მსოფლიოს მასშტაბით მოწევის შედეგად 10 ადამიანიდან 1 იღუპება, ნახევარზე მეტი შემთხვევები კი ჩინეთში, ინდოეთში, ამერიკის შეერთებულ შტატებსა და რუსეთში ფიქსირდება. აღნიშნულ ინფორმაციას BBC სამედიცინო ჟურნალ THE LANCET-ში გამოქვეყნებული ახალი კვლევის მიხედვით ავრცელებს.
თამბაქოს კონტროლის პოლიტიკის მიუხედავად, რომელიც წლების განმავლობაში მიმდინარეობს, მოსახლეობის რაოდენობის ზრდასთან ერთად მწეველთა რიცხვიც იზრდება.
მკვლევარების თქმით, თამბაქოს მოხმარებით გამოწვეული სიკვდილიანობის შემთხვევები შესაძლებელია მომავალში კიდევ გაიზარდოს, განსაკუთრებით კი განვითარებად ქვეყნებში, სადაც თამბაქოს მწარმოებელი კომპანიები ახალი ბაზრის ათვისებას აგრესიულად ცდილობენ.
„მიუხედავად იმისა, რომ ნახევარ საუკუნეზე მეტია ცალსახად მტკიცდება, რომ თამბაქო ჯანმრთელობისთვის მავნებელია, დღეს, მსოფლიოში ყოველი 4 მამაკაცი ყოველდღიური მწეველი“,_ამბობს კვლევის უფროსი ავტორი ემანუელა გაკიდოუ.
მისივე თქმით, მწეველთა რიცხვის შემცირების მიზნით თამბაქოზე კონტროლი უნდა გამკაცრდეს.
„მოწევა რჩება ადრეული სიკვდილის და ინვალიდობის გამომწვევ სიდიდით მეორე რისკ ფაქტორად. მისი შემცირების მიზნით, ჩვენ, უნდა გავაძლიეროთ თამბაქოს გავრცელებაზე კონტროლი და დავაწესოთ ჯარიმები“,_ამბობს ის.
როგორც ცნობილია, აღნიშნული კვლევა თამბაქოს მოხმარების შესახებ 1990-2015 წლებში 195 ქვეყანაში ჩატარდა.
კვლევის მიხედვით, 2015 წელს 1 მილიარდი ადამიანი თამბაქოს ყოველდღიურად მოიხმარდა,4 კაციდან 1, ხოლო 20 ქალიდან 1, თამბაქოს მომხმარებელი იყო, 1990 წელს მწეველთა რაოდენობა 870 მილიონს შეადგენდა.
კვლევის მიხედვით, 2015 წელს თამბაქოს მოხმარების შედეგად 6 მილიონზე მეტი ადამიანი დაიღუპა, რაც 1990 წლის მონაცემთან 4.7%-ით მეტია.
The Global Burden of Diseases-ის ცნობით, ზოგიერთ ქვეყნებში თამბაქოზე მაღალი გადასახადების დაწესება, გამაფრთხილებელი შეფუთვები და საგანმანათლებლო პროგრამები, ადამიანებს მოწევისთვის თავის დანებებაში ეხმარება.
გავრცელებული ცნობით, 25 წლიანი პერიოდის განმავლობაში ბრაზილიაში იყო შემთხვევები, როდესაც მწეველთა რაოდენობა კაცებში 29 %-დან 12%-მდე, ხოლო ქალებში 19%-იდან 8%-მდე შემცირდა, თუმცა, ამავე პერიოდში ბანგლადეშში, ინდონეზიასა და ფილიპინებში ცვლილება არ მომხდარა.
ავტორების ცნობით, რუსეთში მწეველთა რაოდენობამ ქალებში 4%-ით მოიმატა და იგივე მაჩვენებელია აფრიკაში.
