დღეს, ოზურგეთის პოლიციის წინ, „ერთიანი ნაციონალური მოძრაობის“ წარმომადგენლებმა, აქცია გამართეს. ისინი შეკვეთილის აქციის ერთ -ერთი ორგანიზატორის, აჭარის უმაღლესი საბჭოს „ნაციონალი“ დეპუტატის, ელგუჯა ბაგრატიონის შესაძლო დაკავებას აპროტესტებდნენ.
მათ გამოტანილი ჰქონდათ პლაკატები: „გახარია, წადი“, ნუ მაბრმავებ“, „აღარ გვინდა თვალების თხრა“.
ენმ-ს ოზურგეთის რაიონული ორგანიზაციის თავმჯდომარემ დავით მჟავანაძემ განაცხადა, რომ ისინი აქ აჭარის უზენაესი საბჭოს წევრის ელგუჯა ბაგრატიონის მხარდასაჭერად მოვიდნენ, რომელსაც ბრალი წაუყენეს შეკვეთილში ვიდეოკამერის დაზიანების გამო.
_ შეკვეთილში აქციის დაწყების შემდეგ პოლიციამ მოშიმშილეთა კარავთან პოლიციამ უკანონო თვალთვალის მიზნით დააყენა ვიდეოთვალი, ბატონი ელგუჯა მივიდა და ვიდეოთვალი სხვა მიმართულებით შემოატრილა. სათვალთალო კამერა თავისით წაიქცა, თუმცა, არ დაზიანებულა და ახლა არდაზიანებული კამერის დაზიანებას ედავებიან. თავად ელგუჯასთვის უცნობია, როდის მოხდა ამ კამერის ამოღება, დალუქვა, სად წაიღეს, როდის წაიღეს, რამდენ ხანს ჰქონდათ დალუქული. ასე შეიძლება მე დავამტვრიო ჩემი ტელეფონი და დაგაბრალოთ თქვენ, თუ ვიკადრებ. მით უფრო, დღეს ყველა დაადასტურებს , რომ აგერ ჩემგან კომენტარს იწერთ და ბევრი გვხედავს, _ გვითხრა მჟავანაძემ.
თვითონ ელგუჯა ბაგრატიონმა პოლიციასთან კამერების წინ ისაუბრა ყოველივე ამის შესახებ, რომ კამერა წაიქცა თავისით, ტყუილა ედავებიან და ბრალი სხვისი ქონების განზრახ დაზიანებისთვის, სსკ 177 მუხლით წაუყენეს.
„გურია ნიუსი“ ნაცმოძრაობის ერთ-ერთ ძველ და ახალ ლიდერს გიორგი ბარამიძეს ესაუბრა.
_ჩვენი მოთხოვნაა ქვეყანას მოსცილდეს სამარცხვინო შსს მინისტრი გახარია, რომელიც არის პუტინის მარიონეტი დამისი მითითებით და ბიძინა ივანიშვილის ბრძანებით სასტიკად დაარბია ოკუპაციის წინააღმდეგ მიმართული მშვიდობიანი აქცია. ასეთი რამ წარმოუდგენელია საქართველოს დამოუკიდებლობის 27-ე წლისთავზე, თან იმ მოტივით, თითქოს მზადდებოდა პარლამენტში შეჭრა და ხელისუფლების გადატრიალება.
_თქვენი აზრით პარლამენტში შეჭრა არ ნიშნავს გადატრიალების მცდელობას?
_რა უნდა ექნათ ცარიელ პარლამენტში? ვთქვათ და შესულიყვნენ, მერე რა?
_ 2003 რომ შეიჭერით, მაშინ რა მოხდა?
_მაშინ ახალ პარლამენტს არ უნდა გაეგრძელებინა მუშაობა, გაყალბდა არჩევნები. ამიტომ არ უნდა დაგვეშვა ის, რომ ახალ პარლამენტს დაეწყო მუშაობა.
_ახლა რომ შესულიყავით, ვერ ეტყოდით ხელისუფლებას, რომ აღარ გააგრძელოთ მუშაობაო? გაგიჭირდებოდათ ამის თქმა?
_რა უნდა ეთქვათ ცარიელ პარლამენტში? ამის გამო სისხლში ჩაახშო გახარიამ ანტისაოკუპაციო აქცია.
_გეთანხმებით, მშვიდობიანი მოქალაქის სისხლი არ უნდა დაიღვაროს, თუმცა, თქვენ რატომ გიკვირთ აქციების სისხლში ჩახშობა? ბევრად უარესი მოიმოქმედეთ, მაგალითად, 26 მაისს, მაშინ ჩვენი ჟურნალისტიც სცემეს…
_26 მაისის აქცია საქართველოს დამოუკიდებლობის აღსანიშნავ აღლუმს ეწინააღმდეგებოდა, საქართველოს დამოუკიდებლობის წინააღმდეგ აწყობდნენ, გესმით, ეს რას ნიშნავს? ერთმანეთს როგორ ადარებთ? დაშლისას კი, გადამეტება იყო, მაგრამ ამისთვის დასაჯეს კიდეც, ვინც ეს მოიმოქმედა.
_სისხლი სადაც დაიღვრება, იქ რაიმეს ფასი და გამართლება აქვს? აფრასიძეეების ოჯახის ამოწყვეტაზე რას იტყვით? ამ სპეცპორაციას თქვენ ხელმძღვანელობდით…
_როგორ შეიძლება ჟურნალისტმა ასეთი სიცრუე თქვა? ეს ხომ უზნეობაა ნებისმიერისგან, ვინც ამას იტყვის? აფრასიძეების ოჯახს არაფერი მოსვლია, იმ ოჯახის სამი წევრი ცოცხალია. დაიღუპა ორი კრიმინალი, რომლებმაც პოლიციას ცეცხლი გაუხსნეს. დამნაშავეებს, რომლებიც პოლიციას ცეცხლს პირველი უხსნიან, ამართლებთ? როგორ შეიძლება საღი აზრის მქონე ადამიანმა, მით უფრო ჟურნალისტმა მკვლელების დაკავების პროცესს ოჯახის ამოწყვეტა უწოდოს?
_ ვერტმფრენს ესროლეს? მთელმა საქართველომ იცის ამის შესახებ. ამის ცოდნაა უზნეობა?
_ ყველა ადამიანი უზნეოა და უვიცი, ვინც ამას ამბობს. ეს არის უზნეობა ყველას მხრიდან, ვინც ამას ამბობს. დადიხარ ეს გამოცდილი ჟურნალისტი და ტყუილებს ავრცელებ.
_ სად ვავრცელებ? ეს ხომ დიდი ხანია თქვენ მიერაა გავრცელებული. და თქვენი პარტიის მხრიდან, თქვენი მხრიდან ზნეობაზე ამდენი საუბარი უხერხული არ არის?
_ ჩვენ ქვეყანა ჭაობიდან ამოვიყვანეთ, 14 ლარი დაგვხვდა და 11-ჯერ გავზარდეთ ბიუჯეტი. მსოფლიო ბანკი, იცით, რა არის? (??) მსოფლიო ბანკმა განაცხადა, რომ ჩვენნაირი ხელისუფლება, რომელმაც ნომერ პირველი რეფორმა ჩაატარა, მსოფლიოს არ ჰყოლია.
_ ესე იგი, თქვენნაირი ხელისუფლება მსოფლიოს არ ჰყოლია?
_ დიახ, ეს მსოფლიო ბანკის მონაცემები… _ გვითხრა ბარამიძემ, რომელიც ძალიან გაბრაზდა აფრასიძეების ოჯახის ხსენებაზე და არაერთხელ გაიმეორა, რომ ის ჟურნალისტი და ნებისმიერი სხვაც, ცრუ და მატყუარაა, ვინც ამას იტყვის.
