ოზურგეთის მუნიციპალიტეტში სოციალურად დაუცველი მრავალი ოჯახია, რომლებიც უამინდობის დროს საფრთხის ქვეშ დგანან _ რადგან ქოხებში ცხოვრობენ და უხვი ნალექის დროს მთელი საცხოვრებელი იტბორება.
“ისედაც არაფერი გაგვაჩნია და რაც გვაქვს, ისიც გადასაყრელი ხდება, როცა წვიმს”, _ ამბობენ სოციალურად დაუცველები.
ფიცრები, მუყაო, ტომრები, პოლიეთილენის პარკები, თუნუქის ფურცლები და უსარგებლო სხვა მრავალი ნივთი სოციალურად დაუცველებისთვის საცხოვრებლების საშენ მასალად არის ქცეული.
ზამთრის დადგომასთან ერთად პრობლემები კიდევ უფრო მწვავდება. ბუნებრივი აირი უმრავლესობისთვის ხელმისაწვდომი არაა. ამას თან ერთვის გაუსაძლისი ყოველდღიურობა: არასრულფასოვანი კვება, სიცივე და უწყლობა.
სოციალურად დაუცველი ოჯახების უმრავლესობა მრავალშვილიანია.
ოზურგეთის მუნიციპალიტეტის სოფელ მერიაში, ე. წ. “გოგორეთის” უბანში მცხოვრები ენვერ ჯოგლიძე და აზა ურუშაძე სოციალურად დაუცველთა სტატუსს ატარებენ. ჰყავთ 5 არასრულწლოვანი შვილი: 15, 13, 11, 9 და 4 წლის. ოჯახში ცხოვრობს, ასევე, პენსიონერი ეთერ ჯოგლიძე.
ხუთი შვილის დედა აზა ურუშაძე “გურია ნიუსს” მათი ოჯახის ყოველდღიურობაზე ესაუბრება:
“მოხუცს თავისი პენსია წამლებში არ ჰყოფნის. დღეს წასული იყო ქალაქში წამლის საყიდლად და 100 ლარის წამლები შეიძინა, რომელიც სამყოფი მაინც არ არის. ვართ სოციალურად დაუცველები, არსად არ ვმუშაობთ. პროდუქტი მაღაზიიდან ნისიად მოგვაქვს და თვის ბოლოს ვიხდით ვალს _ ასე გაგვაქვს სული. სადაც ვცხოვრობთ, ხედავთ, როგორ ავარიულ მდგომარეობაშია _ სახლს სახურავი სულ გადამძვრალი აქვს, ყველა მხრიდან წვიმის წყალი შემოდის _ თავზე გვაწვიმს. ორი ოთახი გვაქვს ნორმალური, მოხუცს კი სულ წვიმაში და სიცივეში ძინავს. კიდევ კარგი, რომ ბავშვები ჯანმრთელები არიან.”.
საუბარში ოჯახის პენსიონერი ერთვება და ამბობს, რომ როცა გაწვიმდება, წყალი “მის ზურგზე გადადის”, რადგან, როგორც გარეთ, ისე წვიმს ოთახში, სადაც ძინავს.
“სიმწრით გაგვაქვს სული”, _ ამბობენ ჯოგლიძეების ოჯახის წევრები.
ანალოგიურ სიტუაციაშია ოზურგეთის მუნიციპალიტეტის სოფელ მერიაში, “ნაღობილევის” უბანში მცხოვრების ჟღერიების ოჯახი.
სოციალურად დაუცველ ირმა და ნიკოლოზ ჟღერიას 4 არასრულწლოვანი შვილი ჰყავთ.
“თვიდან თვემდე ძლივს გაგვაქვს თავი. მთავარია ზეთის, შაქრის და პურის ფული ვიშოვოთ, უმეტესად, ამაზე ვართ დამოკიდებულები. ტანსაცმელს მეორადებს ვეძებეთ და იაფად ვყიდულობთ. სამუშაო არსად არაა. მეუღლე ფიზიკურად უუნაროა, მძიმე ოპერაცია აქვს გადატანილი”, _ ამბობენ ჟღერიები.
მათ ყოველდღიურ მძიმე ყოფას ისიც ემატება, რომ არ აქვთ წყალი და გაზი:
“სასმელ წყალს მეზობლის ჭიდან ვეზიდებით, სარეცხისთვის კი წვიმის წყალს ვაგროვებთ. ზამთარში ყანების პირზე ვეძებეთ შეშას და ისე ვიმარაგებთ _ ასეთია ჩვენი ყოველდღიურობა”, _ ამბობს ირმა ჟღერია.
ოზურგეთის მუნიციპალიტეტის გამგეობის განათლების, ახალგაზრდობის საქმეთა და სოციალური დაცვის სამსახურის უფროსი მაიზერ ცელაძე “გურია ნიუსთან” ამბობს, რომ ოზურგეთის მუნიციპალიტეტის გამგეობა ახორციელებს მრავალშვილიანი ოჯახების დახმარების პროგრამას, რომელიც ითვალისწინებს ” სოციალურად დაუცველი ოჯახების მონაცემთა ერთიან ბაზაში” რეგისტრირებულ 0-დან 57 001-მდე სარეიტინგო ქულის მქონე მრავალშვილიან ოჯახებს (4 და მეტი 18-წლამდე ასაკის ბავშვი) ყოველთვიური მატერიალური დახმარების გაწევას თითოეულ ბავშვზე 15 ლარის ოდენობით.
მისივე თქმით, შესაბამისად, აღნიშნული ოჯახები დახმარებას პროგრამულად იღებენ:
“მერიის ადმინისტრაციულ ერთეულში მცხოვრებ ნიკოლოზ ჟღერიას 4-შვილიან და ენვერ ჯოგლიძის 5-შვილიან ოჯახებს, რომლებიც რეგისტრირებულნი არიან სოციალურად დაუცველი ოჯახების მონაცემთა ერთიან ბაზაში, სხვა სოციალური პროგრამებით გათვალისწინებულ დახმარების თაობაზე აღნიშნულ მოქალაქეებს ჩვენთვის არ მოუმართავთ”, _ ამბობს ცელაძე.
