ტელეკომპანია “ფორმულას” განცხადებით, ერთ-ერთ დამფუძნებელ მიშა მშვილდაძეზე თავდასხმის ფიგურანტი სახელმწიფო უსაფრთხოების სამსახურის თანამშრომელი გიორგი მუმლაძეა.
როგორც ტელეკომპანიის ჟურნალისტი დათო ქაშიაშვილი საგანგებო განცხადებისას აღნიშნავს, 1998 წელს დაბადებული მუმლაძე სუს-ის ქალაქის სამმართველოს გამომძიებელია. ის რამდენიმე თვეა, რაც სუს-ში გამომძიებლად მისმა ნათლიამ, ლევან ახობაძემ (სუს-ის უფროსის მოადგილე), გადაიყვანა. მანამდე მუმლაძე შინაგან საქმეთა სამინისტროში მუშაობდა.
“ჩვენ, წყარო გვიდასტურებს, რომ მიშაზე თავდასხმას კურირებდა თავად ლევან ახობაძე, პირად კონტროლზე სწორედ მას ჰყავდა აყვანილი. გიორგი მუმლაძის მამაზეც უნდა ვისაუბროთ, ზურაბ მუმლაძე, რომელიც 2017-18 წლებში შევსებული დეკლარაციების მიხედვით იკავებს ასეთ მაღალ თანამდებობას – საქართველოს თავდაცვის სამინისტროს საქართველოს შეიარაღებული ძალების გენერალური შტაბის სამხედრო პოლიციის დეპარტამენტის ოპერატიული უზრუნველყოფისა და მონიტორინგის მთავარი სამმართველოს სამცხე-ჯავახეთის რეგიონული სამმართველოს უფროსი. ეს გახლდათ გიორგი მამა, რომელიც მიშას თავდასხმაში მონაწილეობას და 2018 წლამდე ძალიან მაღალი თანამდებობა რომ ეკავა ვხედავთ. ჩვენი ინფორმაციით, 2018 წლის შემდეგ, 2020 ან 2021 წელს, დაზუსტებით არ შემიძლია ამის თქმა, ისიც გადავიდა სუს-ში, ლევან ახობაძესთან”, – ამბობს დავით ქაშიაშვილი.
გარდა ამისა, “ფორმულას” წყაროს ინფორმაციით, თავდასხმაში მონაწილე სამივე ავტომანქანა, სახელმწიფო უსაფრთხოების სამსახურის დეპარტამენტს ეკუთვნის. კადრებში ჩანს კიდევ ერთი კაცი, რომელიც გიორგი მუმლაძესთან ერთად გადაადგილდება.
ტელეკომპანიის ინფორმაციით, ისიც სუს-ის თანამშრომელია.
“ფორმულას” ერთ-ერთ დამფუძნებელს, მიშა მშვილდაძეს 27 ივნისს უცნობი პირი თავს დაესხა და ფიზიკურად გაუსწორდა. შსს-მ გამოძიება სისხლის სამართლის კოდექსის 126-ე მუხლით მიმდინარეობს, რაც ძალადობას გულისხმობს.
28 ივნისს სოციალურ ქსელში მოქალაქე ნიკოლოზ გუგეშაშვილმა დაწერა, რომ გუშინ 27 ივნისს ფორმულას ერთ-ერთ დამფუძნებელს მიშა მშვილდაძეს თავს ის დაესხა.
გუგეშაშვილის თქმით, თავდასხმის მიზეზი ისაა, რომ მშვილდაძე “ეკლესიას მოიხსენიებს კრიმინალად და იძახის, რომ ჯვარი არის ძალადობის სიმბოლო, აგინებს პატრიარქს, ქართველ ერს და იცავს მამათმავლებს”.
ამავე დღეს მიშა მშვილდაძეზე თავდასხმის ბრალდებით ერთი ადამიანი დააკავეს.
29 ივნისს, კი მიშა მშვილდაძეს მასზე თავდასხმიდან მესამე დღეს დაზარალებულის სტატუსი ოფიციალურად მიენიჭა.
ფორმულას მიერ მოპოვებულ კადრებში ჩანს, რომ თავდასხმამდე რამდენიმე წუთით ადრე 4 ადამიანი, ცალცალკე მიდის იმ ტერიტორიისკენ სადაც თავდასხმა მოხდა. მათგან ორი კარფურისკენ აგრძელებს სვლას 2 კი იქვე, ბუჩქებთან ჩერდება. ამ 4 ადამიანიდან ერთ-ერთი ნიკოლოზ გუგეშაშვილია, რომელმაც მოგვიანებით Facebook-პოსტით აღიარა მიშა მშვილდაძეზე თავდასხმა.
წყარო: ფორმულა
