გუშინ, იტალიურმა გამოცემამ „La Repubblica“ საინტერესო ინფორმაცია გაავრცელა. აღმოჩნდა, რომ „ნაპოლის“ პრეზიდენტი აურელიო დე ლაურენტისი, მიმდინარე წლის ზაფხულში ხვიჩა კვარაცხელიასა და ვიქტორ ოსიმენის გაყიდვისაგან თავს მაქსიმალურად შეიკავებს, მაგრამ ამ ორი მოთამაშის სატრანსფერო ღირებულება მაინც განსაზღვრა.
ლაურენტისი ქართველსა და ნიგერიელსმხოლოდ იმ შემთხვევაში შეელევა, თუ ძალიან სარფიან წინადადებას მიიღებს. ნეაპოლური კლუბი ოსიმენს მინიმუმ 120 მილიონ ევროდ შეელევა, ხოლო კვარაცხელიასთან განშორება 80 მილიონ ევროზე ნაკლებად მოსალოდნელი არაა.
იტალიელი ჟურნალისტების მტკიცებით, ქართველის „ნაპოლიდან“ მომავალ ზაფხულს წასვლა თითქმის გამორიცხულია. აქტიურად საუბრობენ ახალ კონტრაქტზე, რომელსაც ხვიჩა ზაფხულში გააფორმებს: ხელშეკრულებას 2028 წლამდე გაახანგრძლივებს და მისი ხელფასი გაორმაგდება 1.2 მილიონი ევროდან 2.4 მილიონამდე.
გუშინ, იტალიელმა ჟურნალისტმა მასიმო კაპუტიმ „ნაპოლის“ შესახებ ისაუბრა:
„ნაპოლის“ მხოლოდ თამაშის კარგი ხარისხი არ აქვს, ძლიერი მოთამაშეებიც ჰყავს. კვარაცხელია შარშანდელი სეზონის ინსინიეზე ათჯერ ძლიერია. „ნაპოლიმ“ შესანიშნავი ფეხბურთელები იყიდა და გასულ სეზონთან შედარებით გაწეული სამუშაოთი გაუმჯობესდა“.
გუშინ, კიდევ ერთმა იტალიელმა ჟურნალისტმა პაოლო ბარჯიჯამ გაავრცელა ინფორმაცია, თუ რა რაოდენობის ბონუსებს მიიღებენ „ნაპოლის“ ფეხბურთელები იტალიის ჩემპიონატის მოგებისა და ჩემპიონთა ლიგაზე მინიმუმ ნახევარფინალში გასვლის შემთხვევაში.
„ნაპოლისთვის“ იტალიის ჩემპიონობის მოპოვებისა და ჩემპიონთა ლიგის ნახევარფინალში გასვლისთვის მინიმალური ჯილდო დაწესდა: 5 მილიონი ევრო თითოეულ მიღწევაზე, რომელიც 25 ფეხბურთელზე განაწილდება. პრეზიდენტმა აურელიო დე ლაურენტისმა კაპიტან ჯოვანი დი ლორენცოს შეხვედრაზე ეს დაპირება მისცა“, – განაცხადა პაოლო ბარჯიჯამ.
გუშინ, „პარმას“ ყოფილმა სპორტულმა დირექტორმა ენრიკო ფედელემ „ნაპოლის“ მთავარ მწვრთნელ ლუჩანო სპალეტის გარკვეული რჩევა მისცა.
„მე რომ სპალეტი ვიყო, ჩემპიონობის მოგებისთანავე „ნაპოლის“ დავტოვებდი, რადგან ეს კურთხევა იქნებოდა. სპალეტიმ უნდა დატოვოს კვალი და თუ მომდევნო სეზონშიც ვერ მოახერხებს იმას, რასაც ახლა გუნდთან ერთად აკეთებს, მაშინ „ნაპოლიდან“ წავა, როგორც დამარცხებული და არა, როგორც გამარჯვებული. ამიტომ, მის ადგილას ჩემპიონობის შემდეგ წავიდოდი“, – განაცხადა ენრიკე ფედელემ.
მიმდინარე წლის თებერვალში, საქართველოს საკალათბურთო ნაკრები ორ მნიშვნელოვან შეხვედრას ჩაატარებს. მსოფლიოს მომავალი პირველობის საკვალიფიკაციო ეტაპზე, 23 თებერვალს სტუმრად ნიდერლანდებს დაუპირისპირდება, 26 თებერვალს კი თბილისში ისლანდიას უმასპინძლებს. ამ ორ შეხვედრაში წარმატების შემთხვევაში, საქართველოს ეროვნული გუნდი, პირველად თავის ისტორიაში მსოფლიო ჩემპიონატის ფინალურ სტადიაზე იასპარეზებს.
გუშინ ცნობილი გახდა რომ საქართველოს ნაკრებს ორივე თამაშში იტალიური „ვირტუსის“ თავდამსხმელი თორნიკე შენგელია დაეხმარება.
თორნიკე ნაკრებს 22 თებერვალს შემოუერთდება, 23-ში ნიდერლანდებთან ითამაშებს, შემდეგ ისევ იტალიაში დაბრუნდება, რათა „ვირტუსის“ მაისურით ევროლიგაში იასპარეზოს, 25-ში კი თბილისში ჩამოვა და 26-ში ისლანდიასთანაც მოედანზე იქნება.
30 წლის ქართველმა ჩოგბურთელმა ნიკოლოზ ბასილაშვილმა საფრანგეთის ქალაქ მონპელიეში მიმდინარე ტურნირზე პირველი გამარჯვება იზეიმა და მერვედფინალში გავიდა.
ბასილაშვილი ტურნირის პირველ წრეში ფრანგ კონსტანტ ლესტიენს გაეჯიბრა და 6:7 (3:7), 7:5, 6:2 იმარჯვა. საქართველოს პირველი ჩოგანი მეტოქეს კლასში აშკარად აღემატებოდა. მატჩი ორსაათნახევარი გაგრძელდა.
ავტორი
