“პუბლიკას” ინფორმაციით, “ნაომარი ქალაქი რუსული მმართველობის წინააღმდეგ”- დღეს, 18:00 საათზე გორის საკრებულოს შენობასთან აქცია დაანონსდა.
„მოგიწოდებთ ყველა პოლიტიკური პარტიის წარმომადგენლებს, როგორც ადგილობრივს, ისე ცენტრალურს, სამოქალაქო საზოგადოებას, არასამთავრობო სექტორს, აქტივისტებს, დღეს ყველას გელოდებით გორში! ეს არ არის მხოლოდ გორის სირცხვილი, ეს ყველაფერი საქართველის ღირსებაზე გადის!“ – წერს აქციის ორგანიზატორი.
გორის საკრებულოს თავმჯდომარემ, დავით რაზმაძემ The New York Times-თან ინტერვიუში 2008 წლის ომზე ისაუბრა და თქვა: „რუსები აქ მოვიდნენ, როგორც შვიდობისმყოფელები და მადლობა ღმერთს, რომ შემოვიდნენ, რადგან მიშას ხულიგნები მთელ ქალაქს ძარცვავდნენ. მათ მღვდლის მანქანაც კი მოიპარეს, გჯერათ?! რუსები რომ არ მოსულიყვნენ, ვინ იცის, კიდევ რამდენ ზიანს მოგვაყენებდნენ“.
დღეს რაზმაძემ აღნიშნულს სიცრუე უწოდა და თქვა, რომ ცხოვრებაში რუსეთზე დადებითი არ უთქვამს:
„იმ მომენტში, რაც არის აღნიშნული – „სააკაშვილის ხულიგნები”, არანაირი მაგის მსგავსი არ მიხსენებია. მე ვახსენე, რომ სააკაშვილის ხელისუფლებამ მიატოვა ქალაქი და ის ნაძირალა კაცი, რომელმაც ჩემგან ინტერვიუ აიღო, აღმოჩნდა, ფაქტობრივად, სააკაშვილისა და მაგ ნაძირლების ადვოკატი. თუ ჩემი თანაგუნდელები დამიდგებიან გვერდში, ვუჩივლებ“, – თქვა გორის საკრებულოს თავმჯდომარემ, დავით რაზმაძემ „ტვ პირველთან“ კომენტარში.
