებას და მოსახლეობამ კიდევ ერთხელ მოისმინა, რომ პრობლემის შესახებ მერს ინფორმაციას მიაწვდიან და სავარაუდოდ, გეოლოგების ჯგუფი ჩავა.
იგეგმება თუ არა სოფელში გეოლოგების ჯგუფის აყვანა და რა ნაბიჯები გადაიდგმება, _ ამ საკითხზე სასაუბროდ “გურია ნიუსი” დავით შარაშიძეს დაუკავშირდა.
როგორც მერი ამბობს, ქვაბღაში გეოლოგების ჯგუფის ასაყვანად მერიამ სპეციალურ უწყებას წერილობით უკვე მიმართა.
“წერილი მიწერილი გვაქვს. იცით რა მდგომარეობაც შეიქმნა ბაღდათში და აჭარაში, როგორც კი მოახერხებს გეოლოგების ჯგუფი, ჩამოვა. პირველ რიგში გეოლოგებმა უნდა შეაფასონ მდგომარეობა და გადასადგმელ ნაბიჯებზე შემდეგ ვისაუბროთ”,_ გვპასუხობს შარაშიძე.
