29 იანვარს თბილისში მომხდარმა ტრაგედიამ მთელი საქართველო შეძრა _ ბუნებრივი აირით ოჯახის ხუთი წევრი გაიგუდა.
ტრაგედიას ემსხვერპლნენ 32 ირაკლი შანიძე, 32 წლის რუსუდან ზაალიშვილი და მათი შვილები: 6 წლის მარიამი, 5 წლის დარეჯანი და 12 წლის დავითი. ისინი თბილისში ხობიდან ახალი გადასულები იყვნენ და ქირით ცხოვრობდნენ.
ამ ტრაგედიას ჟურნალისტი მზეკო ჟვანია სოციალურ ქსელში ეხმაურება. როგორც მისი პოსტიდან ირკვევა, ადგილობრივი ხელისუფლება სამძიმარზე არ მისულა, გარდა საკრებულოს თავმჯდომარისა.
“მთელი ქვეყანა გლოვობდა შანიძეებს, ყველას გული შესტკიოდა ამ მძიმე ტრაგედიაზე და გულწრფელად წევრებივით განიცდიდნენ ერთი ლამაზი ოჯახის ისტორიის დასასრულს…
დღეს, 5 თებერვალს, უკანასკნელ გზაზე გააცილეს სამი ანგელოზი მშობლებთან ერთად, რომლებსაც იმიერში კიდევ სამი პატარა ანგელოზი დახვდა…
უმძიმესია, ვინც იცის მათი ისტორია…
მე, როგორც ერთ–ერთ რიგით ხობელს, ძალიან გამიკვირდა, შემრცხვა და კოვიდვითარების მიუხედავად, ვერ გავამართლე ხობის ადგილობრივი ხელისუფლება და ასევე, რეგიონისაც…
30 იანვრიდან 5 თებერვლის ჩათვლით, ვერც ერთმა (ადგილობრივმა) სახელისუფლებო რგოლის წარმომადგენელმა, როგორ ვერ შეძელით თუნდაც, ერთხელ მაინც მისულიყავით მთელი 8 დღის განმავლობაში ან, უკანასკნელ გზაზე მაინც გაგეცილებინათ ეს ადამიანები და ასე მაინც გამოგეხატათ თუნდაც, ფორმალური თანადგომა და მხარდაჭერა ოჯახისათვის მოვალეობის მოხდის მიზნით?!
სირცხვილი თქვენი, რომ ათი წუთი ვერ გამონახეთ ვერც ერთმა! განა ეს მხოლოდ ამ ოჯახის ტკივილია?! განა ეს მხოლოდ მუნიციპალიტეტის ან, რეგიონის ტკივილია?! მთელი ქვეყანა და თითოეული ემიგრანტი შესძრა ამ ტრაგედიამ, თქვენ კი “ორ ნაბიჯზე” მისვლა ვერ/არ მოახერხეთ…!
ყველაფერს პანდემიით ვერ შეფუთავთ და ყველა იზოლaციაში ვერ იქნებით _ “ტეხავს” რაა! სირცხვილი და თავის მოჭრა!
ეს “საყვედური” არ ეხება მხოლოდ საკრებულოს თავმჯდომარეს, ლევან ქავთარაძეს, რადგან მან მოახერხა და მივიდა სამძიმარზე… მისი პიროვნული და მოქალაქეობრივი, ადამიანური ვალი მოიხადა.
P.S არ ვერჩი არავის, არც პოზიციას და არც ოპოზიციას და თქვენი მდაბიო გონებით, ნუ ამოავლებთ ამ პოსტს პოლიტიკაში!
ზუსტად ვიცი, როგორც ოჯახის, ასევე, ბევრი ხობელის სათქმელი დევს ამ ტექსტში და რადგან ბევრს არ აქვს გარემოება, რომ ხმამაღლა თქვას, მე გადავწყვიტე მეთქვა!” _ წერს ჟურნალისტი.
[sexy_author_bio]
