“მთავრობა უშვებს, რომ შეიძლება იყვნენ პირები, რომელთაც კანონი არ ეხებათ” _ გიგაური

საერთაშორისო გამჭვირვალობა საქართველოს ხელმძღვანელი ეკა გიგაური ფეისბუქის საკუთარ გვერდზე პოსტს აქვეყნებს, სადაც განმარტავს რას ნიშნავს აუდიტის სამსახურის უფროსზე თავდასხმის ინციდენტის ასეთი სახით განვითარება.

“მოკლედ დავწერ, რას ნიშნავს აუდიტის სამსახურის უფროსზე თავდასხმის ინციდენტის ასეთი სახით განვითარება: 1. სახელმწიფო თავისი უმოქმედებით ხელს არ უწყობს დამოუკიდებელი ინსტიტუტების მშენებლობას. ფაქტობრივად, აგზავნის კონკრეტულ გზავნილს ჩვენს სახელმწიფო უწყებებში, რომ არის შემთხვევები როდესაც მათ თავიანთი ვალდებულებები პირნათლად არ უნდა შეასრულონ, რადგან შესაძლოა მათ ამის გამო პრობლემები შეიძლება შეექმნათ.

2. თბილისის მერიაში არის პრობლემები, მათ შორის, კორუფციული და ამაზე საუბრობენ უკვე არა მხოლოდ მედია და არასამთავრობოები, არამედ სახელმწიფო ინსტიტუტებიც თუმცა ამაზე მთავრობა თვალს ხუჭავს. ეს საკითხი განსაკუთრებით პრობლემატურია ადგილობრივი არჩევნების წინ. ამის იგნორირება ნიშნავს იმას, რომ მომავალში მსგავსი ქმედებების გაგრძელებას მწვანე შუქი აქვს.

3. სამართალდამცავებს აქვთ პოლიტიკურ ნეიტრალიტეტთან დაკავშირებული პრობლემები. ჩანს, რომ კონკრეტულ გავლენიან პირებს ხელს არ ახლებენ, არ ასრულებენ კანონით დადგენილ მოთხოვნებს და ზემდგომების ინსტრუქციებს ელოდებიან. ზემდგომი კი შეიძლება საერთოდაც არ იყოს ოფიციალური თანამდებობის პირი.

4. მაშინ, როდესაც აუდიტის სამსახური უმაღლეს შეფასებას იღებს საერთაშორისო დონეზე, სახელმწიფო მზად არის ამ სამსახურის რეპუტაციის დისკრედიტაცია მოახდინოს მხოლოდ იმის გამო, რომ ის ერთ გავლენიან პირს შეეხო.

5. ნარმანიას კანდიდატურის აუდიტის სამსახურის უფროსად განხილვა ნიშნავს იმას, რომ მთავრობას არ უნდა ეფექტური და მოქმედი აუდიტის სამსახური ქონდეთ და მარტივად რომ ვთქვათ, დაცინვაა.

6. მთავრობა უშვებს, რომ შეიძლება იყვნენ პირები, რომელთაც კანონი არ ეხებათ. ეს უფლება მათ მიიღეს არა იმიტომ, რომ რაიმე განსაკუთრებული დამსახურება აქვთ ქვეყნის წინაშე (ამ დროსაც დაუშვებელი იქნებოდა) არამედ ერთადერთი, რაც მათ გააჩნიათ, არის ის, რომ მათ აქვს უფლება პირდაპირ დაურეკონ ივანიშვილს. რაზეც ფარცხალაძე ღიად თავად საუბრობობს. ამ პირებს არ ეხებათ კანონი და შეუძლიათ თავს იმის უფლებაც მისცენ, რომ კონსტიტუციური ორგანოს უფროსს დაესხას თავს, რადგან წინასწარ იცის, რომ მას არ მოჰკითხავენ პასუხს. ხოდა, ეს ყველაფერი არის ძალიან ცუდი და ამ ყველაფერს უფრო სხვა მნიშვნელოვანი უარყოფითი შედეგი მოყვება. თორემ თორდიას კი უმთავრდება ვადა ერთ თვეში,_ წერს გიგაური.