ოზურგეთის მუნიციპალიტეტის სოფელ გურიანთასთან, ვაშნარის ციხე-ქალაქის სიახლოვეს, შავი ზღვიდან 20-კილომეტრიან ზოლში, კომპანია „პოლატის“ უმძლავრესი ექსკავატორები მუშაობენ.
მდინარე ნატანების ნაკალაპოტარ უზარმაზარ ფართობზე, ახლა 11 ექსკავატორი ქვა-ღორღს იღებს. ხოლო ძველი კალაპოტის (ამ ადგილზე მდინარე ერთგვარ დელტას ქმნიდა) ერთ ზოლში, ნადირივით მომწყვდეულ მდინარეში, დგას ექსკავატორი კოვშით უსწრაფესად ტრიალებს. ფსკერს, ლამის, ქვესკნელში მიჰყვება _ ესაა გურიის მდინარეებზე არსებული რეალობა. ათეულობით სატვირთოს ქვა-ღორღი ავტობანის (გრიგოლეთი-ურეკის მონაკვეთი) მშენებლობაზე მიაქვს.
ქვეყანას სჭირდება აღმშენებლობა-გზებს დაგება და კიდევ ბევრი რამ, თუმცა მდინაერები არ გვჭირდება? ადგილობრივები გაყუჩული გვეკითხებიან: პოლიგონია თუ კარიერი? ვის აქვს მდინარის კალაპოტის აბსოლუტურად შეცვლის უფლება? რის საფასურად უნდა აშენდეს ავტომაგისტრალი? როცა შესაძლებელია, ეკოლოგიური ზიანის გარეშეც, მოხდეს წიაღის მოპოვება, რატომ არიან ასე ვანდალურად შესეული მდინარეების ხეობებს და კალაპოტებს? რატომ არსებობს უზარმაზარი, დაუფარავი ეჭვი, რომ ბევრად მეტი ქვა-ღორღი, ინერტული მასალა გადის აქედან, ვიდრე ეს ავტობანს სჭირდება?
სოფელ მერიაში, მდინარე ნატანების კარიერის მიმართულებით, ჩასასვლელი გზის დასაწყისში ერთი უბადრუკი კარავი დგას. როგორც ადგილობრივები გვეუბნებიან, ეს „მწყემსის კარავია“, შიგ მყოფი კი გასული ავტომანქანების აღრიცხვას აწარმოებს, რომ არ გამოეპაროთ რამდენი რეისი გავიდა. თუმცა კარავის ბინადარი, ადგილობრივი მცხოვრები ზაზა დანელია, ( ქართულ ენაზე მოსაუბრე, ერთადერთი ეს კაცი ვნახეთ) გვეუბნება, რომ ეს ინფორმაცია ზუსტი არ არის:
_ჩვენ აქ უსაფრთხოების წესებს ვიცავთ. როცა დიდი სატვირთოები რიყიდან ამოდიან, მოძრაობა რომ არ შეფერხდეს ან რაიმე რომ არ მოხდეს, ვიცავთ საგზაო წესებს. აღრიცხვა კი, იქვე , კარიერზე ხდება. თუმცა, ჩვენ „აღმრიცხველი“ კარიერის მიდამოებში არ გვინახავს…
არასამთავრობო ორგანიზაცია „ეკოს“ ხელმძღვანელი, ირმა გორდელაძე „გურია ნიუსთან“ ამბობს, რომ „სასარგებლო წიაღისეულის მოპოვების ლიცენზიის გაცემის წესისა და პირობების შესახებ დებულების დამტკიცების თაობაზე“ საქართველოს მთავრობის 2005 წლის 11 აგვისტოს №136 დადგენილებაში, ცვლილების შეტანის შესახებ“, საქართველოს მთავრობის დადგენილების პროექტს, ხელი დეპარტამენტის თავმჯდომარემ, ირაკლი ქარსელაძემ მოაწერა და მსვლელობაც მიეცა.
_ცვლილება ეხება ლიცენზიის გარეშე, ზღვიდან 20 კმ მაძილზე ინერტული მასალის მოპოვების ნებართვის მიცემას, რაც მანამდე დაუშვებელი იყო. აღნიშნული ცვლილების დაშვება , მთავრობის მეთაურის, ირაკლის ღარიბაშვილის მიერ მოხდა. ანუ ახლა ლიცენზიის გარეშე, სასწრაფოდ ხდება ინერტული მასალის მოპოვება. ხედავთ, როგორ ჩქარობენ. აშენდეს ავტობანი და მდინარეების კალაპოტები განადგურდეს? თავმოყვარე ქვეყანა კალაპოტების და ხეობების ასე აოხრებას დაუშვებს? ვინ ამოწმებს, ულიცენზიოდ მოპოვება რა გეგმით ხდება? ამხელა სიღრმეში ასე ჩასვლა, მოპოვების კრიტერიუმების ყველანაირი დარღვევა, ჰგავს თუ არა კრიმინალს? _ ამბობს გორდელაძე.
ჩვენ ვიკვლევთ ამ საკითხის ირგვლივ არსებულ ვითარებას და „გურია ნიუსი“ მალე მოგაწვდით ვრცელ მასალას.
[sexy_author_bio]
