ცნობილი გახდა, რომ მსოფლიოს 2030 წლის ჩემპიონატი ერთდროულად ექვს ქვეყანაში გაიმართება. ფიფამ გადაწყვეტილება ცოტა ხნის წინ მიიღო.
გაირკვა, რომ პირველობას ესპანეთი, პორტუგალია და მაროკო ერთობლივად უმასპინძლებენ. თუმცა, მსოფლიოს ჩემპიონატის 100 წლისთავთან დაკავშირებით, რამდენიმე მატჩი არგენტინაში, ურუგვაისა და პარაგვაიშიც გაიმართება. ჯერჯერობით, უცნობია, ზუსტად როგორ განაწილდება მატჩების რაოდენობა ხსენებულ ქვეყნებზე.
დიდი ალბათობით, სამხრეთ ამერიკის კონტინენტზე 2030 წლის მუნდიალი გაიხსნება: არგენტინაში, პარაგვაისა და ურუგვაიში სამი მატჩი გაიმართება, მერე კი, ტურნირი ესპანეთში, პორტუგალიასა და მაროკოში გაგრძელდება.
შედეგად, გამოდის, რომ მუნდიალი სამ კონტინენტზე ჩატარდება: ევროპაში, აფრიკასა და სამხრეთ ამერიკაში. საინტერესოა ისიც, რომ სამხრეთ ამერიკაში იმ დროისთვის ზამთარი იქნება, ევროპასა და აფრიკაში კი ზაფხული, შესაბამისად, ფეხბურთელებს ამასთანაც ადაპტირება მოუწევთ.
ევროპის 2028 წლის საფეხბურთო ჩემპიონატის მასპინძლობის საკითხი კი უკვე გადაწყვეტილია. თურქეთის ფეხბურთის ფედერაცია ბრძოლას გამოეთიშა, რაც იმას ნიშნავს, რომ დარჩა ერთადერთი ვარიანტი: ევროპის ჩემპიონატს 2028 წელს დიდი ბრიტანეთი და ირლანდია ერთობლივად უმასპინძლებენ.
თურქეთის მიზანია, რომ 2032 წლის ტურნირის მასპინძლობაზე გააკეთოს აქცენტი. საუბარია იმაზე, რომ ევრო 2032-ს თურქეთმა და იტალიამ ერთად უმასპინძლონ.
თურქების თამაშიდან გასვლა უეფამ ოფიციალური განცხადები დაადასტურა: „თურქეთის ფეხბურთის ფედერაცია განაცხად შემოიტანს ევრო 2032-ის ერთობლივ მასპინძლობაზე, ევრო 2028-ის მასპინძლობაზე განაცხადი კი გაუქმდება.“
ევროპის 2028 წლის ჩემპიონატის მასპინძელი ქვეყანა ოფიციალურად მომავალ კვირაში უნდა გამოცხადდეს. „ევრო 2024“ გაისად გერმანიაში გაიმართება.
„ტორინოს“ მცველი საბა საზონოვი ტურინულ დერბიში „იუვენტუსის“ წინააღმდეგ დიდი ალბათობით ვერ ითამაშებს.
21 წლის ფეხბურთელს მოტეხილობა არ აღენიშნება, მაგრამ 7 ოქტომბერს მისი მოედანზე გასვლა ეჭვქვეშაა.
მიუხედავად ამისა, ტურინული კლუბის მთავარი მწვრთნელი ივან იურიჩი იმედოვნებს, რომ ქართველი მცველი გამოჯანმრთელდება, თუნდაც იმ დონეზე, რომ სათადარიგო სკამზე მაინც იყოს. ყველაფერი უახლოეს ორ დღეში გადაწყდება.
საბა საზონოვმა „ტორინოს“ რიგებში ორი მატჩი ჩაატარა. „ვერონასთან“ შეხვედრის დასაწყისში მან კოჭი დაიზიანა და 27-ე წუთზე შეცვალეს.
ეხლა „ნაპოლის“ ამბებზე გადავიდეთ. გუშინ, მარიო რუის აგენტმა მარიო გუფრედიმ გუნდის მთავარი მწვრთნელი რუდი გარსია გააკრიტიკა და ის მისი აგენტის უპატივცემულობაში დაადანაშაულა.
მიმდინარე სეზონში რუი უმეტესად სკამზე ზის, ხოლო მის ნაცვლად ფრანგი სპეციალისტი მატიას ოლივერას ენდობა.
„რუდი გარსია მარიო რუის უპატივცემულოდ ექცევა. ეს უპატივცემულობაა, რადგან ჩვენ ვსაუბრობთ ფეხბურთელზე, რომელიც ბოლო ორი წლის განმავლობაში „სერია A“-ში ერთ-ერთი საუკეთესო მარცხენა მცველი იყო, სპალეტის ფეხბურთში ფუნდამენტური როლი ჰქონდა და ასე მოპყრობა უპატივცემულობაა. მარიომ „უდინეზესთან“ შესანიშნავად ითამაშა, მაგრამ მას შემდეგ მისი უთამაშებლობა ნიშნავს, რომ მწვრთნელს არ სურს მასთან მუშაობა. ზაფხულში გარსიას შეეძლო ეთქვა, რომ არ სურდა მარიო რუი. უბრალოდ, ნახეთ კვარაცხელიას თამაში, როდესაც მარიო რუი მოედანზეა. კვარაცხელია უკეთ თამაშობს, როდესაც ფლანგზე მარიო ჰყავს. შესაძლოა მწვრთნელს არ სურს მსგავსი სტილით თამაში და სხვა სტილის მარცხენა მცველი სურს, მაგრამ მას უპატივცემულოდ ექცევა, სიტყვები არ მაქვს“, – განაცხადა მარიო გუფრედიმ.
„ნაპოლის“ პრეზიდენტმა აურელიო დე ლაურენტისმა კი ვიქტორ ოსიმენის კონტრაქტის შესახებ ისაუბრა:
„ოსიმენი ძლიერია, მასში ეჭვი არ გვეპარება. კონტრაქტზე პრობლემა არ არსებობს და არც არასდროს არსებობდა, დიახ, გაახანგრძლივებს. „ნაპოლიში“ ყველა ყოველთვის კმაყოფილია, პრობლემა მაშინ ჩნდება, როდესაც ნეაპოლიდან მიდიან“, – თქვა დე ლაურენტისმა.
ავტორი
