2012 წელს, მაშინ, როცა პარტია ,,ქართულმა ოცნებამ“ საპარლამენტო არჩევნებში,,ნაციონალური მოძრაობა“ დაამარცხა, ახლა უკვე მომავალმა პრემიერმა, მამუკა ბახტაძემ საქართველოს ყოფილი პრეზიდენტის, მიხეილ სააკაშვილის პარტიას შემოწირულობის სახით 20 000 ლარი გადაურიცხა. პრემიერის პოსტზე მამუკა ბახტაძის წარდგენიდან რამდენიმე წუთში უმრავლესობის წევრებს მოუწიათ თავის მართლება, თუ როგორ აღმოჩდა ,,ნაციონალური მოძრაობის“ ანგარიშზე აღნიშნული თანხა. დღეს, კი თბილისის მერმა განაცხადა, რომ 2012 წელს მამუკა ბახტაძე ხელმძღვანელის მხრიდან ძალადობის მსხვერპლი გახდა. კერძოდ, კახა კალაძის თქმით, ბახტაძემ ,,ნაციონალურ მოძრაობას” 20 000 ლარი იმ კომპანიის ხელმძღვანელის გადაწყვეტილებით გადაურიცხა, სადაც 2012 წელს მუშაობდა.
საკითხთან დაკავშირებით ,,გურია ნიუსთან“ კომენტარი გააკეთა მმართველი გუნდის წევრმა. როგორც რევაზ არველაძემ გვითხრა, აღნიშნულთან დაკავშირებით ზუსტ ინფორმაციას არ ფლობს, თუმცა, ვარაუდის დონეზე ამბობს, რომ შესაძლოა, მამუკა ბახტაძე გარკვეული ძალადობის მსხვერპლი გახდა, ან მისი ანგარიშიდან თანხა ისე გადარიცხეს, რომ თავად ამის შესახებ არაფერი იცოდა.
,,არ ვამბობ, რომ არ არის სწორი ინფორმაცია, მაგრამ, ალბათ, გვახსოვს, წინა ხელისუფლების წარმომადგნელები როგორ ურიცხავდნენ ფულს კომპანიებს. შეიძლება, ძალადობას ჰქონდა ადგილი, ან არც იცოდა მამუკა ბახტაძემ, ისე ჩაირიცხა მისი სახელით აღნიშნული თანხა. ეს რომ პირადად მეხებოდეს, აუცილებლად მოგაწვდიდით დეტალურ ინფორმაციას “, _ გვითხრა არველაძემ.
ბახტაძის სამეწარმეო საქმიანობის გრაფაში, მაშინ, როცა 2012 წელს ,,ნაციონალურ მოძრაობას“ 20 000 ლარი შესწირა, მითითებულია, რომ მას საქართველოს რკინიგზის გენერალური დირექტორის პოსტი ეკავა, თუმცა, მისი ბიოგრაფიიდან ირკვევა, რომ ბახტაძე აღნიშნულ თანამდებობას 2013 წლის აპრილიდან 2017 წლის 13 ნოემბრამდე იკავებდა.
