დღეს, ოზურგეთის მუნიციპალიტეტის საკრებულოში, “ქართული ოცნების” წევრებმა “ნაციონალური მოძრაობის” დეპუტატი ბესო ქათამაძე სცემეს.
ქათამაძეს თავზე სამი ჭრილობა აქვს და როგორც “მედალფას” კლინიკურმა დირექტორმა დავით მდინარაძემ “გურია ნიუსს” უთხრა, მას ერთი ნაკერის დადება დასჭირდა.
ბესო ქათამაძე ამბობს, რომ “ოცნების” დეპუტატებმა ის საკრებულოში საქმის გასარჩევად დაიბარეს და პასუხი ფეისბუქ სტატუსის და “გურია ნიუსში” გამოქვეყნებული სტატიის გამო მოსთხოვეს.
საქმე ეხება 9 ივნისს გამოქვეყნებულ მასალას სათაურით: “ნაციონალი” დეპუტატი” “მეოცნებე” კოლეგებს: პატივისცემით ბატონი გობრონიძე გაგიშვებთ იქ, სადა საჭიროა!
_ მას შემდეგ რაც სტატუსი დავწერე, რომელშიც ქართულ ოცნებას შევახსენე, რომ “ქართული ოცნების” სახელით საკრებულოში ბევრი “ნაციონალი” ჰყავდათ და ასევე, ბიძინა ივანიშვილს საჯაროდ მივმართე, რომ მისი პარტიის წევრებისთვიეს მიეხედა და რომ “ოცნების” დეპუტატებს პატივისცემით ბატონი გობრონიძე გაუშვებდა იქ, სადაც საჭირო იყო, ბევრი გაბრაზდა.
ეს სტატუსი, რომელსაც კომენტარებიც ახლა თქვენ გამოაქვეყნეთ და ამის შემდეგ სულ აიჭრნენ. მირეკავდნენ და საქმეს მირჩევდნენ. დღეს კი მთხოვეს მისვლა და მივედი. დამიწყეს ჩხუბი, თუ რატომ ვწერდი ასეთი ტიპის სტატუსებს, რატომ შევაგინე და რატომ გამოვაქვეყნე ეს ამბავი “გურია ნიუსში”. ავუხსენი, რომ მედიასაშუალებაში არა მე, არამედ ჟურნალისტმა გამოაქვეყნა, თუმცა, ეს არ გაიგეს და ლაჩრულად, უკნიდან მომეპარეს, _ ამბობს ქათამაძე.
მისივე თქმით, თავში ცარტყმის შემდეგ ბევრი დეტალი არ ახსოვს:
_ მახოვს ის, რომ მირტყამდა გელა ჩავლეიშვილი _ ადამიანი, რომლის მამაც “ნაციონალების” ხელისუფლებაში ყოფნის დროს, ძალოვან სტრუქტურაში მაღალ თანამდებობაზე მუშაობდა; მირტყამდა გოჩა კილაძე _ კაცი, რომელიც “ნაციონალების” დროს პროკურორად მუშაობდა და მირტყამდა ტარიელ აროშიძე, “ნაციონალური მოძრაობის” “გამპრავებელი.
მახსოვს ის, რომ ყვირილის ხმაზე ოთახში გუბერნიის თანამშრომელი ნესტორ რამიშვილიც შემოვიდა, რომლის მეუღლე “ოცნების” დეპუტატია. ყველა მე მთხოვდა პასუხს.
გარდა ამისა, მეუბნებოდნენ, რომ აქვთ ჩემი თბილისში, აქციაზე ყოფნის კადრები. ვერ გეტყვით ამით რისკენ მანიშნებდნენ, რადგან აქციაზე ყოფნა არც დამიმალავს, _ თქვა “გურია ნიუსთან” საუბრისას ქათამაძემ.
“გურია ნიუსის” შეეცედა ქათამაძის მიერ დასახელებულ პირთან დეტალები გადაემოწმებინა, თუმცა, მათთან კავშირი შეუძლებელია. ზოგი ტელეფონს არ პასუხობს, ზოგი კი მიუწვდომელია.
ჩვენ ასევე შევეცადეთ ამ თემაზე გურიის გუბერნატორის კომენტარიც მოგვეპოვებინა. მით უმეტეს, რომ ინცინდეტის დროს, ოთახში მისი თანამშრომელიც იმყოფებოდა. თუმცა, მერაბ ჭანუყვაძე ჩვენ სატელეფონო ზარებს არ პასუხობს.
