მე დღეს მახსენდება დიდი ნიკო ნიკოლაძის მაგალითი, რომელიც გაასამართლეს, გადააყენეს, მაგრამ ვერაფერი დააკლეს. ამის მიუხედავად, მან ამ ქვეყანაში მრავალგზით და ფორმით ევროპა შემოიყვანა – ამ სიტყვებით მიმართა პრეზიდენტმა ზურაბიშვილმა მისივე იმპიჩმენტის პროცედურაზე “ოცნების” დეპუტატებს თავისი გამოსვლის დასასრულს და კიდევ ერთხელ უთხრა, რომ პროკურატურის ხსენებითაც ვერ დააშინებენ:
მისი მრავალი ოპონენტის სახელი ისტორიას ჩაბარდა, მაგრამ ცოცხლად ვხედავთ მის აშენებულ ქალაქს, ამოქმედებულ რკინიგზას, აღმართულ ტაძარს და რაც მთავარია, ჩვენში ჩანერგილ ევროპის იდეას.
მე, მის შთამომავალს, როგორ გგონიათ რამ უნდა შემაშინოს, თუნდაც პროკურატურის ხსენებამ? რამ უნდა დამაღონოს, რამ უნდა მაიძულოს ეს ქვეყანა მივატოვო, ამის იმედი ნუ გექნებათ ვინ უნდა შემიშალოს ხელი, რომ ჩემი დადებული პირობა არ შევასრულო?
ისე, როგორც თავის დროზე, გავიყვანე ამ ქვეყნიდან რუსული ბაზები და სხვათა შორის, მომიწყეს ასევე სასამართლო, ახლაც ვიქნები ჩემი სიტყვისა და ფიცის ერთგული და ამ ქვეყანას, მის დამოუკიდებლობას, მისი ხალხის თავისუფლებას ბოლომდე ვუერთგულებ ევროპისკენ მიმავალ გზაზე!” განაცხადა სალომე ზურაბიშვილმა.
ზურაბიშვილს პროკურატურით დღეს კობახიძე დაემუქრა.
“რა იქნება მომავალში? ვერ გეტყვით – სალომე ზურაბიშვილი კვლავაც განაგრძობს კონსტიტუციის დარღვევას? ალბათ განაგრძობს, რა შეუშლის ხელს. აქამდეც იცოდა, რომ კონსტიტუციას უხეშად არღვევდა, თვითონ აქვს აღიარებული, ხვალაც წავა დაარღვევს. რა შეუშლის ხელს. ნაცმოძრაობის იმედი კვლავაც აქვს, ერთადერთი რისი იმედიც შეიძლება არ ჰქონდეს არის პროკურატურა, სისხლის სამართლებრივი გამოძიება. სამართლებრივად უცბად გამიჭირდება პასუხის გაცემა, მაგრამ საკონსტიტუციო სასამართლოს გადაწყვეტილების ფონზე, სამომავლო კონსტიტუციის დარღვევა შეიძლება უკვე იძენდეს სისხლის სამართლებრივი დანაშაულის ნიშნებს…მას აღარ აქვს მუხრუჭი და ეს არის მიზეზი რატომაც არ იმსახურებს პრეზიდენტის თანამდებობაზე ყოფნას…სამწუხაროდ ის დავიდა საქართველოს პრეზიდენტობიდან ნაცმოძრაობის პრეზიდენტობამდე, სალომე ზურაბიშვილობიდან, სალომე სამადაშვილობამდე. _ თქვა ირაკლი კობახიძემ პარლამენტში, პრეზიდენტის იმპიჩმენტის პროცედურაზე
