დავით ნარმანია მზად არის თბილისის მერის არჩევნებში მეორედ იყაროს კენჭი. დედაქალაქის მთავრობის ხელმძღვანელის განცხადებით, თვითმმმართველობის არჩევნებისთვის მერობის კანდიდატურასთან დაკავშირებით მმართველ გუნდში პოლიტიკური კონსულტაციები გაიმართება და კანდიდატი ამ გადაწყვეტილების საფუძელზე შეირჩევა. სწორედ ამის შემდეგ გაირკვევა ვის შეარჩევს “ქართული ოცნება”- კვლავ დავით ნარმანიას თუ სხვა კანდიდატს.
”საკითხთან დაკავშირებით პოლიტიკური კონსულტაციები იქნება. კანდიდატი გუნდური გადაწყვეტილების საფუძველზე იქნება წარმოდგენლი. მნიშვნელოვანია, არ ვიჩქაროთ, დაველოდოთ იმ გადაწყვეტილებას, რომელიც იქნება მიღებული”,- განაცხადა ნარმანიამ.
დედაქალაქის მერის განმარტებით, თუ მის კანდიდატურაზე შეთანხმდებიან, მერის არჩევნებში მონაწილეობას უპირობოდ მიიღებს. ”თუ იქნება გადაწყვეტილება, რასაკვირველია,”- დასძინა დავით ნარმანიამ.
ცნობილია, რომ “რესპუბლიკური პარტიის” ყოფილი თავმჯდომარე დავით უსუფაშვილი ახალი პოლიტიკური პარტიით თვითმმართველობის არჩევნებში გეგმავს მონაწილეობას, პარტია კი უსუფაშვილს თბილისის მერობის კანდიდატად წარადგენს.
თბილისის მერობის კიდევ ერთი კანდიდატი, რომელზეც ცნობები გავრცელდა, თბილისის საკრებულოს დამოუკიდებელი დეპუტატი ალექსანდრე ელისაშვილია. მას “რესპუბლიკურმა პარტიამ” შესთავაზა პარტიის სახელით კენჭისყრა, თუმცა ელისაშვილმა თქვა, რომ მას პარტიის სახელით კენჭისყრა არ უნდა.
imedinews-ის ინფორმაციით, “ევროპული საქართველო”თბილისის მერის კანდიდატად პარლამენტის წევრ ელენე ხოშტარიას წარადგენს. რაც შეეხება “ნაციონალურ მოძრაობას”, ამ ეტაპზე ორი სავარაუდო კანდიდატი სახელდება, ესენი ნიკა მელია და გრიგოლ ვაშაძე.
საქართველოში ადგილობრივი თვითმმართველობის არჩევნები 2017 წლის შემოდგომაზე ჩატარდება.
imedinews.ge
