საქართველოს მთავარ პროკურატურასთან ვაჟა-ფშაველას 76 ბ-ს და თავხელიძის ქუჩის 1-ლი ნომრის მაცხოვრებლებმა უკანონო მშენებლობის შეჩერების მოთხოვნით საპროტესტო აქცია გამართეს.
აქციის ერთ-ერთი მონაწილის, რევაზ ბერაძის თქმით, მშენებლობის გამო სასწრაფო სამედიცინო დახმარების ბრიგადა საჭიროების შემთხვევაში კორპუსთან მისვლას ვერ ახერხებს.
„ჩემთვის უპირველესია ის პრობლემა, რომ კორპუსთან მოსასვლელი გზა არ გვაქვს და საჭიროების შემთხვევაში სასწრაფო დახმარების მანქანა ვერ მოდის, ვერც სახანძრო მანქანა ვერ მოვა ხანძარი რომ იყოს და ვინმეს უჭირდეს,“_ამბობს ბერაძე.
როგორც კორპუსის ამხანაგობის ერთ-ერთი წევრი და აქციის ორგანიზატორი, ზურაბ ბეიტრიშვილი ამბობს, ორივე მშენებლობაზე 250-მდე დარღვევაა გამოვლენილი, მაგრამ გამოძიება მოსახლეობას დაზარალებულად არ ცნობს.
„ჩვენი მთავარი მოთხოვნაა შეჩერდეს უკანონო მშენებლობები, იმიტომ რომ, აღძრულია სისხლის სამართლის საქმე, რომელშიც დევს სამხარაულის ექსპერტიზის დასკვნა. სამშენებლო კომპანია „ბანი“ ახორციელებს ორ მშენებლობას. 22-სართულიანი და 10- სართულიანი კორპუსის კომერციული ფართის მშენებლობას და 2-ვე ობიექტზე არის 200-250-მდე დარღვევა. გამოძიება მიმდინარეობს. დაახლოებით, 2015 წლიდან აღძრულია სისხლის სამართლის საქმე ვაკე-საბურთალოს რაიონის მე-2 განყოფილებაში. მაგრამ გამოძიება რატომღაც მოსახლეობას არ ცნობს დაზარალებულად რომ საქმეს მსვლელობა მიეცეს“,_ ამბობს ბეიტრიშვილი.
მისივე თქმით, მერია ექსპერტიზის დასკვნას ითხოვს, მაგრამ რადგან მოსახლეობა ოფიციალურად სამართლებრივ მხარედ ცნობილი არ არის დასკვნის აღებას ვერ ახერხებს.
„მერია განგვიმარტავს, რომ ექსპერტიზის დასკვნა უნდა წარვადგინოთ. ჩვენ კი ექსპერტიზის დასკვნის წარდგენას ვერ ვახერხებთ, რადგან ოფიციალურად სამართლებრივი მხარე არ ვართ. რაც შეეხება დამატებით ექსპერტიზას, ჩვენ ვერ განვახორციელებთ, რადგან გამოძიებამ ექსპერტიზა უკვე განახორციელა, რისთვისაც სახელმწიფო ბიუჯეტიდან 50 000-მდე ლარი დაიხარჯა“, _ აღნიშნა „გურია ნიუსთან“ საუბრისას ზურაბ ბეიტრიშვილმა.
მსიივე თქმით, ვაჟა-ფშაველას 76 ბ-ს მაცხოვრებლებს გამოძიების სრულყოფილი ჩატარებას, თავხელიძის 1-ლი ნომრის მოსახლეობა კი გამოძიების დასრულებამდე მშენებლობის შეჩერებას ითხოვს.
„ვითხოვთ გამოძიების სრულყოფით ჩატარებას 76 ბ-სთან დაკავშირებით, სადაც არის ამხანაგური კრების ოქმი გაყალბებული და ჩვენი ხელმოწერები არ არის მასზე. მოვითხოვთ მოხდეს სრულყოფილი გამოძიება და სისხლის სამართლის პასუხისგებაში მიეცენ დამნაშავე პირები და კანონის შესაბამისად მოხდეს ობიექტების დემონტაჟი. რაც შეეხება მეორე ობიექტს, ეს არის თავხელიძის 1-ელ ნომერში, სადაც დაახლოებით 10 დღის წინ ჩატარდა მსგავსი აქცია, გამოძიებამ აღძრა სისხლის სამართლის საქმე, მაგრამ მოვითხოვთ რომ შეჩერდეს მშენებლობა გამოძიების ობიექტურ დასრულებამდე, მაგრამ რატომღაც საქმე ჭიანურდება, უკანონო მშენებლობა კი ისევ გრძელდება. ამასთან დაკავშირებით გარკვეული ნაბიჯები გადადგმულია, დანიშნულია გაყალბებასთან დაკავშირებით კალიგრაფიული ექსპერტიზები. არის დიდი ალბათობა იმისა, რომ ხვალ და ზეგ დადგინდება პასუხისგებაში მისაცემ პირთა სია, მაგრამ, გამოძიება რატომღაც აჭიანურებს ყველაფერს და არ აჩერებს მშენებლობას, ჩვენ ამ აქციით მოვითხოვთ რომ მოსახლეობის, რომლის არა მარტო ქონება ზიანდება, არამედ მისასვლელი ერთადერთი გზა, რომელიც სახანძრო და სასწრაფო დახმარების მისასვლელი გზა არის შევიწროებული და ყოველგვარ სტანდარტებს არის შეუსაბამო. ვითხოვთ გამოძიების მხრიდან რეაგირებას და დახმარებას, ვითხოვთ ობიექტური გამოძიების ჩატარებას“,_ ამბობს ბეიტრიშვილი.
დღევანდელი აქციის ონაწილეები აცხადებენ, რომ თუ გამოძიება დროულად არ გასრულდება, აქციები ფართომასშტაბიანი გახდება.
„აქ ცხოვრობს 700-მდე ადამიანი, ხვალ და ზეგ უფრო გავიზრდებით და ფართო მასშტაბიან აქციებს მივმართავთ. ვითხოვთ რომ დაგვეხმაროს და აწარმოოს ოპერატიულად ობიექტური გამოძიება“, _ამბობს ბეიტრიშვილი.
დაზარალებული მოსახლეობის ინტერესების დამცველი ადვოკატი ზაზა შერმადინი აცხადებს, რომ მოსახლეობის მოთხოვა საფუძვლიანია და მსენებლობები უკანონო.
„ყველაფერი ერთმანეთთან მიზეზ-შედეგობრივ კავშირშია. იწყება უკანონო მშენებლობით, უკანონო პრივილეგიებით, უკანონო ნეპოტიზმით, უკანონო პროტექციით და მთავრდება ძალიან ცუდი რამით. არ მინდა რომ საქმე მივიდეს აქამდე, ის უკანონო მშენებლობები რომელზეც ჩვენ გვაქვს საუბარი არის ვაჟა-ფშაველას 76-ში და თავხელიძის ნომერ 1-ში. ეს ადამიანები არიან იმ 2-ვე საცხოვრებელი სახლის მაცხოვრებლები და მომავალი თაობა ჩვენი ქვეყნის და ჩვენი ქალაქის,
მთავარი მოთხოვნაა ის უკანონობა, რომელიც დაშვებული იქნა მშენებლობის პროცეში გამოსწორდეს და რადიკალური ზომები იქნას დემონტაჟთან დაკავშირებით მიღებული. შეიქმნეს პრეცედენტი საქართველოში და კერძოდ თბილისში, დედაქალაქში სადაც აბსოლუტურად უგვანო და უსახო მშენებლობები მიმდინარეობს და ამის გამოა ის საცობები, რაც შექმნილია და ქალაქში გადაადგილების საშვალება არ აქვს ადამიანს, ელემენტარულად ნორმალურად რომ იარსებოს, ზუსტად ეგ არის საფუძველი, რომ უკვე ტროტუარებზე მიდის დადგმა სამშენებლო ნაგებობების, სახლებს მისასვლელები, ავტომობილების გასაჩერებელი ადგილი არ აქვთ. ელემენტარულად ბავშვები, რომ ჩამოიყვანონ. 2 -ვე მისამართზე უკანონო მშენებლობები მიმდინარეობს“_ამბობს შერმადინი.
მისივე ინფორმაციით, „რამდენიმე დღის წინ თბილისის მერიის იურიდიულ სამსახურში, ადმინისტრაციული წარმოებაც გაიმართა თავხელიძის 1-ელ ნომერთან და ვაჟა-ფშაველას 76 ნომერთან დაკავშირებით და ამ მშენებლობის ერთ-ერთი აქტი გასაჩივრებული იქნა თბილის საქალაქო სასამართლოში ადმინისტრაციულ საქმეთა სასამართლოს კოლეგიაში“.
„აგრეთვე, ყველა ის ფაქტი რომელზეც ვსაუბრობთ, ემყარება ყალბად დამზადებული დოკუმენტის გამოყენებას და მიღებულ პრივილეგიას. ამასთან დაკავშირებით მივმართეთ პროკურატურას, ერთ ფაქტთან დაკავშირებით აღძრულია სისხლის სამართლის საქმე. ეს ეხება ვაჟა-ფშაველას 76 ბ-ს და ლაპარაკია თავხელიძის 1-ლში და ვაჟა-ფშაველას 76-ში მეორე ფაქტთან დაკავშირებით სისხლის სამართლის საქმის აღძვრის მოთხოვნაზე.
უბედური შემთხვევა რომ მოხდეს სახანძრო და სასწრაფო დახმარების მანქანები კანონით დადგენილ ნორმებში ვერ შევა და ვერ განახორციელებს იმას, რაც ჩვენს დახმარებაში გამოიხატება. კონსტიტუციაში წერია, რომ ყველა ადამიანს აქვს უფლება ცხოვრობდეს უსაფრთხო გარემოში. უსაფრთხო გარემო ნიშნავს ჯანმრთელობისთვის ნორმალურ პირობებს და ელემენტარულად უსაფრთხო სახანძრო პირობებში ცხოვრებას“, _ ამბობს შერმადინი.
