გუშინ ჟურნალისტმა ანტონიო კორბომ იტალიურ მასმედიასთან „ნაპოლის“ შესახებ ისაუბრა და საინტერესო მოსაზრებაც გამოთქვა.
„ნაპოლის“ წარმატებაში ყველას დამსახურებაა, პირველ რიგში სპალეტის, მაგრამ არ უნდა დავივიწყოთ ფიზმომზადების მწვრთნელების, მასაჟისტების, ჯუნტოლის დამსახურება, რომელიც მსოფლიოს სხვა კუთხეში წავიდა და უცნობი კვარაცხელია იპოვა, რომელიც სამი ლირა ღირდა. მან ასევე შეიძინა კიმი, მიუხედავად იმისა, რომ სპალეტის კულიბალის შენარჩუნება სურდა. „ნაპოლიმ“ გახსნა გამარჯვებების ეტაპი და თუ ყველაფერს სწორად მართავენ, 3-4 წელი შეუძლია ეს დონე შეინარჩუნოს“, – განაცხადა ანტონიო კორბომ.
„ნაპოლისა“ და „იუვენტუსი“ ყოფილმა გენერალურმა დირექტორმა ლუჩანო მოჯიმ კი გუშინ განაცხადა, რომ მისთვის გაუგებარია ხვიჩა კვარაცხელია ცნობილმა ევროპულმა კლუბებმა როგორ ვერ შეამჩნიეს და მისთვის არ იბრძოლეს.
„ლუჩანო სპალეტი ქებას იმსახურებს, მაგრამ ჩემი აზრით, მას ძალიან კარგი შემადგენლობა ჰყავს. ოთხი ფეხბურთელია, ვინც განსხვავებას ქმნის, რომლებიც ფუნდამენტური არიან „ნაპოლის“ წარმატებაში.
ვგულისხმობ ლობოტკას, ანგისას, ოსიმენსა და კვარაცხელიას. კამერუნელის და სლოვაკის წყალობით გუნდი სწრაფად თამაშობს, ხოლო თავდამსხმელები განსხვავებას ქმნიან. ხვიჩა კვარაცხელიას საკითხი ჩემთვის გამოცანად რჩება: როგორ არის შესაძლებელი, რომ გრანდები ასეთ ფეხბურთელს არ იცნობდნენ და ყველაფერი არ გააკეთეს მის შესაძენად?“ – განაცხადა ლუჩანო მოჯიმ.
გუშინვე, ცნობილმა იტალიელმა ფეხბურთელმა, 2006 წლის მსოფლიოს ჩემპიონმა კრისტიან ძაკარდომ გამოცემასთან „Gazzetta Dello Sport“ ხვიჩა კვარაცხელიას შესახებ ისაუბრა.
„მე ვიყავი შუამავალი ტრანსფერის ოპერაციაში, რომელიც თითქმის სამი წლის წინ დაიწყო. როდესაც ხვიჩა რუსეთში თამაშობდა, სხვა სიტუაცია იყო. სამი წლის წინ მისი თამაში რომ ვნახე, მაშინვე შემიყვარდა და გაოცებული ვიყავი მისი თვისებებით. მის გარემოცვასთან თანამშრომლობის დროს მკითხეს, არსებობდა თუ არა, იტალიაში ტრანსფერის ვარიანტი და ვიფიქრეთ „ნაპოლიზე“, ასევე იმიტომ, რომ ჯუნტოლი მას აკვირდებოდა და ინფორმაცია უკვე მოძიებული ჰქონდა. ყაზანის „რუბინის“ მოთხოვნებმა და პანდემიამ ყველაფერი გაართულა, მაგრამ მიუხედავად იმისა, რომ სხვა შეთავაზებებიც იყო, ოჯახი დარწმუნებული გახლდათ, რომ „ნაპოლი“ უნდა აერჩიათ.
მათ „ნაპოლი“ აირჩიეს, რადგან სერიოზული კლუბია, რომელიც ახალგაზრდა ფეხბურთელებს აფასებს, გარდა ამისა, იქ იყო სპალეტი, რომელიც ფეხბურთის კარგი მასწავლებელია. მასთან ერთად კვარაცხელია გაუმჯობესდა. ის დაიბადა, როგორც დრიბლიორი, თუმცა ახლა უფრო ნაკლებად თამაშობს ერთი-ერთზე და გუნდის სამსახურშია. ის ბრწყინვალე გუნდის მნიშვნელოვანი ნაწილი გახდა.
ვიცნობ მთელ ოჯახს, მათ შორის ხვიჩას ძმას, თორნიკეს, რომელიც ასევე ნიჭიერია. ნაწილობრივ საქმის, ნაწილობრივ სიამოვნების გამო ვუყურებ „ნაპოლის“ ყველა მატჩს და გეტყვით, რომ ასე კარგად ძალიან ცოტა გუნდი თამაშობს. ვაკვირდები კვარას ზრდას, რომელიც შესანიშნავ ჰარმონიაში გარემოსა და ფანებთან. უბრალო ბიჭია, მაგრამ ძლიერი ხასიათით და ზეწოლას არ განიცდის.
შესაძლოა, რამდენიმე ქართველი იტალიაში კიდევ ვიხილოთ. საქართველოს ნაკრებს პროგრესი აქვს და ასევე 21-წლამდე ნაკრებიც კარგად მუშაობს, რამდენიმე საინტერესო მოთამაშე ჰყავს. ივნისში რუმინეთსა და საქართველოში 21-წლამდე ევროპის ჩემპიონატს დავესწრები, სადაც ქართველ ტალანტებს უფრო ყურადღებით დავაკვირდები“, –განაცხადა კრისტიან ძაკარდომ.
გუშინ, „მანჩესტერ იუნაიტედის“ ყოფილი მთავარი მწვრთნელი, ალექს ფერგიუსონი, ჟურნალისტებს ერიკ ტენ ჰეგის ამჟამინდელი მუშაობის შესახებ ესაუბრა.
„ერიკი სწორ გზაზეა. მისი ტრანსფერები მართლაც კარგი იყო. ვფიქრობ, ამან გადამწყვეტი როლი ითამაშა”
გუშინ, არგენტინის ნაკრების მთავარმა მწვრთნელმა, ლიონელ სკალონიმ, ჟურნალისტებს ლიონელ მესის შესახებ აზრი გაუზიარა. მესი ფიფას 2022 წლის საუკეთესო ფეხბურთელად დაასახელეს.
„რა უნდა ვთქვა იმაზე მეტი, რაც უკვე ითქვა. ყველაზე მნიშვნელოვანი ის არის, რომ ლეო თამაშს გააგრძელებს.
დარჩება გუნდში? მისთვის კარი ყოველთვის ღიაა. ვიმედოვნებ, მომავალ მსოფლიო ჩემპიონატზეც ითამაშებს. მე მას იქ ვხედავ. თუმცა ჯერ საკვალიფიკაციო ეტაპის გავლაა საჭირო”.
სკალონი, რომლის ხელმძღვანელობითაც არგენტინის ნაკრებმა ყატარის მსოფლიო ჩემპიონატი მოიგო, 2022 წლის საუკეთესო მწვრთნელად დასახელდა.
ავტორი
