რამდენიმე დღის წინ, ლანჩხუთში, ყოფილი ცენტრალური უნივერმაღის შენობაში განთავსებული სავაჭრო ობიექტების მფლობელებმა გამაფრთხილებელი აქცია გამართეს. მათი თქმით, უნივერმაღის შენობის მიმდებარე ტერიტორიაზე გაჩერებული ავტომანქანების მძღოლებს არასწორად პარკირების გამო, ბოლო პერიოდში ხშირად აჯარიმებენ. დაჯარიმებულთა შორის კი ხშირად დისტრიბუტორებია არიან. შექმნილი მდგომარეობის გამო, ისინი იძულებულები ხდებიან, ამ ტერიტორიაზე აღარ გააჩერონ მანქანები, რაც სავაჭრო ობიექტებს საქმიანობაში ხელს უშლის.
აქციის მონაწილეები ამბობენ, რომ პრობლემას შენობის წინ გაკეთებული ბორდიური ქმნის.
“როცა ბორდიური გაკეთდა, გამგეობამ პირობა მოგვცა, რომ ამ ადგილას ავტომანქანების გაჩერებას ეს პრობლემას არ შეუქმნიდა, თუმცა, რატომღაც ეს პირობა არ სრულდება. გვეუბნებოდნენ, ბორდიურის გაკეთების შემდეგ დაიხაზებოდა ავტომანქანების პარკინგის ადგილი, რაც ავტომანქანის მფლობელს საშუალებას მისცემდა, თავისუფლად გაეჩერებინა შენობის წინ მანქანა. მოხდა ისე, რომ პარკინგის ნაცვლად ამკრძალავი ნიშანი დაგვიდგეს.
ფაქტია, რომ სავაჭრო ობიექტების უმეტესობა სწორედ ყოფილი უნივერმაღის შენობაშია თავმოყრილი: კვების ობიექტები, სავალუტო პუნქტები, სალონები, ბანკი, მაღაზიები, ყველაფერი აქაა და თუ ავტომანქანა ვერ გაჩერდა, მაშინ რა გამოდის?! ყველას მივმართეთ და ეს საკითხი თუ არ მოგვარდება, მაშინ იძულებულები გავხდებით ჩვენივე ხელით დავამტვრიოთ ეს ბორდიური,” _ ამბობდნენ ყოფილი უნივერმაღის შენობაში სავაჭრო ობიექტების მფლობელები, რომლებმაც დახმარებისთვის ლანჩხუთის მუნიციპალიტეტის გამგეობას, უშუალოდ კი გამგებელს, ზაზა ურუშაძეს და მაჟორიტარი დეპუტატის ლანჩხუთის ბიუროს მიმართეს.
თავის მხრივ, გამგებელმა აქციის მონაწილეებს პირობა მისცა, რომ ყურადღების გარეშე არ დატოვებდა ამ საქმეს და საკითხს გაარკვევდა.
გამგეობის ინფრასტრუქტურისა და არქიტექტურის სამსახურის უფროსის, ლევან ჩხაიძის განმარტებით, მათ ამ საკითხთან დაკავშირებით უკვე მიმართეს საგზაო დეპარტამენტს:
“ბორდიური ამ შემთხვევაში არაფერ შუაშია. რამდენიმე წელია ეს საგზაო ნიშანი დგას, თუმცა, რამდენიმე დღეა, რაც დაჯარიმება დაიწყეს ამ ტერიტორიაზე ავტომანქანის გაჩერების გამო.
პარკინგის მოწყობასთან დაკავშირებით მივმართეთ საგზაო დეპარტამენტს, საიდანაც მივიღეთ პასუხი, რომ ამ გაზაფხულზე მოხდება გზების დახაზვა, ღერძულა ხაზი გადმოიწევს 80 სანტიმეტრით ცენტრისკენ, ცენტრალური გზა ცოტათი შევიწროვდება, მანქანების სადგომი ადგილი კი გამოიყოფა თეთრი ხაზით”, _ ამბობს ლევან ჩხაიძე.
გარდა გამგეობისა საკითხის მოგვარებაში მოსახლეობის მიმართვის საფუძველზე მაჟორიტარი დეპუტატი პარლამენტში ნინო წილოსანიც ჩაერთო, რომლის თქმითაც, პროცესი უახლოეს მომავალში დასრულდება:
“ამ ეტაპზე, აღნიშნულ საკითხთან დაკავშირებით მიმდინარეობს მუშაობა, რათა ის კანონთან შესაბამისობაში მოვიდეს. პროცესი უახლოეს მომავალში დასრულდება,” _ ამბობს წილოსანი.
