პირველი თებერვლიდან სამშენებლო მომსახურებაზე აღარ გავრცელდება სპეციალური დაბეგვრის რეჟიმი _ მცირე ბიზნესის სტატუსის მქონე მეწარმე ფიზიკური პირები სამშენებლო მომსახურებისას ვეღარ ისარგებლებენ 1%-იანი შეღავათიანი განაკვეთით.
სამშენებლო მომსახურებიდან მიღებულ შემოსავლებზე მცირე ბიზნესის სტატუსი აღარ გავრცელდება და მეწარმე 20%-იანი განაკვეთით დაიბეგრება, _ იუწყება bm.ge.
ცვლილებები “ოცნებამ” 2024 წლის დეკემბერში დააინიიცირა და 2025 წლის პირველი იანვრიდან უნდა შესულიყო ძალაში. თუმცა, საფინანსო საბიუჯეტო კომიტეტის სხდომაზე “ოცნების” დეპუტატი ბეჟან წაქაძე ცვლილების ისე ამოქმედებას, რომ სექტორს დრო არ ჰქონოდა, შეეწინააღმდეგა. ცვლილებები გადავადდა. ბეჟან წაქაძე თვლიდა, რომ პირველ თებერვლამდე დროც არასაკმარისი იყო, თუმცა კომიტეტმა მოსაზრება აღარ გაითვალისწინა.
სებ-ის ყოფილი პრეზიდენტი და ყოფილი დეპუტატი რომან გოცირიძე მშენებლობაში მცირე მეწარმეებისთვის საშემოსავლო გადასახადის შეღავათის გაუქმებას აფასებს და აღნიშნავს, რომ ამ გადაწყვეტილებით 200 მილიონი ლარი შევა ბიუჯეტში, რაც საერთაშორისო იზოლაციის ფონზე მნიშვნელოვანია ხელისუფლებისათვის.
ამასთან, მას ნაკლებად მოსალოდნელად მიაჩნია, რომ ცვლილება დასაქმებულების ხელფასებს შეამცირებს.
“ყველა დაქირავებული იხდის საშემოსავლოს ხელფასიდან 20 პროცენტის ოდენობით. სამშენებლო სექტორში იპოვეს ხვრელი-დაქირავებულ მუშებს აფორმებდნენ ინდმეწარმეებად და ისინი იხდიდნენ შემოსავლიდან 1 პროცენტს. სინამდვილეში ამ გადასახადს იხდის დამქირავებელი და ბიუჯეტისთვის ის უკავებს ფულს დაქირავებულს.
დღეიდან მცირე მეწარმეებისათვის დაწესებული ეს შეღავათი მშენებლობის სექტორში უქმდება. ამის წინააღმდეგ წავიდა პარლამენტში სამშენებლო ლობი, მაგრამ კანონი მაინც ამოქმედდა. რატომ აწყენინა მთავრობამ კალაძეს და კომპანიას, იმ მშენებლებს, რომლებიც მჭიდროდ არიან დაკავშირებულები ოცნებასთან? იმიტომ, რომ ამ გადაწყვეტილებით 200 მილიონი ლარი შევა ბიუჯეტში. საერთაშორისო იზოლაციის ფონზე ეს ფული საკმაოდ მნიშვნელოვანია ხელისუფლებისათვის.
მოკლედ რომ ვთქვათ, დღემდე სამშენებლო სექტორის დიდი ნაწილი საშემოსავლო გადასახადს ფაქტობრივად არ იხდიდა, რაც დარგობრივი შეღავათის ნაირსახეობაა, რაც არასწორია სამართლიანი კონკურენციის თვალსზრისით.
ჩნდება კითხვა-ჩვეულებრივი დაბეგვრის რეჟიმში გადასვლა ხომ არ მოხდება მუშებისათვის ხელფასების შემცირების ხარჯზე? არა მგონია. ამ დარგში დიდი კონკურენციაა, ფიზიკურად აქტიური სამუშაო ძალისგან კი იცლება ქვეყანა. კვალიფიციური მუშის მოძებნა არაა ადვილი შრომის ბაზარზე”, _ წერს რომან გოცირიძე სოციალურ ქსელში.
