ევროპარლამენტარმა, რასა იუკნევიჩიენემ სინდისის პატიმარი, მზია ამაღლობელი სახაროვის პრემიაზე წარადგინა.
“ჟურნალისტები, რომლებიც თავისუფლებისთვის იბრძვიან, ევროპული ღირებულებების ნამდვილი სიმბოლოები გახდნენ. სწორედ ამას წარმოადგენს სახაროვის პრემია. მზია ამაღლობელისა და ქართველი ხალხის კანდიდატურა ყველა მთავარი 5 პოლიტიკური ჯგუფის მიერ იქნა წარმოდგენილი. ეს ნიშნავს, რომ ყველა მათგანი მხარს უჭერს მზიას. მხოლოდ ორ დღეზე ნაკლებ დროში, ჩვენს ნომინაციას უკვე 66-მა წევრმა დაუჭირა მხარი.
მალე წელი იქნება, მას შემდეგ, რაც ქართველები ქუჩაში ევროპული მომავლისთვის, ევროკავშირის დროშებით იბრძვიან. ისინი იმავე ბრძოლას იბრძვიან, რასაც უკრაინელები…
ჩვენი წამოყენებული კანდიდატურა სიგნალია მთელი სამხრეთ კავკასიის რეგიონისთვის, რომელსაც სახაროვის პრემიის ლაურეატი ჯერ არ ჰყოლია. ეს წინადადება მნიშვნელოვანია მთელი შავი ზღვის რეგიონისთვის. ჩვენთვის, ევროპისთვის, ამ რეგიონში დემოკრატიის განვითარება უმნიშვნელოვანესია. მზია ამაღლობელისა და საქართველოს პროდემოკრატიული საპროტესტო მოძრაობისთვის სახაროვის პრემია სიმბოლურ ჯილდოზე მეტი იქნება. საქართველოს მსგავსი ქვეყნისთვის ამას ნამდვილი ცვლილებების მოხდენა შეუძლია. ჩვენთვის, ევროკავშირისთვის კი შეიძლება ეს ის საჭირო მუხტი გახდეს, რათა საბოლოოდ გავაკეთოთ მეტი იმის დასაცავად, რისთვისაც ისინი და ჩვენ ვიბრძვით“, – თქვა ევროპარლამენტარმა.
სახაროვის პრემიაზე მზია ამაღლობელთან ერთად კიდევ 7 ადამიანია წარდგენილი.
ჯილდო ყოველწლიურად გაიცემა მათთვის, ვინც განსაკუთრებული წვლილი შეიტანა ადამიანის უფლებების, დემოკრატიის, კანონის უზენაესობის, საერთაშორისო სამართლისა და უმცირესობების უფლებების დაცვის განვითარებაში.
