ეთერ ნატროშვილს ლანჩხუთში ყველა ცნობს, მისი გაჭირვებული ყოფის შესახებაც თითქმის ყველამ იცის. არ აქვს მნიშვნელობა, გარეთ როგორი ამინდია ან წელიწადის რომელი დრო, დაუკვირვებელი თვალისთვისაც კი მარტივად შესამჩნევია ქუჩაში, უფრო მეტად რომელიმე მაღაზიის კიბეზე ჩამომჯდარი, ხელჯოხიანი, ასაკოვანი ქალი.
ეთერ ნატროშვილი მეუღლესა და ვაჟიშვილთან ერთად ლანჩხუთში, დაახლოებით, 9 წლის წინ ჩამოვიდა. მერე მეუღლე გარდაეცვალა და მარტო დარჩენილ დედა-შვილს, როგორც თავად ჰყვება, ბინის შეძენასაც დაპირდნენ, თუმცა, წლებია, უსახლკაროდ არიან.
“ცხრა წელია, ლანჩხუთში ვცხოვრობთ და უსახლკაროდ ვითვლებით. თავიდან კეთილი ადამიანების დახმარებით თავს სხვადასხვა ადგილს ვაფარებდით. ბოლო რამდენიმე წელია, მერიამ ბინის ქირავნობის პროგრამაში ჩაგვსვა, თუმცა, ახლა ბინის მეპატრონემ სახლი დაგვაცლევინა, რემონტს ვაკეთებო და დავრჩით ისევ ღია ცის ქვეშ”, _ ამბობს ეთერ ნატროშვილი.
როგორც მისი ნაამბობიდან ირკვევა, შვილთან ერთად ის ახლა თავს ავტოფარეხს აფარებს, რომელიც ღამის გასათევად ბინის მეპატრონემ დროებით დაუთმო, თუმცა, ამ თავშესაფარში არც საწოლი აქვს, არც შუქი, წყალსა და ტუალეტზე კი საუბარიც ზედმეტია.
“მივედი მერიაში ტირილ-ტირილით, თუმცა, დაცვამ არ შემიშვა. მინდოდა მერისთვის მეთქვა ჩემი გაჭირვების შესახებ. ვინ დამეხმარება, წარმოდგენა არ მაქვს, რამდენიმე ღამეა “გარაჟში” ვათევ, სადაც არაფერი არაა. მუხლები მტკივა, მე კი იქ საწოლიც არ მაქვს, რომ დავიძინო. მერიაში მითხრეს, შენ მონახე ბინა და გვითხარიო. სად უნდა მოვნახო, როცა სიარულიც კი არ შემიძლია”, _ ამბობს თავშესაფრის გარეშე დარჩენილი ქალი.
თავშესაფრის გარეშე დარჩენილი დედა-შვილის პრობლემის თაობაზე “გურია ნიუსი” ლანჩხუთის მერიას დაუკავშირდა, სადაც დაგვპირდნენ, რომ ამ ოჯახის საკითხს მერიის შესაბამისი სამსახური შეისწავლის:
“ეთერ ნატროშვილი ქირავნობის პროგრამით სარგებლობს. მერიის სოციალური და ჯანდაცვის სამსახური შეისწავლის მდგომარეობას”, _ გვპასუხობენ მერიის პრესსამსახურში.
საგულისხმოა, რომ ეთერ ნატროშვილს ჯანმრთელობის მძიმე პრობლემები აქვს და ვაჟიშვილთან ერთად, რომელიც უკვე სრულწლოვანია, ქუჩაში ბედის ანაბარადაა დარჩენილი.
