“დონალდ ტუსკის განცხადება, რომ საქართველოს შეიძლება ვიზალიბერალიზაცია შეუჩერდეს, ძალიან მკაფიო და სერიოზული სიგნალია ევროკავშირის მხრიდან. ეს არ არის უბრალო პოლიტიკური გაფრთხილება — ეს არის შინაარსიანი გზავნილი, რომ საქართველოს ხელისუფლების მიმდინარე ქმედებები ეწინააღმდეგება ევროპულ ღირებულებებსა და დემოკრატიულ სტანდარტებს”,_ ამის შესახებ “გურია ნიუსს” ჩოხატაურის მუნიციპალიტეტის საკრებულოს წევრმა, კოალიცია “ცვლილებებისთვის” წარმომადგენელმა ბაჩო ახალაძემ განუცხადა.
“ვიზალიბერალიზაცია არა მხოლოდ მოქალაქეთა თავისუფალი მიმოსვლის უფლებაა, არამედ ნდობის გამოცხადებაა მთელი საზოგადოებისადმი. მისი დაკარგვა პირდაპირი ზიანი იქნება საქართველოს მოსახლეობისთვის, განსაკუთრებით ახალგაზრდებისთვის, სტუდენტებისთვის. ეკონომიკური თვალსაზრისით, ეს ნაბიჯი მნიშვნელოვნად შეაფერხებს ჩვენი მოქალაქეების შესაძლებლობებს დროებითი დასაქმებისა და განათლების მისაღებად ევროკავშირში, რაც პირდაპირ აისახება ბევრ ოჯახზე. პარალელურად, შემცირდება კავშირები ტურიზმის, ლოგისტიკისა და ბიზნესის სექტორებში, რაც შეაფერხებს ეკონომიკურ ინტეგრაციას ევროპასთან. ამას ემატება საერთაშორისო ინვესტორთა ნდობის შემცირება, რაც უარყოფითად იმოქმედებს საინვესტიციო გარემოზე. მოვუწოდებ ხელისუფლებას, სერიოზულად გაითვალისწინოს ეს საგანგაშო სიგნალი და გადადგას პასუხისმგებლიანი ნაბიჯები, რათა არ დაზარალდეს საქართველოს მოქალაქეების ინტერესები და არ დაკარგოს ქვეყანა თავისი ევროპული მომავლის შანსი”,_ აცხადებს ბაჩო ახალაძე “გურია ნიუსთან” საუბრისას.
ინფორმაციისთვის, პოლონეთის პრემიერ-მინისტრმა, დონალდ ტუსკმა პარლამენტში არალეგალურ მიგრაციაზე ისაუბრა და ამ კონტექსტში საქართველო ახსენა.
“ეს მხოლოდ საქართველოს არ ეხება. ბოდიში ქართველებთან, ვისაც შეიძლება ეწყინოს, მაგრამ მთლიანობაში ხალხის უვიზოდ შემოსვლის შეზღუდვის ძლიერი მხარდამჭერი ვარ იმ ქვეყნებიდან, როლებიც, როგორც საქართველო, აღარ სცემენ პატივს სტანდარტებს, [ქვეყნებიდან] რომლებიც ავტორიტარულ მმართველობას ეხება, ასევე, ქვეყნებიდან, საიდანაც მიგრაცია პირდაპირ საფრთხეს უქმნის სამართლებრივ წესრიგს ან საზოგადოებრივ წესრიგს ჩვენს ქვეყანაში ან ევროპაში.
მსგავს აქტივობებს ვაწარმოებ. როგორც იცით, ეს ეროვნულ დონეზე მისაღები გადაწყვეტილება არ არის”, – განაცხადა ტუსკმა.
აღნიშნულ საკითხზე კომენტარი გააკეთა დღეს საქართველოში ევროკავშირის ელჩმაც.
„უკვე რამდენიმე წელია, რაც საქართველო ევროკავშირთან პრივილეგირებული ურთიერთობით სარგებლობს. ჩვენ ქართველებს ევროპაში უვიზო მიმოსვლისა და თავისუფალი სავაჭრო ზონის შესაძლებლობა გავუზიარეთ. სამი წლის წინ საქართველომ კანდიდატი ქვეყნის სტატუსის მინიჭების შესახებ განაცხადი შეიტანა და ჩვენ მას ევროკავშირის კანდიდატი ქვეყნის სტატუსი ოფიციალურად მივანიჭეთ. თუმცა, სამწუხაროდ, ბოლო პერიოდის განმავლობაში, დაახლოებით ერთი წელია, ევროკავშირსა და საქართველოს შორის ურთიერთობები კარგად არ მიმდინარეობს“, – განაცხადა პაველ ჰერჩინსკიმ.
მისი თქმით, „ევროკავშირში უკვე რამდენიმე თვეა მიმდინარეობს დისკუსია იმის შესახებ, თუ რა უნდა გააკეთონ წევრმა სახელმწიფოებმა საქართველოს ხელისუფლების ქმედებების, გადაწყვეტილებებისა და კანონების საპასუხოდ, რომლებიც საქართველოს ევროკავშირს აშორებს“.
