“სასაცილოა იმის თქმა, რომ საქართველოში მაღალი მაგნიტუდის მიწისძვრა მოხდება”

თურქეთში მომხდარი დამანგრეველი მიწისძვრის შემდეგ, საქართველოში პანიკის დათესვის მიზნით, გავრცელდა ცრუ ინფორმაცია, თითქოს, 9 თებერვალს, თბილისში, 6 მაგნიტუდის სიმძლავრის მიწისძვრაა მოსალოდნელი და პრევენციის მიზნით, დღის პირველ ნახევარში შენობები უნდა დავტოვოთ.

შეტყობინება, რომელიც „ვოთსაფის“ მეშვეობით დაიგზავნა, საზოგადოებისთვის ცნობილმა ადამიანებმაც გაავრცელეს.

სეისმოლოგი გიორგი ბოიჩენკო: „ამ ეტაპზე, მიწისძვრის პროგნოზირება შეუძლებელია, მით უმეტეს, გრძელვადიან პერიოდში, რამდენიმე დღეზე გათვლილი. რაც შეეხება მაგნიტუდის განსაზღვრას, ცოტა სასაცილოც არის. ასევე, თურქეთის მიწისძვრების მიბმა ჩვენს მიწისძვრებთან, ცოტა არასწორია. რა თქმა უნდა, გარკვეული ბმა არსებობს, იმიტომ, რომ რეგიონში დაახლოებით, ერთი გეოდინამიკური პროცესი მიმდინარეობს, თუმცა, ჩვენამდე რამდენიმე სტრუქტურაა, რომელზეც გეოდინამიკური დაძაბულობის კომპენსირება ხდება. აქედან გამომდინარე, ძალიან რთულია იმის პროგნოზირება და თქმა, მოხდება თუ არა ჩვენთან მიწისძვრა და თან ეგეთი სიმძლავრის, როგორიც თურქეთში მოხდა.

ამ ეტაპზე ჩვეულ რეჟიმში დაკვირვება მიმდინარეობს და რამე განსაკუთრებული აქტივობა საქართველოს რეგიონში არ შეინიშნება.“ – ამბობს გიორგი ბოიჩენკო.

წყარო: „პრაიმტაიმი“