“ნაციონალების” ღამის შეხვედრების მონაწილე დღეს “ოცნების” კანდიდატია _ “ალბათ, მონახა რაღაც ჩემში” (ვიდეო)

„ქართული ოცნების“ მაჟორიტარობის კანდიდატების ვინაობის შესწავლით ირკვევა, რომ საქართველოს უმეტეს მუნიციპალიტეტებში, მმართველ პარტიას „ნაციონალური მოძრაობის“ აქტიური წარმომადგენლები ჰყავს წარმოდგენილი. ისეთები, რომლებსაც დღეს პორტირებულებს ეძახიან.

გამონაკლისი არც ჩოხატაურის მუნიციპალიტეტია, სადაც რამდენიმე ოლქში ისეთი კანდიდატებია, რომელთა შესახებაც ჩვენს არქივში საკმაოდ ბევრი ვიდეო მასალა მოიძებნება.

ერთ-ერთი ასეთი კანდიდატი „ქართულ ოცნებას“ ერკეთის თემში ჰყავს _ ექიმი ნატო ჩანტლაძე, რომელიც 2010 წლის მოწვევის საკრებულოში „ნაციონალურ მოძრაობას“ წარმოადგენდა.

2012 წლის საპარლამენტო არჩევნების დროს  ნატო ჩანტლაძე აქტიურად ეხმარებოდა „ნაციონალურ მოძრაობას“. შუაღამით, გამგეობაში გამართულ თათბირებსაც ესწრებოდა და იმდროინდელი ხელისუფლების დავალებებს, რომელიც, როგორც ფაქტები მოწმობენ, „ქართული ოცნების“ წევრების დაშანტაჟებით და სხვა მსგავსი ქმედებებით მიმდინარეობდა, წარმატებით ასრულებდა.

აღსანიშნავია, რომ ნატო ჩანტლაძე ერთ-ერთია იმ მრავალთაგან, რომელიც 2012 წლის საპარლამენტო არჩევნების შემდეგ „ქართული ოცნების“ ნავში გადაჯდა და როგორც ჩანს წარმატებით _ დღეს ის „ოცნების“ მაჟორიტარობის კანდიდატია.

პარტია „ქართული ოცნების“ ჩოხატაურის ორგანიზაციის თავმჯდომარე და მერობის კანდიდატი ირაკლი კუჭავა ამ თემაზე კომენტარს არ აკეთებს და შესაბამისად უპასუხოდ დარჩა კითხვა ვინ და რა დამსახურებით შეარჩია ჩანტლაძე „ოცნების“ კანდიდატად.

თავად ჩანტლაძე ამბობს, რომ მისთვის უცნობია ვინ გაუწია ლობირება.

_ ასე კონკრეტულად არ ვიცი ვინ არის ჩემი ლობისტი, _ აღნიშნა ჩვენთან საუბრისას ჩანტლაძემ.

_ ქალბატონო ნატო, ის თუ იცით რა დამსახურებით შეარჩია „ქართულმა ოცნებამ“ თქვენი კანდიდატურა, როცა 2012 წელს „ნაციონალურ მოძრაობს“ აქტიურად უჭერდით მხარს?

_ ასე თუ ისე მე გვერდზე ვედექი „ოცნებას“. მერე, როგორც კი პარტია ჩამოყალიბდა, ეგრევე გავხდი მისი წევრი და ფრაქციის მდივანი.

_ „ქართული ოცნება“ 2011 წელს შეიქმნა და თქვენ მაშინ „ნაციონალური მოძრაობის“ აქტიური წევრი და მხარდამჭერი იყავით…

_ მე ვგულისხმობ „ქართული ოცნების“ ხელისუფლებაში მოსვლის პერიოდს _ მერე გადავედი. მაშინ საკრებულოში ოპოზიციის ლიდერი დავით შარაშიძე იყო, მან მთხოვა და გადავედი. ალბათ, მონახა რაღაც ჩემში. ბევრი ითხოვდა, მაგრამ არ მიუღიათ. მაგ დროს სხვებიც ფიქრობდნენ  ფრაქციის შექმნას, მაგრამ არ დავთანმხდი.

_ სულ ესაა  ესაა თქვენი დამსახურება?

_ მე გვერდში ვედექი. შეიძლება ეს არ ჩანდა, მაგრამ ასე იყო.

_ მაშინაც  კი, როცა ღამეულ შეხვედრებზე  დადიოდით და „ნაციონალური მოძრაობის“ ხელმძღვანელობის დავალებებს ასრულებდით?

_ ღამეული შეხვედრა ერთადერთხელ იყო. მაშინ, ყველა სოფლის წარმომადგენელი იყო დაბარებული. იმ დღეს დავალება არ მიმიღია, შენიშნები მომცეს, _ თქვა „გურია ნიუსთან“ საუბრისას ჩანტლაძემ.

პ.ს. ჩოხატაურელ კანდიდატებს შორის, მსგავსი წარსულით მხოლოდ ნატო ჩანტლაძე არ გამოირჩევა. „გურია ნიუსის“ არქივში ბევრი ვიდეო მასალა ინახება, რომელსაც მოგვიანებით შემოგთავაზებთ.