20 დეკემბერს, ოზურგეთის მეორე საჯარო სკოლაში მშობელთა კრება შედგა. სკოლის დირექტორმა, ფატი სიორიძემ დღის წესრიგით გათვალისწინებული სამი საკითხი გააცნო მშობლებს, რაც 2019 და 2020 წლის ბიუჯეტს შეეხებოდა.
-წესი წესია, ჩვენ ყოველი წლის ბოლოს წარმოგიდგენთ ფინანსურ ანგარიშს და ასევე მომავალი წლის ბიუჯეტსაც ვიხილავთ. კარგად იცით, რომ ჩვენი ბიუჯეტი, ძირითადად, ვაუჩერული დაფინანსებიდან გამომდინარეობს . მოსწავლეთა რაოდენობა სკოლაში გასულ წელს იყო 931, ხოლო 2020 წლისთვის 956 მოსწავლე გვყავს, შესაბამისად, ვაუჩერული დაფინანსება იყო 540 952 ლარი, ხოლო ამჯერად იქნება 562 952 ლარი. სკოლაში სულ 67 მასწავლებელია, სერთიფიცირებულთა დანამატი 2019 წელს შეადგენდა 42 621 ლარს, ხოლო 2020 წელს 44 800 ლარია, _ თქვა მან და კონკრეტულად ისაუბრა, ფინანსური მიმართულებით სად რა ხარჯვა ხდება.
ფატი სიორიძემ ვრცლად ისაუბრა სასკოლო ცხოვრების წესსა და სასწავლო აქტივობებზე, რაც თითოეულ კლასსა და საგანში მაღალი ინტენსივობით ტარდება. დაასახელა გამორჩეული პროექტები. ისაუბრა თითოეული კლასის ხელმძღვანელისა და საგნის მასწავლებელთა აქტივობებზე, რომლებიც ერთმანეთს არ ჩამორჩებიან და პირიქით, ყოველდღე ინოვაციურ პროექტებს ახორციელებენ.
_განსაკუთრებით სასიხარულოა ჩვენი სკოლისთვის სასკოლო ოლიმპიადაში 17 მოსწავლის მეორე ეტაპზე გადასვლა. რიცხობრივად ეს არის საუკეთესო შედეგი. კარგად ვიცით ყველამ, რა დიდი მნიშვნელობა აქვს სასკოლო ოლიმპიადას, მოსწავლეთა ცოდნის ამაღლების საქმეში _ უთხრა მან მშობლებს.
მან ასევე ხაზი გაუსვა ინტელექტთამაშებში სკოლის მოსწავლეთა გუნდის „გრაალის“ გამარჯვებას, რაც სწავლის მაღალი ხარისხის მაჩვენებელია.
_როცა მრავალ წარმატებაზე ვსაუბრობ, ჩვენ გულწრფელად გეტყვით, რომ გვაქვს სუსტი მხარეები, რაც ადვილად გამოსასწორებელი არ არის და თქვენგან განსაკუთრებული დახმარება გვჭირდება. უნდა აღვნიშნო, აღრიცხულია გაკვეთილის მიტოვების 96 შემთხვევა, ასევეა დაგვიანება, გაკვეთილის ჩაშლის მცდელობა, რაც სასწავლო პროცესზე ნეგატიურ გავლენას ახდენს. განსაკუთრებით დიდია პირველ გაკვეთილზე დაგვიანების ფაქტები, თითქმის, პირველი გაკვეთილის დასრულებამდე ხდება მოსწავლეთა შემოდინება. დილით სწავლა ათის ნახევარზე იწყება. უფრო გვიანაც რომ დავიწყოთ, იგივე სურათი გვექნება. ამიტომ ამ საქმეში თქვენზე უკეთ ვერავინ დაგვეხმარება. ასევე დიდია გაკვეთილიდან გასვლის მცდელობები, როცა მშობელს ურეკავს ბავშვი. მერე მასწავლებელს მშობელი ურეკავს და ეუბნება, რომ გაუშვას _ უამბო მან მშობლებს და თხოვა, მიუხედავად იმისა, რომ ხშირად ასეთ დროს მშობელი სისუსტეს იჩენს და შვილის ნებას დაჰყვება- ხოლმე, განსაკუთრებული სიმტკიცე გამოიჩინონ და შეუსრულებენ ყველაფერს.
ფატი სიორიძემ ისაუბრა ასევე მოსწავლეთა მრავალრიცხოვნობის შესახებ კლასებში და თქვა, რომ ამ მხრივ უკვე მოწესრიგდა საკანონმდებლო სისტემა. მეშვიდე კლასიდან ზემოთ, თითოეულ კლასში 29 მოსწავლეზე მეტი არ იქნება. მან ასევე მშობლებს სთხოვა ახალი იდეების მოწოდების თაობაზე და გააცნო სიახლე – იანვრიდან სკოლაში დაიდგმება „იდეების ყუთი“, სადაც თითოეული მშობელი საკუთარ იდეას წერილობითი ფორმით ჩაუშვებს.
დარბაზს მხიარული ელფერი შესძინა და მოწონება დაიმსახურა დირექტორის შეთავაზებამ იმის თაობაზე, რომ სხვადასხვა შემოქმედებით ღონისძიებაში და კონკურსებში თვითონ მშობლებმაც მიიღონ მონაწილეობა, შვილებთან ერთად და გამოჩნდეს, ვის რა დონის განათლება აქვს, როგორ ჩაერთვებიან სხვადასხვა აქტივობაში.
ფატი სიორიძემ მშობლებს ასევე ესაუბრა სკოლაში ძლიერი ფსიქოლოგის შემოყვანის აუცილებლობაზე, რაც დარბაზში მყოფებმა მოიწონეს. მშობლებმა ალეკო მამეშვილმა, ოთარ რევიშვილმა, თეა წულაძემ და სხვებმა გამოთქვეს საკუთარი მოსაზრებები.
ინტერესი გამოიწვია მშობლის რანგში შოთა გოგიბერიძის გამოსვლამ, რომელიც ოზურგეთის მუნიციპალიტეტის საკრებულოს წევრია:
_ პირველ რიგში ახალი წლის მობრძანებას გილოცავთ. კარგია, რომ ასე საინტერესოდ და საქმიანად ტარდება საანგარიშო მოსმენა. ასე ვთქვათ , პირველი ხელიდან ვიღებთ ინფორმაციას ჩვენი შვილების შესახებ. ძალიან მომწონს სკოლის აქტივობები, რასაც სულ ვეცნობი. თუმცა, ახლა ერთ კონკრეტულ თემაზე მსურს საუბარი. ისევ ნელ-ნელა შემოგვეჩვია კრიმინალური ვითარება. როგორც გავიგე, ქუთაისში ჩატარდა კვლევა და მოსწავლეთა საკმაო ნაწილს კვლავ მოსწონს „ქურდული სამყარო“. აუცილებლად უნდა ვესაუბროთ ხშირად ჩვენს ბავშვებს, რა განსხვავებაა ქურდსა და პროფესორს შორის. რა ჯანდაბაა, რატომ უნდა სურდეს, იყოს ქურდი და არ სურს პროფესორობა? ამაზე ჩვენ უნდა ვიმუშაოთ. ეს არის ძალზე დიდი გამოწვევა და თუ არ ვიღონეთ სასწარაფოდ რაიმე, მერე გვიან იქნება. გამოვთქვამ იმედს, ამ საქმეს მივხედავთ. ეს არის ძლიერი კოლექტივი, ძლიერი ადამიანებით ძლიერი პედაგოგებით და, კიდევ და კიდევ გისურვებთ წარმატებებს _ ასე დასრულა მან თავისი გამოსვლა, რაზეც მშობლებმა ტაშით უპასუხეს.
ფატი სიორიძემ დასასრულს კიდევ ერთხელ მიმართა მშობლებს, იყვნენ აქტიურები და გაიმეორა, რომ მომდევნო სემესტრიდან სკოლაში განთავსდება „იდეების ყუთი“, რაც ერთად მუშაობის და სიახლეების დანერგვის, პრობლემების თანმიმდევრულად გადაწყვეტის საქმეში მნიშვნელოვან როლს შეასრულებს.
