მმართველი გუნდის წევრი ისკო დასენი ნარკოტიკების დეკრიმინალიზაციას ეწინააღმდეგება. მისი თქმით, ნარკოტიკების მოხმარება სისხლის სამართლებრივ პასუხისმგებლობას უნდა იწვევდეს, რადგან ნარკოტიკების დეკრმინალიზაციისთვის საზოგადოება მზად არ არის. როგორც ,,ქართული ოცნების“ წევრი აცხადებს, დეკრიმინალიზაცია საზოგადოებაზე უარყოფით გავლენას მოახდენს.
,,ნარკოტიკების მოხმარებისთვის სისხლის სამართლებრივი პასუხისმგებლობა აუცილებლად უნდა არსებობდეს, რადგან სხვა შემთხვევაში ძალიან ცუდ შედეგის მომტანი იქნება საზოგადოებისთვის. ნარკოტიკების დეკრიმინალიზაციისთვის ხალხი მზად არ არის, გარკვეული ნაბიჯების გადადგმაა საჭირო, პირველ რიგში, პრევენციული ზომების მიღება, რათა სავალალო შედეგი თავიდან ავიცილოთ. საერთო ჯამში, ნარკოტიკების დეკრიმინალიზაციის საკითხს უარყოფითად ვაფასებ ვფიქრობ, მარიხუანას დეკრიმინალიზაცია ნორმალურია, მაგრამ ლეგალიზაციაზე ლაპარაკიც კი ზედმეტია. მომხმარებელი ციხეში არ უნდა იჯდეს, მაგრამ ეს არ უნდა ნიშნავდეს იმას, რომ სისხლის სამართლებრივი პასუხისმგებლობა საერთოდ გაუქმდეს“ განაცხადა ისკო დასენმა.
მოძრაობა ,,თეთრი ხმაურის“ ინიციატივით, 10 დეკემბერს თბილისში საპროტესტო აქცია გაიმართა. აქციის მონაწილეები ნარკოპოტიკის დეკრიმინალიზაციას მოითხოვენ. მოძრაობის წევრებმა თავიანთი მოთხოვნა სამ პუნქტად წარმოადგინეს:
– მოვითხოვთ საქართველოს პარლამენტისგან, მიმდინარე წლის ბოლომდე დაჩქარებულ რეჟიმში გადაწყდეს დეკრიმინალიზაციის კანონპროექტის დამტკიცების საკითხი. წლის ბოლომდე მოვითხოვთ ინიცირებული კანონპროექტის პრინციპების დამტკიცებას და კენჭისყრაზე გატანას.
– მთავრობისგან მოვითხოვთ, რომ დაიწყოს პოლიციის რეფორმა და რეპრესიაზე ორიენტირებული სისტემის ყველა რგოლი ადამიანის კეთილდღეობაზე ორიენტირბეული გახდეს. ჩვენ საზოგადოებას რეალურად დანაშაულთან მებრძოლი და უსაფრთხოების დამცველი პოლიცია გვჭირდება და არა ადამიანების ჩაგვრა, წამება და მკვლელობა.
– მოვითხოვთ საქართველოს პრეზიდენტისგან, 2017 წლის დეკემბრის ბოლომდე სასწრაფო წესით ნარკოდანაშაულში მსჯავრდებული პირების მასობრივი შეწყალება უზუნველჰყოს. ყოველი მესამე პატიმარი ნარკოდანაშაულისთვის იხდის სასჯელს. მათ გათავისუფლებამდე არ შევწყვეტთ ბრძოლას – ნათქვამია ,,თეთრი ხმაურის“ წევრების მიერ გაკეთებულ განცხადებაში.
