ნესვი გოგრისებრთა ოჯახის ერთ-ერთი ყველაზე საუკეთესო წარმომადგენელია. მისი მოყვანა, ბოლო წლების განმავლობაში აქტიურად დაიწყეს გურიაში. მაგალითად, ოზურგეთის სოფლებში _ მაკვანეთში, ნასაკირალსა და ლიხაურში არაერთ ოჯახში ნესვისა და საზამთროს შესანიშნავი მოსავალი მიიღეს. განსაკუთრებით წლევანდელი ცხელი ზაფხული, როგორც დაინტერესებული მეურნეები ამბობენ, საუკეთესო აღმოჩნდა ამ კულტურების სრულყოფილი ვეგეტაციისთვის.
ნესვის წვენისგან მომზადებული სასმელი ძალზე არომატული და სასიამოვნო გემოთი გამოირჩევა.
დავჭრათ ნესვი კუბიკებად. დვაყაროთ ცოტა შაქარი, კარგად ავურიოთ და დავდგათ ერთი დღის განმავლობაში. შემდეგ გადავწუროთ, დავუმატოთ შაქარი _ ერთ კილოგრამს ნახევარი კილო და 15 წუთის განმავლობაში ვადუღოთ. ნესვს განსაკუთრებული არომატულობა ახასიათებს და ვანილი საჭირო არ არის, თუმცა, ცოტა მიხაკსა და ლიმონის ცედრას თუ დავუმატებთ, საუცხოო გემო ექნება. ასეთი წესით მიღებული სიროფს, თუ სასმელის მოსამზადებლად გვინდა, გემოვნებით დავუმატოთ შინნახადი არაყი ან სააფთიაქო სპირტი; ხოლო ნამცხვრეულის დასანამად შეზავების გარეშე შევინახოთ, ჰერმეტულად დახურული.
საუკეთესოა, ასევე, ნესვის მურაბა, წყლის დამატების გარეშე, საკუთარ წვენში მოდუღებული.
სხვადასხვა ფორმებად დაჭრილ ნესვს, ერთ კილოგრამს, დავაყაროთ 800 გრამი შაქარი და დავდგათ ერთი დღით. მეორე დღეს თავისსავე წვენში ატივტივდება. რამდენჯერმე წამოვადუღოთ, 20 წუთის განმავლობაში. დუღილის დროს ლიმონის ცედრა დავუმატოთ.
