„ნაპოლი” – „ინტერის“ შეხვედრამ დიდი ვნებათაღელვა გამოიწვია. მატჩის დასრულების შემდეგ ნეაპოლური კლუბის მთავარმა მწვრთნელმა ვალტერ მაძარიმ პროტესტის ნიშნად პრესკონფერენცია არ გამართა.
ნეაპოლელები მსაჯობით იყვნენ უკმაყოფილონი. მაძარის ნაცვლად ისაუბრა კლუბის სპორტულმა დირექტორმა მაურო მელუზომ, რომელმაც მთავარი არბიტრი და VAR-ი გააკრიტიკა:
„მაძარი დღეს არ ილაპარაკებს, რადგან რაც მოხდა, იმაზე ძალიან გაბრაზებულია. ვფიქრობ, რაც დღეს მოხდა, დამამცირებელია. თამამად შეგვიძლია ვთქვათ, რომ მსაჯმა და VAR-მა ცუდად იმუშავეს. ლობოტკაზე უხეში და აშკარა ჯარიმა იყო, უცნაურია, რომ დავიდე მასა არ ჩაერია, ამ გოლმა მნიშვნელოვანი ფსიქოლოგიური დარტყმა მოგვაყენა.
მეორე ეპიზოდია ოსიმენზე პენალტი, ჩვენს ფეხბურთელს მყესზე შეეხნენ, ფოლი აშკარა იყო, შეხედეთ სურათებს, დარღვევა აშკარაა, VAR-ზე მაინც უნდა შეემოწმებინათ. ლობოტკაზე ლაუტაროს მხრიდან ჯარიმაზე კი ვიდეორეფერის ჩარევა საჭირო არ იყო, ტრიბუნიდან ჩანდა ჯარიმა და მსაჯმა როგორ ვერ დაინახა?
გუნდმა ყველაფერი გაიღო, ბევრი საგოლე მომენტი შევქმენით. ცხადია, კიდევ უნდა გავაუმჯობესოთ რაღაც, მაგრამ არ ვიმსახურებდით ასეთ დამამცირებელ მსაჯობას. არ მინდა საბაბი, მაგრამ როცა „ინტერის“ მსგავს გუნდებს ეთამაშები, უთანასწორობა დაუშვებელია. მსაჯთან არ მისაუბრია, დე ლაურენტისი კი გასახდელში იყო ვილაპარაკეთ. სამწუხაროა, რომ ასეთ რამეებზე გვიწევს საუბარი, რადგან გუნდმა კარგად ითამაშა, მაძარის მოსვლით ბალანსი დავიბრუნეთ“, – განაცხადა მაურო მელუზომ.
„ნაპოლის“ პრეზიდენტმა აურელიო დე ლაურენტისმა წაგება მსაჯებს დააბრალა. მატჩის შემდეგ მან კლუბის სპორტულ დირექტორ მაურო მელუზოს უთხრა, რომ ეს მხოლოდ მსაჯის ბრალი იყო: „კონსპირაციის თეორიებს არ ვეხებით, არც შეთქმულების თეორიების გვჯერა, მაგრამ მსაჯის გამო წავაგეთ“.
დე ლაურენტისმა თამაშის შემდეგ იტალიის ფეხბურთის ფედერაციასა და მსაჯების ასოციაციაში დარეკა, რომლებსაც პრეტენზიები ღიად დაუფიქსირა.
„ნაპოლიში“ მიიჩნევენ, რომ პირველი გოლი მსაჯს არ უნდა ჩაეთვალა, მანამდე არსებული ჯარიმის გამო, ხოლო 0:1-ზე ვიქტორ ოსიმენზე პენალტის დანიშვნას ითხოვდნენ.
მილანის „ინტერის“ მთავარმა მწვრთნელმა სიმონე ინძაგიმ გამარჯვების შემდეგ შემდეგი კომენტარი გააკეთა.
„პირველი ტაიმი კარგად დავიწყეთ, გოლიც გავიტანეთ, მაგრამ ტურამი ოდნავ თამაშგარეში იყო. რა თქმა უნდა, კარგ გუნდს ვეთამაშებოდით, რომელიც იტალიის ჩემპიონია, მაგრამ ჩემმა გუნდმა იყოჩაღა. გაგვიმართლა ხარიხის მომენტში და ზომერის სეივით.
მეორე ტაიმში, 2:0-ის შემდეგ თამაშს სრულად ვაკონტროლებდით. ნეაპოლში ასეთი გამარჯვება სასიხარულოა, მაგრამ ჯერ მხოლოდ მე-14 ტურია და სამუშაობა ბევრი გვაქვს, ვეცდებით ასე გავაგრძელოთ. მატჩის დასაწყისში დავკარგეთ დე ვრეი, ტრავმები აქვთ ბასტონის და პავარს, სკამზე მხოლოდ ბისეკი და კარლოს აუგუსტო მყავდა, რომელსაც წელიწადნახევარია ამ პოზიციაზე არ უთამაშია, მაგრამ არ მინდოდა დარმიანისთვის შემეცვალა პოზიცია, რადგან მის ზონაში კვარაცხელია მოქმედებდა, რომლისგან პრობლემები ყოველთვის მოსალოდნელია“, – თქვა ინძაგიმ.
„ნაპოლის“ კაპიტანმა ჯოვანი დი ლორენცომ განაცხადა, რომ კარგად ითამაშეს და არ გაუმართლათ.
„მოედნიდან მომეჩვენა, რომ ლობოტკაზე ჯარიმა იყო. შემდეგ ვიდეო ვნახე და იმავეს ვფიქრობ. ოსიმენზე პენალტის ეპიზოდი ჯერ არ მინახავს, მაგრამ ამ ტიპის მატჩებში, თითოეული დეტალი გადამწყვეტია. არ ვართ კმაყოფილი ამ სიტუაციით, რადგან დავზარალდით.
ზოგადი თვალსაზრისით კარგად ვითამაშეთ, არ გაგვიმართლა და შეგვეძლო შეტევის ფაზაში უფრო სახიფათო ვყოფილიყავით. შემდეგ ანგარიშში ჩამოვრჩით და ადვილი არ არის ქამბექი გუნდთან, რომელიც ამჟამად პირველ ადგილზეა. დადებითი მხარე ისაა, რომ კარგ ფეხბურთს ვთამაშობთ, მიუხედავად იმისა, რომ ამჯერად გოლი ვერ გავიტანეთ. გუნდი აჩვენებს, რომ რეაგირების უნარი აქვს და უნდა გავაგრძელოთ მუშაობა, რათა სწორ გზაზე დაბრუნება შევძლოთ“, – თქვა დი ლორენცომ.
და ბოლოს ხვიჩა კვარაცხელია. იტალიურმა მედიამ ქართველის თამაში შემდეგნაირად შეაფასა.
Tuttomercatoweb 5.5 ქულა: პირველი, რაც უნდა ითქვა: არ ბრწყინავს. მეორე: გოლის გატანა მაინც შეეძლო, ზომერმა ბურთი კუთხურზე მოიგერია. მესამე: ფლანგის ჯაჭვზე მეტი მხარდაჭერა სჭირდება, რაც გართულებულია, რადგან ორივე მარცხენა მცველი და მარცხენა შუამარბიც ტრავმირებულია“.
Mediaset 5.5 ქულა: „როგორც მოსალოდნელი იყო, ფლანგზე მაქსიმალურად ფართოდ ითამაშა, მაგრამ დაცვა ვერ გაშალა. გაუჭირდა დარმიანის და დუმფრისის მოტყუება, როცა ეს შეძლო, ზომერი იყო ყურადღებით“.
Il Giornale 6 ქულა: „თავისი აჩქარებებით ყოველთვის სახიფათოა. დუმფრისს და დარმიანს მუდმივ შიშში ამყოფებს, მაგრამ არა მხოლოდ მათ. ზომერმა დიდებული სეივით არ გაატანინა. გარდა ამისა, ამტკიცებს, რომ დიდებული სამართლიანი თამაშის მქონე ფეხბურთელია, როდესაც დუმფრისი მიწაზე ეცემა. ის არის ის, ვინც თამაშს აჩერებს და მსაჯს ეძახის ექიმების ჩარევის მიზნით“.
Sport.virgilio 5.5 ქულა: „ნაკლებად ჩართულია თამაშში, ვერ აჩქარებს ტემპს და უადვილებს საქმეს დარმიანსა და დუმფრისს, რომლებიც მის წინააღმდეგ სისტემატურად ორმაგი მეურვეობით თამაშობენ. ერთხელ მათ გაცდა, მაგრამ ზომერი გადაეღობა“.
Calciomercato 6 ქულა: „ზოგჯერ მუხტი აკლდა. ერთხელ მარცხნივ გადახვევით დარმიანს აჯობა და კარგად დაარტყა მარცხენა ფეხით, მაგრამ ზომერმა ბურთი მოიგერია“.
ავტორი
