გუშინ იტალიურ მასმედიაში საინტერესო ინფორმაცია გავრცელდა – „ნაპოლის“ მფლობელი და პრეზიდენტი აურელიო დე ლაურენტისი ეჭვმიტანილია სატრანსფერო დოკუმენტაციის გაყალბებაში.
საქმე ეხება ფრანგული „ლილიდან“ ნიგერიელი თავდამსხმელი ვიქტორ ოსიმენის ტრანსფერს, რომელიც 2020 წლის ზაფხულში განხორციელდა. ეჭვია, რომ სატრანსფერო თანხა შემცირებულია გადასახადის დაწევის მიზნით.
საგადასახადო სამსახურმა ჩხრეკა ჩაატარა ყველა იმ ობიექტში, რომელიც დე ლაურენტისის სახელს უკავშირდება, ასევე, „ლილის“ ოფისში.
გუშინვე დიდ სკანდალში გაეხვა ესპანეთის საფეხბურთო ჩემპიონატი. ცნობილი გახდა, რომ ესპანეთის პოლიციამ დააკავა კრიმინალური ორგანიზაციის წევრები, რომლებიც RFEF-ს ეგიდით გამართულ მატჩებში და ასევე გიბრალტარის ეროვნულ ლიგაში გარიგებულ თამაშებში იღებდნენ მონაწილეობას.
გამოცემა „Marca“-ს ინფორმაციით, ესპანელმა სამართალდამცველებმა ჩატარებული სპეცოპერაციის შედეგად ქვეყნის ოთხ პროვინციაში, ბადახოსში, სევილიაში, კადისსა და ალმერიაში 10 ადამიანი დააკავეს, რომელთაც ბრალად კორუფცია და გარიგებულ თამაშებში მონაწილეობა ედებათ.
საგამოძიებო ორგანოს მტკიცებით, დანაშაულებრივი ორგანიზაცია 2021 წლის მაისიდან მოქმედებდა და ის აზარტული თამაშების რეგულირების გენერალურმა დირექტორატმა, ესპანეთის საფეხბურთო ჩემპიონატის მესამე დივიზიონის ერთ-ერთ მატჩზე აღმოაჩინა, როდესაც ფსონების საეჭვო რაოდენობა და მიმართულება დაფიქსირდა.
გუშინ, „ნაპოლის“ ოფიციალური რადიოს, „Kiss Kiss Napoli“-ს დირექტორმა, ვალტერ დე მაჯიომ კლუბის სამომავლო გეგმებზე ილაპარაკა და ხვიჩა კვარაცხელიას თემასაც შეეხო.
„მინდა, „ნაპოლის“ გულშემატკივრებს სიახლე შევატყობინო. როგორც გავიგე, აძური ჯოვანი სიმეონეს აკვირდება, მაგრამ არ მგონია, ამან ოსიმენის დარჩენა შეუძლებელი გახადოს და საქმე როტაციასთან გვექნება. ამასთან, „ნაპოლი“ დარწმუნებულია, რომ ხვიჩა კვარაცხელია უფრო მეტ გოლს გაიტანს, ვიდრე გასულ სეზონში ინსინიემ გაიტანა“.
გუშინ, ფიფას საბჭოს ბიურომ რუსეთის ჩემპიონატში მოთამაშე ლეგიონერებს კლუბების დროებით დატოვების ნებართვა გაუხანგრძლივა. უცხოელ ფეხბურთელებს და მწვრთნელებს უფლება ექნებათ, 2023 წლის 30 ივნისამდე შეაჩერონ სამუშაო კონტრაქტი.
ფიფას წინა გადაწყვეტილებით, რომელიც ამა წლის 7 მარტს იყო მიღებული, ლეგიონერებს კონტრაქტის შეჩერება 2022 წლის 30 ივნისამდე შეეძლოთ.
რუსეთის პრემიერლიგაში ბოლო დღეებში ორი ქართველი ფეხბურთელი დაბრუნდა. საუბარი ლუკა გაგნიძესა (მოსკოვის „დინამო“) და ლუკა წულუკიძეზეა („ურალი“). ახლა ამ მოთამაშეებს შეუძლიათ კონტრაქტები შეაჩერონ და ახალი გუნდი თავისუფლად მოძებნონ.
გამოცემა „Calciomercato“-ს ცნობით, „მანჩესტერ იუნაიტედის“ შემტევ კრიშტიანო რონალდოს „იუვენტუსში“ დაბრუნება სურს. ფეხბურთელის აგენტმა ჟორჟე მენდეშმა ტურინულ კლუბს უკვე მიმართა და პორტუგალიელის ყიდვა შესთავაზა. მან „იუვეს“ უფროსობას უთხრა, რომ კრიშტიანო ამ იტალიური გუნდის დატოვებას ნანობს. ამასთან, რონალდო თანახმაა ხელფასი შეუმცირდეს, რათა „იუვენტუსში“ დაბრუნდეს.
მოსკოვის „სპარტაკისა“ და საბჭოთა კავშირის ნაკრების ყოფილი კარის დარაჯი, ანზორ კავაზაშვილი კი პოლონეთის ფეხბურთის ფედერაციის იმ გადაწყვეტილებას ეხმაურება, რაც მაჩეი რიბუსის ეროვნული ნაკრებიდან მოკვეთას გულისხმობს.
მიზეზი 32 წლის პოლონელი ფეხბურთელის გადაწყვეტილებაა, რომლის მიხედვითაც რიბუსმა უკრაინაში საომარი მოქმედებების დაწყების შემდეგ მოსკოვის „სპარტაკი“ არ დატოვა. ამის გამო, პოლონეთის ფეხბურთის ფედერაციამ ის ეროვნული ნაკრებიდან გარიცხა.
„თუ ეს გადაწყვეტილება პოლონეთის ფეხბურთის ფედერაციამ მიიღო, მაშინ ეჭვი არ მეპარება, რომ ამ უწყებაში ყველა ოფიციალური პირი გაგიჟდა. თუმცა, გასაკვირი არაფერია, რადგან ფიფაშიც და უეფაშიც იგივე პიროვნებები არიან. ისინი ღიმილით გველაპარაკებიან, მაგრამ ზურგს უკან ჩვენთვის საწინააღმდეგო გადაწყვეტილებებს იღებენ. პოლიტიკა საშინელებაა და როდესაც სპორტში პოლიტიკაც ერევა, ამას კარგი არაფერი მოაქვს. პოლონელი მაღალჩინოსნები სწორედ ამას ცდილობენ.
რიბუსს სასამართლოში თავისი უფლებების დაცვა ნამდვილად არ სჭირდება. ის 32 წლისაა, რის გამოც პოლონეთის ნაკრებში მისი კარიერა უკვე ვარდნის გზაზეა, მით უმეტეს მაშინ, როდესაც მისი ქვეყნის ნაკრების ხელმძღვანელები ფსონებს უკვე ახალგაზრდა ფეხბურთელებზე დებენ. დაე, რიბუსმა ყურადღება „სპარტაკზე“ გაამახვილოს, რაზე უნდა ინერვიულოს? წლების განმავლობაში, რუსეთის ჩემპიონატში თამაშის დროს მან დიდი ფული გამოიმუშავა, რაც აბსოლუტურად საკმარისია იმისთვის, რომ კარიერის ბოლოს პოლონეთში წავიდეს და მშვიდად იცხოვროს, თუ რა თქმა უნდა მის მიმართ რუსოფობიების მხრიდან რაიმე სახის დევნა არ იქნება“, – განაცხადა ანზორ კავაზაშვილმა.
ავტორი
