ოზურგეთში კოვიდინფიცირების 65 ახალი შემთხვევა დაფიქსირდა. ამის შესახებ “გურია ნიუსს” ოზურგეთის საზოგადოებრივი ჯანდაცვის ცენტრის ეპიდემიოლოგმა, ელზა სიმონიშვილმა განუცხადა.
სიმონიშვილის თქმით, ოზურგეთში დადებითი შემთხვევების რაოდენობა მატულობს. ინფიცირების შემთხვევები კი განსაკუთრებით სასწავლო დაწესებულებებში ფიქსირდება.
“დადებითი შემთხვევების რაოდენობა მატულობს. ეს დამახასიათებელია ზოგადად პანდემიისთვის. ოფიციალურად მეხუთე ტალღაა გამოცხადებული. ძალიან საყურაღებოა, ის რომ ინფიცირების შემთხვევები ძირითადად სკოლებისა და ბაღების აღსაზრდელებსა და პერსონალში დაფიქსირდა.
ჩვენი რეკომენდაციით სრულად იზოლირებულ რეჟიმზეა გადაყვანილი ცხემლისხიდის ბავშვთა ბაღი, რაც შეეხება ზოგად საგანმანათლებლო სკოლებს, ჰიბრიდული, წერტილოვანი შეზღუდვები გვაქვს რამდენიმე სკოლაში. დღეის მდგომარეობით, ესაა შემოქმედი, ბოხვაური, მერია, ციხისფერდი, მაკვანეთი, კვირიკეთი, თხინვალი და ასევე ქალაქის პირველი და მეორე საჯარო სკოლები. ეს დაკავშირებულია მობილობასთან და აგრეთვე იმასთან, რომ ოჯახური კლასტერები მაინც წინა პლანზეა, დღეის მდგომარეობით. რეგულაციების წესების დაცვა რატომღაც უჭირს მოსახლეობას. რაც შეეხება ვაქცინაციის ტემპებს, სასურველია, რომ იყოს უფრო მზარდი, მაგრამ ჯერჯერობით ვერ დავიკვეხნით აქტიურობით”,_ ამბობს სიმონიშვილი.
სულ ოზურგეთში დაფიქსირებულია კოვიდინფიცირების 8278 შემთხვევა, გამოჯანმრთელებულია 7458 პაციენტი, გარდაცვლილია 78.
