ბათუმის საზოგადოებრივი მაუწყებლის ჟურნალისტი კობა ფარტენაძე, გუშინ მასზე განხორციელებული თავდასხმის ფაქტს სოციალურ ქსელში ეხმიანება.
ფარტენაძის პოსტს უცვლელად გთავაზობთ.
“ძალადობას ძალადობით არ უნდა უპასუხო. ძალადობისა და კონფლიქტისგან გამოსვლის ერთადერთი გზა არის მშვიდობის პრაქტიკა, ვიფიქროთ და ვიმოქმედოთ თანაგრძნობით, სიყვარულით და გაგებით…
ის რაც დღეს მე შემემთხვა მახსენებს ფრაზას ,,უსამართლობა ყველგან არის საფრთხე სამართლიანობისთვის”, ადამიანს, რომელსაც მხოლოდ მისალმებით ვიცნობდი თავს დამესხა, საბედნიეროდ გადავრჩი, არ დავზიანებულვარ ფიზიკურად, მაგრამ დავიტანჯე სულიერად, რადგან ეს იყო პირველი შემთხვევა ადამიანს განეზრახა ზიანის მოყენება ჩემთვის, ვფიქრობ მორალურ ავტორიტეტს ასე კი არ ამტკიცებენ, ასე თმობენ….
ეს იყო ფსიქიურად გაუწონასწორებელი ადამიანი, რომელის არაადეკვატურ ქმედებებსაც შეუძლებელია არ ჰქონოდა წინაპირობა სხვაგან, მაგრამ როგორც ჩვენს რეალობაში ხდება, სავარაუდოდ მისმა ახლობლებმა ეს ყველაფერი ან ნევროზს ან მძიმე სოციალურ ფონს მიაწერეს, ნაცვლად იმისა, ეთხოვათ, ფსიქიატრთან წასულიყო, ნებისმიერი მძიმე დანაშაული ასე ხდება, ირგვლივმყოფების გულგრილობით, ხოლო როცა დანაშაული აღიკვეთება, ,,პოლიცია კი არ უნდა ჩაგერთო საქმეში, სხვა გზით მოგეგვარებინაო” გაიძახიან, ასეთი სიტყვების მთქმელი არის მდაბიო ქვის ხანის ცნობიერებით, ქვეყანაში სართალდამცველები იმისთვისაა, რომ დაიცვას ნებისმიერი პიროვნება.
ძალიან დამეხმარა ბათუმის პოლიციის მეორე განყოფილება, გვერდში დამიდგნენ და ყველანაირად შეეცადნენ დანაშაული აღკვეთილიყო.
გამაძლიერეს და საოცარი გვერდში დგომა მქონდა თანამშრომლებისგან, მაუწყებლის დაცვის პოლიციისგან, მადლობა თქვენ!
და ძალიან დიდი მადლობა ყველა მეგობარს, ახლობელს, თითოეული თქვენგანი ხართ განუმეორებლები! ყველა წერილი წავიკითხე, გამოტოვებული ზარები ვნახე, გიფასებთ და ბოდიში ვერ გპასუხობდით…
ერთად გამოვაცხადოთ ყოველი ადამიანის სიცოცხლის სიწმინდე ძალადობის ყველა ფორმის წინააღმდეგ, იქნება ეს ფიზიკური, სოციალური, საგანმანათლებლო თუ ფსიქოლოგიური.
იმედი მაქვს აღნიშნული პიროვნება სამართლიანად დაისჯება, ისე რომ ყველამ გაიგოს არ არის საჭირო ადამიანმა ყელი გამოგჭრას, უხეში შეხება ან საჯაროდ ლანძღვა უკვე #ძალადობაა…” _ წერს კობა ფარტენაძე.
შეგახსენებთ, რომ გუშინ საზოგადოებრივი მაუწყებლის აჭარის ტელევიზიისა და რადიოს თანამშრომელს გუშინ დილით უცნობი პირი თავს დაესხა.
შემთხვევა აჭარის რადიოსთან მოხდა. კობა ფარტენაძე პოლიციამ უკვე გამოკითხა.
კობა ფარტენაძის თქმით, ის რადიოს შენობიდან გაიყვანეს, გარეთ დახვდა 40 წლამდე ასაკის კაცი, რომელთანაც ადრე რაიმე სახის კომუნიკაცია არ ჰქონია.
მისივე ინფორმაციით, უცნობმა საჩუქრად წიგნები მიუტანა. შემდეგ კი სიტყვიერი და ფიზიკური შეურაცხყოფა მიაყენა და დაემუქრა.
პირი, რომელიც ფარტენაძეს ტავს დაესხა, დაკავებულია.
მომხდართან დაკავშირებით მიმდინარეობს გამოძიება.
