“მწვანე გურია” _ ეს არის სიღარიბის დაძლევა, ინვესტიციების მოზიდვის ხელშეწყობა…

პროექტის მიზანია გურიის რეგიონში სიღარიბის შესამჩნევად დაძლევა, ინვესტიციების მოზიდვისთვის ხელშეწყობა, სამივე მუნიციპალიტეტისთვის შესაძლებლობის გაძლიერებაში დახმარება.

“მწვანე გურია” ოთხი ძირითადი მიმართულებით მუშაობს:

1) გურიის სამივე მუნიციპალიტეტში ადგილობრივი სამოქმედო ჯგუფების (LAG)  შექმნა, ევროკავშირის “ლიდერის” პრინციპებზე დაყრდნობით;

2) სამივე მუნიციპალიტეტისთვის ადგილობრივი განვითარების სტრატეგიების დოკუმენტის შემუშავება, პრიორიტეტული მიმართულებების გამოვლენით;

3) საგრანტო პროექტების დაფინანსება;

4) ადგილობრივი სამოქალაქო სექტორის გაძლიერება და მოსახლეობის ჩართულობა გადაწყვეტილებების მიღებისას.

სოფლის განვითარება ლიდერის მიდგომით, რომელიც გასული საუკუნის 90-იანი წლებიდან აქტიურად გამოიყენება ევროპის ქვეყნებში, იდეაში წარმოადგენს სოფლის განვითარების ხელშეწყობას საჯარო, კერძო და სამოქალაქო სექტორებს შორის თანამშრომლობით. ამ მიდგომით სოფლის განვითარების მამოძრავებელია ადგილობრივი განვითარების ჯგუფები (LAG)   და სოფლის ადგილობრივი მოსახლეობა, რომელიც უკეთესი ცხოვრებისთვის სწორ გადაწყვეტილებებს იღებს!

პროექტ “მწვანე გურიის” ფარგლებში უკვე გახორციელდა მნიშვნელოვანი აქტივობები. კერძოდ, სამივე მუნიციპალიტეტში ჩამოყალიბდა ადგილობრივი სამოქმედო ჯგუფები (LAG), რომელთა თავმჯდომარეები გასული წლის ზაფხულში აირჩიეს.

და მაინც, რა არის ადგილობრივი სამოქმედო ჯგუფი(LAG)?

ეს არის აქტიურ, მოტივირებულ მოქალაქეთა გაერთიანება, საჯარო, კერძო, სამოქალაქო სექტორის წარმომადგენელთა თუ სხვა დაინტერესებულ მხარეთა  შემადგენლობით და ახდენს სოფლის განვითარების სტრატეგიის დოკუმენტის შემუშავებას და გახორციელებას.

გურიის სამივე მუნიციპალიტეტის ადგილობრივმა ჯგუფებმა უკვე დაასრულეს მუშაობა ადგილობრივი სტრატეგიის დოკუმენტის შექმნაზე და მათში ცალ-ცალკე გაწერილია არსებული გამოწვევები და მათი მოგვარების გზები.

ადგილობრივმა მოსახლეობამ უკეთესად იცის, რა პრობლემები და საჭიროება დგას მათ სოფელში. ამიტომ მათი ხედვა რეგიონის განვითარებასთან დაკავშირებით, უპირველესია, როგორც  ადგილობრივი განვითარების სტრატეგია!

ახლადშექმნილი  LAG-ების უკეთ მუშაობის მიზნით,  პროექტ “მწვანე გურიის ” ფარგლებში,  სამივე მუნიციპალიტეტში ჩატარდა  ტრენინგები სამართლებრივი, ინსტიტუციური და ფინანსური მმართველობის, კერძო და საჯარო თანამშრომლობის , მოლაპარაკების უნარების, ფასილიტაციის, საზოგადოებასთან ურთიერთობის, ადვოკატირებისა და ლობირების შესახებ.   ასევე ჩატარდა: “პროექტების ციკლი და გრანტის მართვა, ფონდების მოძიება, გენდერული მეინსტრიმინგი”, რომელსაც ადგილობრივი LAG-ების ასზე მეტი წარმომადგენელი დაესწრო.

ცნობიერების ასამაღლებელ და თემატური ტრენინიგებს კი  450-მდე ადამიანი დაესწრო და ნებისმიერ მსურველს შეეძლო მონაწილეობა.

ასევე, პროექტის ფარგლებში, კონკურსის გზით, სამივე მუნიციპალიტეტიდან შეირჩა 12 მოქმედი სამოქალაქო-საზოგადოებრივი ორგანიზაცია. მიზანი ამ კონკურსისა, მათი პოვნა და გაძლიერება იყო.

ახლო მომავალში, პროექტის ფარგლებში,  იგეგმება გურიის სამივე მუნიციპალიტეტში საგრანტო პროექტების დაფინანსება და გურიის რეგიონის მარკეტინგისა  და საკომუნიკაციო გეგმის შემუშავება და გახორციელება, რომელიც რეგიონს ტურისტებისთვის უფრო მიმზიდველს გახდის. ადგილობრივთა ცნობიერების ამაღლების მიზნით, კვლავ ჩატარდება თემატური ტრენინგები.

პროექტი “მწვანე გურია ადგილობრივი დემოკრატიისა და სოფლის განვითარების მხარდაჭერა ინკლუზიური და მდგრადი მწვანე ზრდისთვის”, ხორციელდება ევროკავშირის ფინანსური მხარდაჭერით, სოფლისა და სოფლის მეურნეობის განვითარების ევროპის სამეზობლო პროგრამის ENPARD IV ფარგლებში. პროექტს ახორციელებს CENN,  ახალგაზრდა პედაგოგთა კავშირთან, დემოკრატიის ინსტიტუტთან და ქედის ადგილობრივ სამოქმედო  ჯგუფთან (LAG) თანამშრომლობით.