“მთელი ჩემი სიყვარულია” – ფრანჩესკო ტრეჩის “საქართველო”

საქართველოზე შეყვარებულმა იტალიელმა, ფლორენციელმა მკვლევარმა  ფრანჩესკო ტრეჩიმ, ჩვენს ქვეყანას რიგით მესამე წიგნი მოუძღვნა და “საქართველო” დაარქვა.

როგორც ტრეჩი “გურია ნიუსთან” საუბრისას ამბობს, წიგნის მიზანია, რომ იტალიელებს საქართველო გააცნოს.

ტრეჩთან საუბრით ირკვევა, რომ წიგნში მოთხრობილია საქართველოს გამორჩეული მეფეების, მწერლების, ადგილებისა და ტრადიციების შესახებ.

ტრეჩი ჩვენთან საუბრისას იხსენებს, რომ საქართველოს არსებობის შესახებ პირველად,  24 წლის წინ, იტალიური ჟურნალიდან შეიტყო.

“საქართველოს შესახებ პირველად 24 წლის წინ იტალიური ჟურნალიდან შევიტყვე. ჟურნალისტი წერდა, რომ საქართველოს ჰქონდა უძველესი ენა და ანბანი. ასევე ეწერა, რომ ქართველები ძალიან სტუმართმოყვარეები არიან და მას შემდეგ, ძალიან მიყვარს საქართველო. ფლორენციის უნივერსიტეტში ვისწავლე საქართველოს ისტორია და ენა. საქართველოში სამოგზაუროდ კი პირველად,  21 წლის წინ, წავედი, მაშინ ხელისუფლებაში შევარდნაძე იყო”,_ გვეუბნება ტრეჩი.

რაც შეეხება წიგნს, “საქართველო”, ტრეჩი ამბობს, რომ იტალიაში, საზოგადოების დიდმა ნაწილმა საქართველოს შესახებ არაფერი იცის და წიგნის მიზანი, საქართველოს პრეზენტაციაა.

“იტალიაში სამწუხაროდ არავინ იცის საქართველო და ეს არის ძალიან დიდი პრობლემა. დავწერე უკვე მესამე წიგნი საქართველოს შესახებ. ეს ახალი წიგნი არის საქართველოს პრეზენტაცია იტალიელებისთვის. წიგნში გადმოცემულია მთელი ჩემი სიყვარული საქართველოს მიმართ.  წიგნში წარმოდგენილია  მნიშვნელოვანი გმირები და მეფეები.   ფარნავაზი, ფარსმან მეორე, ვახტანგ გორგასალი, აბო თბილელი, ბაგრატი, დავით აღმაშენებელი, თამარ მეფე, გიორგი სააკაძე, ნოე ჟორდანია, ზვიად გამსახურდია, მერაბ კოსტავა. ასევე არის საქართველოს კულტურა. მნიშვნელოვანი მწერლები, ინტელექტუალები, როგორებიც არიან ნიკო ლომოური, იაკობ გოგებაშვილი, ილია ჭავჭავაძე, შოთა რუსთაველი. აქ არის ქართული ანბანი, ქართული საჭმელი, მნიშვნელოვანი და მშვენიერი ქალაქები, როგორიცაა თბილისი, ბათუმი, ქუთაისი, ასევე, იყალთო, ვარძია, ბაგრატის ტაძარი და სხვა. ასევე არის ტრადიციები, ცეკვები”,_ ამბობს ტრეჩი.

ჩვენს კითხვაზე, თუ ვის გამოარჩევდა საქართველოს ისტორიიდან და ყველაზე მეტად რა ადგილები მოსწონს საქართველოში,_ ტრეჩი გვპასუხობს:

_ ჩემი რჩეული მეფე არის აუცილებლად დავით აღმაშენებელი. მან გააერთიანა საქართველო. ეს იყო ძალიან, ძალიან მნიშვნელოვანი საქართველოსთვის. თანამედროვე ისტორიადან ძალიან მნიშვნელოვნები არიან  ნოე ჟორდანია, ზვიად გამსახურდია, მერაბ კოსტავა. რაც შეეხება ჩემს რჩეულ ადგილებს, ბევრი საყვარელი ადგილი მაქვს საქართველოში.  ჩემი რჩეული ადგილებია, თბილისი ალავერდი, ბაგრატის ტაძარი, რაჭა, ბოლნისი. 

ცნობისთვის, წიგნის პრეზენტაცია საქართველოშიც არის დაგეგმილი.

მსგავს თემაზე:

ვინ არის იტალიელი, რომელმაც „საქართველოს ისტორია“ იტალიურად თარგმნა