ამერიკის შეერთებული შტატების სახელმწიფო დეპარტამენტის პრესსპიკერის, ნედ პრაისის თქმით, საქართველოში დემოკრატიის უკუსვლა ქვეყანას ევროატლანტიკური ინტეგრაციისგან აშორებს და ქვეყნის დემოკრატიას ასუსტებს.
“ზოგიერთი ქართული პოლიტიკური ელიტის მხრიდან ბოლოდროინდელი მავნე რიტორიკის მიუხედავად, ეს არ შეცვლილა. ჩვენ ვრჩებით ქართველი ხალხის პარტნიორად. ბოლო 30 წლის განმავლობაში, ფაქტობრივად, ჩვენ გავხდით სტრატეგიული პარტნიორები, რომლებიც ერთად ვმუშაობთ საქართველოს შესახებ ჩვენი საერთო ხედვისკენ, რაც გულისხმუბს სრულად ინტეგრირებული ევროატლანტიკურ ერების ოჯახს და ევროპის ნაწილს, რომელიც არის მთლიანი, თავისუფალი და მშვიდი. ეს არის ხედვა, რომელსაც პოლიტიკური ნება სჭირდება. ამას მძიმე შრომა სჭირდება; სჭირდება მოთმინება; მის განხორციელებას მნიშვნელოვანი ძალისხმევა სჭირდება.
ამის ფარგლებში შეერთებულმა შტატებმა 6 მილიარდ დოლარზე მეტი გამოყო საქართველოსთვის დახმარების სახით, მოამზადა ათიათასობით ქართველი ჯარისკაცი და კიდევ ათასობით გაგზავნა შეერთებულ შტატებში კულტურული და საგანმანათლებლო გაცვლისთვის. ჩვენ ასევე დავეხმარეთ ეკონომიკური ზრდის, კანონის უზენაესობისა და დემოკრატიული მმართველობის ხელშეწყობას, სხვა მრავალ ინიციატივასთან ერთად ქართველ ხალხთან, საქართველოს მთავრობასთან ერთად.
ჩვენ ღია ვართ საქართველოს მთავრობასთან დემოკრატიული ინსტიტუტებისა და პროცესების, კანონის უზენაესობისა და ადამიანის უფლებების გაძლიერების აუცილებლობის შესახებ. დემოკრატიული უკანდახევა, რომელიც ჩვენ დავინახეთ, რაზეც ბოლო დღეებშიც ვისაუბრეთ, აშორებს საქართველოს გაცხადებულ მიზანს – ევროატლანტიკურ ინტეგრაციას; მაგრამ რაც მთავარია, ის ასუსტებს საკუთარ დემოკრატიას. ეს ასუსტებს დემოკრატიას, რომლის მიღწევასაც ქართველი ხალხი ასე აშკარად ისწრაფვის.
ჩვენ გავაგრძელებთ პარტნიორობას საქართველოს ხალხთან, რადგან ისინი ისწრაფვიან დემოკრატიული, აყვავებული, მშვიდობიანი და ევროატლანტიკური მომავლისკენ. ჩვენ მოვუწოდებთ საქართველოს მთავრობას განახორციელოს აუცილებელი რეფორმები ევროკავშირის კანდიდატის სტატუსის მოსაპოვებლად და მზად ვართ დავეხმაროთ მთავრობას ამაში”,_ განაცხადა პრაისმა.
