„ნაპოლის“ კრიზისი გრძელდება და ხვიჩა კვარაცხელიას კლუბი იტალიის პირველობაზე კიდევ ერთხელ დამარცხდა. ამჯერად საკუთარ მინდორზე „ემპოლისთან“ – 0:1.
საინტერესოა, რომ რუდი გარსიამ ქართველი ძირითად შემადგენლობაში არ დააყენა, რაც მოულოდნელი გადაწყვეტილება აღმოჩნდა.
ფრანგმა სპეციალისტმა ამის შესახებ მატჩამდე ისაუბრა.
„ძირითადი შემადგენლობიდან კვარაცხელიას გამორიცხვა? ეს ცუდი სიტყვაა. უბრალოდ, ეს იმისთვის გავაკეთე, რომ კვარამ ამოისუნთქოს და მეორე ტაიმში განსხვავება მოახდინოს. გვჭირდებოდა ახალი ძალები. გოლები უნდა გავიტანოთ, საჯარიმოში რასპადორის და სიმეონეს ერთად ყოფნა კი პლუსია. 4-3-3 სქემა შეიძლება დღესაც გამოვიყენოთ, მაგრამ მთავარია, მოვიგოთ. დიდი ხანია სახლში არ მოგვიგია და ეს არის დამატებითი მოტივაცია, რომ ჩვენი გულშემატკივარი გავახაროთ. გვინდა გამარჯვებისთვის ყველაფერი გავაკეთოთ“, – განაცხადა რუდი გარსიამ.
შემდეგ თამაში იყო. ქართველის გარეშე „ნაპოლის“ ფეხბურთი ერთფეროვანი იყო. პირველ ტაიმში მხოლოდ ერთი საგოლე მომენტი შექმნეს, როცა მატეო პოლიტანოს „ემპოლის“ კარის დარაჯმა ეტრიტ ბერიშამ აჯობა.
მეორე ნახევრის დასაწყისში რუდი გარსია მიხვდა, რომ შეცდა და კვარაცხელია თამაშში ჩართო, რამაც მისი გუნდი უფრო აქტიური გახდა. ხვიჩას კარგი გადაცემით იესპერ ლინდსტრომს შეეძლო გატანა, თუმცა მეკარემ მოიგერია დარტყმა, მერე უკვე ხვიჩას შეექმნა ორი რეალური საგოლე შანსი. სამწუხაროა, რომ ვერცერთი გამოიყენა. ორჯერვე მარცხენა ფეხით დაარტყა და ორჯერვე მეკარემ აჯობა.
ამის შემდეგ კი… გამოუყენებელი მომენტიდან ერთ წუთში ვიქტორ კოვალენკომ გაიტანა გოლი და „ნაპოლი“ უქულოდ დარჩა – 0:1.
იტალიურ მედიაში ქართველს შემდეგი შეფასებები ერგო:
Tuttonapoli – 6 ქულა: “შევიდა და ცდილობს თავისი თამაშით მეტოქის დაცვა შეარყიოს. ბერიშამ მის წინააღმდეგ სასწაული მოახდინა”.
Calcionapoli1926 – 6 ქულა: “თამაში შეცვალა. ბერიშამ გოლი ორჯერ წაართვა”.
Calcio.oasport – 5.5 ქულა: “ცდილობს ფლანგიდან ბზინვარებას, მაგრამ ბოლოს ბერიშამ ფეხით მისი საგოლე დარტყმა მოიგერია. ეს გამოუყენებელი მომენტი კი ძალიან იწონის იმის გათვალისწინებით, რომ კოვალენკომ მალევე გაიტანა”.
Tuttomercatoweb – 6.5 ქულა: “40 წუთში მან უფრო მეტი ხიფათი შექმნა, ვიდრე მისმა ყველა თანაგუნდელმა ერთად. მხოლოდ ბერიშას სასწაულის გამო ვერ გაიტანა გოლი. ერთადერთი შეკითხვა არსებობს: რატომ არ იყო მოედანზე პირველივე წუთიდან?”
Calciomercato – 5.5 ქულა: “რაღაცით მეტი გააკეთა თანაგუნდელებისგან, 2-3 შანსი შექმნა არაფრისგან, მაგრამ 89-ე წუთზე ბერიშას ვერ აჯობა”.
Numero-diez – 6 ქულა: “მისი შესვლით ნაპოლი არაპროგნოზირებადობას იძენს. ფლანგზე ადვილად თამაშობს, მაგრამ გავლენას მაინც ვერ ახდენს”.
გუშინ, მოგვიანებით, იტალიურ მედიაში გავრცელდა ინფორმაცია რომ რუდი გარსიას „ნაპოლიდან“ გათავისუფლება ემუქრება.
„ემპოლისთან“ მარცხი, აურელიო დე ლაურენტისისთვის მოთმინების ბოლო წვეთი გამოდგა. დე ლაურენტისმა სტადიონი „ემპოლის“ გოლისთანავე დატოვა – ის მატჩის დასრულებას არც დაელოდა, რაც ბევრ რამეზე მიანიშნებს. სხვათა შორის, დე ლაურენტისი მატჩს ფაბიო კანავაროსთან ერთად ესწრებოდა, რომელიც ტრიბუნაზე მის გვერდით იჯდა.
იტალიური მედია გარსიას სავარაუდოდ შემცვლელთა შორის ამ დროისთვის სამ კანდიდატს ასახელებს: ერთი სწორედ კანავაროა, რომელიც ნეაპოლელია და ამჟამად უმუშევარია. არის კიდევ ორი ვარიანტი: „ნაპოლის“ ყოფილი მწვრთნელი ვალტერ მაცარი და იგორ ტუდორი.
ამ დღეებში სანაკრებო პაუზა იწყება და „ნაპოლის“ მომდევნო მატჩამდე 2 კვირაა, შესაძლოა, გარსიას გასათავისუფლებლად იდეალური დროც იყოს. ყველაფერი უახლოეს ხანში გაირკვევა.
ავტორი
