ფაქტია, რომ ლანჩხუთის მუნიციპალიტეტის სოფლებისთვის წყლის მიწოდება ერთ–ერთ ყველაზე აქტუალურ პრობლემას წარმოადგენს _ სასმელად ვარგისი წყლის დეფიციტზე მოსახლეობა საჯაროდ საუბრობს.
“სამწუხაროდ, დასალევი წყალიც მოსაზიდი აქვს მოსახლეობას. ჭა ჩვენთან არ ვარგა. გვპირდებიან ამ თვის ბოლოს, იმ თვის ბოლოს, არ დაადგა საშველი“, _ ამბობენ სოფელ ღრმაღელის მცხოვრებლები, რომლებიც არაერთი წელია წყალს ითხოვენ.
“უწყლობით შეწუხებული სოფლის მოსახლეობა 2 წელია ველოდებით, როდის დაადგება საშველ–სახიდებელი ჩვენს სოფელში წყლის მომარაგების აღდგენას! რა დაუსრულებელია ეს უაზრო მიზეზები…. სოფელი ითხოვს მეტ ყურადღებას…
2 წელია ბაღი ააშენეს, გამოშრა კი არა, ლამის, დაძველდეს შენობა და არ აღირსეთ ბავშვებს შესვლა!!!!
ასე უყურადღებობა სოფლის მოსახლეობის მიმართ ძალიან სამარცხვინოა!!!
გამოაფხიზლეთ დაძინებული კომპანია, რომელსაც ჩაბარებული აქვს სოფელში წყლის მომარაგების პრობლემა!!!
წყალს მიაქ ხეი და მიწა და ღრმაღელეს რით ვერ ეღირსა წყლის პრობლემის მოგვარება…” _ სოციალურ ქსელშიც საჯაროდ საუბრობს ღრმაღელის მოსახლეობა თემში არსებულ პრობლემაზე.
არადა, ლანჩხუთის არაერთ სოფელში წყლის სისტემის მოსაწყობად, მილიონზე მეტი ლარი დაიხარჯა, თუმცა, პრობლემა მაინც არ მოგვარებულა და მოსახლეობას წყალი ისევ არ მიეწოდება. ამ ჩამონათვალშია სოფელი ღრმაღელეც. ლანჩხუთის 11 სოფელში: წყალწმინდაში, ომფარეთში, ღრმაღელეში, წიაღობანში, ბაღლეფში, ჯურუყვეთში, ეწერსა და აკეთის ადმინისტრაციული ერთეულში (ქვემო აკეთში, ჭანჭათში, გაგურში, ზემო აკეთში) წყალმომარაგების სისტემის მოწყობა-რეაბილიტაციის საპროექტო-სამშენებლო სამუშაოების გახორციელება გაერთიანებული წყალმომარაგების კომპანიამ 2022 წელს დაიწყო.
როგორც მაშინ ითქვა, ზემოთ ნახსენები სამუშაოების გასახორციელებლად, სახელმწიფო ბიუჯეტიდან 22 მლნ ლარამდე გაიხარჯებოდა. პროექტის დასრულება კი, 2023 წელის ზაფხულის სეზონზე იყო დაგეგმილი.
“შედეგად, ლანჩხუთის 11 სოფლის მოსახლეობა უწყვეტი, ხარისხიანი წყალმომარაგებით ისარგებლებს“, _ განმარტავდნენ მაშინ წყალმომარაგების კომპანიაში. თუმცა, კომპანიამ გაცემული პირობა დათქმულ დროში ვერ შეასრულა და სამუშაოების დასრულების ვადამ ერთი წლით გადაიწია.
ლანჩხუთის მერიის მიერ გავრცელებულ ინფორმაციაში, რომელიც 29 აპრილითაა დათარიღებული, ვკითხულობთ: “პროექტით გათვალისწინებულია: წყალმომარაგების ქსელის, სატუმბი სადგურის, რეზერვუარებისა და ყველა სხვა საჭირო ინფრასტრუქტურის მოწყობა. დღეის მდგომარეობით, მუნიციპალიტეტში მიმდინარე სამშენებლო სამუშაოები დასკვნით ეტაპზეა და მისი დასრულება 2024 წლის მაისის თვეშია დაგეგმილი. შედეგად, სოფლების: აკეთის, ჯურუყვეთისა და ღრმაღელეს 1990 ბენეფიციარი 24-საათიანი უწყვეტი წყალმომარაგებით ისარგებლებს“.
ახლა კალენდარზე 2025 წლის ივლისის ბოლოა და სოფელ ღრმაღელის მოსახლეობის თქმით, მათთვის კვლავაც აქტუალურ პრობლემას წარმოადგენს წყლის მიწოდება.
“გურია ნიუსი” თემასთან დაკავშირებით ღრმაღელის წარმომადგენელს ლანჩხუთის საკრებულოში კახა თედორაძეს დაუკავშირდა. როგორც მისგან შევიტყვეთ, ამ დროისთვის სატესტო რეჟიმში მოსახლეობის ნაწილს წყალი მიეწოდება.
“წყალი სატესტო რეჟიმშია გაშვებული, ჩაბარებული არ არის. ახლა მესამე ჭაბურღილი დაამატეს, ამ დღეებში მოხდება მისი სისტემასთან დაერთება. ამის შემდეგ დაზუსტებით გვეცოდინება, რა გვჭირს, რაშია პრობლემა. სამუშაოების შემსრულებელი კომპანიისგან გვაქვს იმედი, რომ ამ თვის ბოლოსთვის მოწესრიგდება ყველაფერი, ყველანაირად ვცდილობ და დიდი სურვილი მაქვს თვის ბოლომდე მოესწროს პრობლემის გადაჭრა და მოწესრიგება. თანაც ვაკანსიებზეც განაცხადები შევსებულია უკვე, აღმრიცხველი, ოპერატორი საჭიროა. აღრიცხვა რომ არ ხდება და მრიცხველის გამოყენება რომ არ ხდება ამ ეტაპისთვის, მოსახლეობაც უყურადღებოდ მოიხმარს წყალს, ზოგი ონკანს არ კეტავს, წყლის ზედმეტად, უდიერად გახარჯვა ხდება. ამასთან წყლის დებეტის პრობლემაცაა და ამ ყველაფრის ფონზე მოსახლეობის ნაწილს წყალის მიწოდების პრობლემა ექმნება. მოკლედ, ვიმედოვნებ, ამ დღეებში მოხდება მესამე ჭაბურღილის სისტემასთან დაერთება.
ყველანაირად ვცდილობ,რომ რაც შეიძლება დროულად მოგვარდეს, საკითხი, ჩაბარდეს ობიექტი და საჭირო კადრი დასაქმდეს. არის შემთხვევები, როცა დენი გამოირთო და მერე მეორე დილამდე ჩამრთველიც არავინაა, რომ რეზერვუარი წყლით შეივსოს და არ დაიცალოს წყლისგან. ესეც დამატებით პრობლემას ქმნის“, _ გვითხრა ღრმაღელის მაჟორიტარმა.
იქედან გამომდინარე, რომ ღრმაღელის მოსახლეობა საბავშვო ბაღის თემაზეც აკეთებს აქცენტს _ “2 წელია ბაღი ააშენეს, გამოშრა კი არა, ლამის დაძველდეს შენობა და არ აღირსეს ბავშვებს შესვლა!!!”, _ კახა თედორაძეს ამ საკითხზეც დავუსვით შეკითხვა.
ცნობისთვის, სოფელ ღრმაღელეში 50 ბავშვზე გათვლილი საბავშვო ბაღის მშენებლობა გასული წლის სექტემბრისთვის დასრულდა, თუმცა, მიუხედავად ამისა, სასწავლო-სააღმზრდელო პროცესი ახალ შენობაში არ განახლებულა. ოფიციალური ინფორმაციით, ახალ საბავშვო ბაღში მოეწყო სათამაშო და საძინებელი ოთახები, საპირფარეშოები და ეზო. პროექტით გათვალისწინებული იყო შიდა და გარე სივრცეების, რეკრეაციული ზონების, კომუნიკაციების და სველი წერტილების კეთილმოწყობა. პროექტის ღირებულება 1,2 მილიონი ლარი გახლდათ.
თედორაძის თქმით, გასულ წელს ღრმაღელის ბაღში აღსაზრდელების მიღება უწყლობის გამო ვერ მოხერხდა:
“წყლის სისტემაზე უკვე დაერთებულია საბავშვო ბაღის ახლად აშენებული შენობა და მიმდინარე წელს მიიღებს აღსაზრდელებს“, _ გვპირდება სოფლის წარმომადგენელი ლანჩხუთის საკრებულოში.
ავტორი
