როგორც ცნობილია, გურიის რეგიონის გზების რეაბილიტაცია, მსოფლიო ბანკის მხარდაჭერით ხორციელდება. 62 კმ სიგრძის გზის პროექტის ბიუჯეტი 58,5 მილიონ ლარს შეადგენს. სამუშაოებს გზების რეაბილიტაციისთვის გამოცხადებულ საერთაშორისო ტენდერში გამარჯვებული, ჩინური კომპანია “China Road & Bridge Corporation” ასრულებს. რეაბილიტაცია უნდა ჩაუტარდეს საჯავახო-ჩოხატაური-ოზურგეთის (მათ შორის, ნასაკირალის მონაკვეთი), ჩოხატაური-ბახმაროს, ოზურგეთი-ნატანები-ურეკის, ოზურგეთი-ქობულეთის, ჩოხატაური-ზომლეთის და საავტომობილო გზების ცალკეულ მონაკვეთებს. ამ ლოკაციებიდან არაერთგან სამუშაოები დასრულებულია.
ჩოხატაური-ნასაკირალის 8 კილომეტრიანი გზის მონაკვეთის შუაში, ნასაკირალის უღელტეხილზე, ახლად დაგებული, კილომეტრ-ნახევრიანი ასფალტის საფარი ახლახან მთლიანად აყარეს და ხელახლა უნდა დააგონ.
გზის აღნიშნული მონაკვეთზე ჩატარებული სამუშაოების შეფასებისას, როგორ ადგილობრივები, ისე ამ გზაზე მოძრავი ტრანსპორტის მძღოლები ამბობენ, მსგავსი უპასუხისმგებლო დამოკიდებულება ნაკლებად უნახავთ.
_ რა ენაღვლებათ, მასხარაობენ. გასულ წელს ეს კომპანია საგზაო დეპარტამენტმა დააჯარიმა. მაინც უხეიროდ გაკეთდა ყველაფერი, – ამბობენ ისინი.
აღნიშნული კომპანიის დაჯარიმების შესახებ, რომლის მიხედვითაც სანქციების გარდა, უკიდურეს შემთხვევაში, კომპანიასთან ხელშეკრულების გაწყვეტაც მოხდებოდა, გასულ წელს საგზაო დეპარტამენტი იუწყებოდა.
ჯერჯერობით, იგივე კომპანია, იმავე დარღვევებით მუშაობს.
გზაზე აყრილი ასფალტი რამდენიმე ადგილზე ნაწილობრივ არის თავმოყრილი. ნაწილი კი, გადაყრილია ხევებში, სადაც, უფრო ქვევით მოსახლეობას საკარმიდამო თუ სასოფლო-სამეურნეო დანიშნულების ნაკვეთები აქვთ.
ამ კრიტიკულ მდგომარეობაში, გზის რეაბილიტაციაზე მომუშავე პირები გვეუბნებიან, რომ ხელახლა უნდა მოხდეს ხარისხიანი ასფალტის დაგება.
ჩვენი ინფორმაციით, ახლად დაგებული ასფალტის ხელახლა აყრის მიზეზი იყო არა მარტო ცუდი ხარისხი, არამედ სუსტი საფუძველი თვით გზის ზედაპირის. აქ არსებული სუსტი გრუნტის გამო, უნდა მომხდარიყო ნაწილობრივი ამოჭრა, მერე გამაგრება და მომდევნო ეტაპზე მოასფალტება.
უფრო ადრე, შარშან, იყო დიდი პიარ-კამპანიაც _ გურიაში სახელმწიფო რწმუნებულმა გიორგი ურუშაძემ ოზურგეთში, ნასაკირალის 8,5-კილომეტრიანი მონაკვეთის გზის რეაბილიტაციის სამუშაოები დაათვალიერა, თუ როგორ აქტიურად გრძელდებოდა შიდასახელმწიფოებრივი მნიშვნელობის საჯავახო-ჩოხატაური-ოზურგეთის გზის ასფალტბეტონით მოწყობის სამუშაოები.
როგორც ვთქვით, პროექტს საქართველოს საავტომობილო გზების დეპარტამენტი მსოფლიო ბანკის ფინანსური მხარდაჭერით ახორციელებს. ეს გზა მთლიანად 2022 წლის მისში უნდა დასრულებულიყო. ცალკეული მონაკვეთების მშენებლობა დასრულდა კიდეც, თუმცა, კონკრეტულად ნასაკირალის მონაკვეთზე კარიკატურული ვითარება შეიქმნა.
გასულ წელს, ამ გზის გაჭიანურებული მშენებლობის გამო, ადგილობრივმა მოსახლეობამ საპროტესტო აქცია გამართა. მაშინ ადგილზე „ნაციონალური“ მოძრაობის ადგილობრივი წარმომადგენლებიც მივიდნენ და ისინი ხელისუფლებას კორუფციაში ადანაშაულებდნენ. ითხოვდნენ სამუშაოების სწრაფად განახლებას და დასრულებას, რადგან გაუსაძლისი მდგომარეობა იყო შექმნილი სხვადასხვა ორმოებისა თუ სისტემატიური მტვერის გამო. მაშინ პოლიციამ, გზის გადაკეტვის მცდელობის გამო, ოზურგეთის საკრებულოს ორი დეპუტატი _ ბესო ქათამაძე და შალვა თავდიშვილი დაკავა.
აღნიშნულის თაობაზე „გურია ნიუსი“ არაერთხელ წერდა.
მომდევნო წელს, ახლა, ამ გზაზე ასფალტის საფარი დაიგო, თუმცა, როგორც აღმოჩნდა, ასფალტის და გზის ზედაპირიც უხარისხოდ იყო დამუშავებული.
ადგილზე მომუშავე პირებმა გვტიხრეს, რომ მათ არაფერი იციან.
_ ჩვენ მუშები ვართ. ჯერ დააგეს, მერე გადათხარეს. ამბობენ, რომ უხარისხო ასფალტი იყო. ახლა გვეუბნებიან, რომ ისევ დააგებენ. ოღონდ გზის ზედაპირი უკეთ უნდა დამუშავდესო. მეტი არაფერი ვიცით. აქ ჩინური კომპანიის წარომადგენლები არიან. თუმცა, ისინი კომენტარს არავისთან აკეთებენ, _ გვითხრა ერთ-ერთმა მუშამ გურამ მამულაშვილმა.
მალე მოვიდნენ ჩინური კომპანიის წარმომადგენლებიც. ორმა მამაკაცმა უსიტყვოდ შემოგვხედა და ასევე, სასწრაფოდ, უსიტყვოდ გაგვეცალნენ.
_ როგორც ვიცით, ჩინური კომპანია მუშაობს. ზოგადად კი, პროცესს საგზაო დეპარტამენტი ხელმძღვანელობს. როგორც მე მაქვს ინფორმაცია, გზას, მის ზედაპირს სჭირდებოდა უკეთ დამუშავება. მოძრავი ქანებია. ასფალტი არ იყო უხარისხო. ხელახლა მოხდება მისი დამუშავება და დააგებენ, _ გვითხრა „გზამშენი-18“-ის დირექტორმა, თემურ ჯახვამ.
გასულ წელს, როცა საგზაო დეპარტამენტმა ზემოხსენებული ჩინური კომპანია დააჯარიმა ცუდად შესრულებული სამუშაოების გამო, მაშინ ბატონმა თემურმა „გურია ნიუსთან“ განაცხადა, რომ დაჯარიმება არ ნიშნავდა ხელშეკრულების შეწყვეტას და კომპანია გამოასწორებდა მითითებულ დარღვევებს.
„გურიის რეგიონში, მსოფლიო ბანკის დაფინანსებით, 7 სხვადასხვა მონაკვეთზე, 62.4 კმ გზის რეაბილიტაცია მიმდინარეობს. აღნიშნული პროექტების ჯამური ღირებულება 58.5 მლნ. ლარია. კომპანიამ გარკვეული სახის სამუშაოები დაიწყო ცალკეულ მონაკვეთებზე, მაგრამ გეგმა–გრაფიკთან მიმართებით, სამუშაოების ტემპი საკმაოდ დაბალია. დეპარტამენტმა, უკვე აამოქმედა ხელშეკრულებით გათვალისწინებული სანქციები კომპანიის მიმართ და სამუშაოების ტემპი თუ ვერ დაეწევა გეგმა–გრაფიკს, საჯარიმო სანქციების გარდა განიხილება ხელშეკრულების შეწყვეტაც“, _ ნათქვამი იყო საგზაო დეპარტამენტის განცხადებაში.
თუ როგორ „გამოასწორეს“ მუშაობა, ეს კარგად ჩანს ნასაკირალის გზის იმ მონაკვეთზე, რომელზეც ახლა ვსაუბრობთ.
_ ამ საქმეს კრიმინალის სუნი რომ უდის, ჩანს. უხარისხოდ გაკეთებამ იცის ასე. ასევე, უდიდესი პრობლემაა მძიმეწონიანი მანქანები, რომელთაც სუფსა-გუბაზეულის ხეობიდან გააქვთ ინერტული მასალა და ყოვლად უწესო სიარულით აფუჭებენ გზებს. საფრთხეს უქმნიან, როგორც გარემოს, ისე მსუბუქ მანქანებსაც, რომლებიც ამ გზაზე მოძრაობენ. ვინ მოაწესრიგებს ამას? ნება უნდა იყოს და გული უნდა შეგტკიოდეს, _ამბობს სოფელ ძიმითის მკვიდრი თამაზ ხარაიშვილი.
ნასაკირალის მცხოვრებთა წარმომადგენლები, რომლებიც აღნიშნული გზის გასწვრივ ცხოვრობენ, ამბობენ, რომ უკვე დიდი ხანია, აპროტესტებენ ამ დაუმთავრებელ მშენებლობას:
_ დავიღალეთ, სხვა რომ არაფერი! არ გაჭრა არც საპროტესტო აქციამ, არც თხოვნამ, არც დარეკვამ და არც დაპირებამ. ახლა ვუყურებთ კიდევ ცოტა ხანს, თუ როგორ დასრულდება ეს სასაცილო ამბავი _ ახლად დაგებული ასფალტის საფარის ხელახლა აყრა და კვლავ თავიდან დაგება. თუ ამასაც არ დაადგა საშველი, მერე გადავწყვეტთ, მართლა დიდი და ერთობლივი აქცია მოვაწყოთ და გადავკეტოთ ეს ისედაც გადაკეტილი გზა, მუდამ რომ დაბრკოლებაა და ვერ მიხვდები, როდის აგებენ და როდის თხრიან. ხალხი ვართ ჩვენ! ადმიანები ცხოვრობენ აქ და ადამიანურად შეხედონ ჩვენს მდგომარეობას, _ გვეუბნებიან ადგილობრივები.
„გური ნიუსი“ კვლავ მიადევნებს თვალს ნასაკირალის პრობლემურ მონაკვეთზე გზის მშენებლობას და გააცნობს თავის მკითველებს.
ავტორი
