ამ წუთებში გურიის სამხარეო პოლიციის სამმართველოს წინ, სადაც “ნაციონალური მოძრაობის” აქცია მიმდინარეობს განცხადება გაკეთდა. პარტიის ადგილობროვი ორგანიზაციის თავმჯდომარის, დავით მჟავანძის თქმით, ისინი 48 საათს აძლევენ პოლიციას ბესო ქათამაძის საქმის სრულყოფილად გამოძიებისთვის.
გარდა ამისა, მჟავანაძემ მოუწოდა ოზურგეთის საკრებულოსაც, რომ დაუყონებლივ შეუჩერონ უფლებამოსილება იმ დეპუტატებს, რომლებმაც ბესო ქათამაძის ცემაში მიიღეს მონაწილეობა. მჟავანაძემ აქ შეკრებილ ადამიანებს მოუწოდა დაიშალონ და აქცია ორშაბათს 10 საათზე გააგრძელონ.
მისივე თქმით, ეს ბესო ქათამაძის თხოვნაცაა, რომელიც ტვინის შერყევით და თავზე ნაკერით ოზურგეთის საავადმყოფოში წევს.
მჟავანაძის თქმით, ქათამაძის დაკითხვა მისი ჯანმრთელობის მდგომარეობის გამო ვერ ხერხდება.
თუმცა, ჩვენი ინფორმაციით, ბესო ქათამაძეს გამომძიებელები ამ წუთებში კითხავენ საავადნმყოფოში.
შეგახსენებთ, რომ ქათამაძე, რომელიც ნაციონალური მოძრაობის დეპუტატია, ოცნების წევრებმა დღეს საკრებულოს შენობაში სცემეს. ამის გამო პოლიციამ უკვე წაუყენა ბრალი ოცნების ფრაქციის თავმჯდომარეს გელა აროშიძეს 126-ე მუხლის პირველი ნაწილით, რაც ცემას გულისხმობს.
ნაციონალური მოძრაობის წევრები ამბობენ, რომ ეს საკამრისი არაა და ყველა პირი უნდა დაისაჯოს.
ისინი კონკრეტულ გვარებსაც ასახელებენ _ დავით ჭაკნელიძე, გოჩა კილაძე, გეგა ჩავლეშვილი და გუბერნიის თანამშრომელი ნესტორ რამიშვილი, რომელიც ქათამაძის ცემის დროს სახლში იმყოფებოდა, შემდეგ კი აქციაზე მივიდა.
ნიკა მელიას თქმით, ის პროვოკაციისთვის იყო მისული და სწორედ ამიტომ დაიწყო გინება, რასაც ხელჩართული ჩხუბიც მოჰყვა.
