წელს 5 ივლისიდან 15 ივლისის ჩათვლით ნოდარ დუმბაძის IV საერთაშორისო თეატრალური ფესტივალი ჩატარდება, რომელიც ოზურგეთის თეატრის 155 და ნოდარ დუმბაძის 95 წლის იუბილეებს მიეძღვნება.
ოზურგეთის თეატრის სამხატვრო ხელმძღვანელმა და ფესტივალის დამფუძნებელმა ვასილ ჩიგოგიძემ მედიის წარმომადგენლებთან შეხვედრის დროს აღნიშნა, რომ წინა წელთან შედარებით ფესტივალის მასშტაბები კიდევ მეტად გაიზარდა, რაც საქართველოს კულტურის, სპორტისა და ახალგაზრდობის სამინისტროს, გურიის სამხარეო ადმინისტრაციის, სამივე მუნიციპალიტეტის, განსაკუთრებით კი ოზურგეთისა და ჩოხატაურის მერიების, ასევე სპონსორების გვერდში დგომითა და მხარდაჭერით გახდა შესაძლებელი, რისთვისაც მათ განსაკუთრებული მადლობა გადაუხადა.
10 დღის განმავლობაში 8 უცხოური და 17 ქართული თეატრი წარმოადგენს სპექტაკლს. ფესტივალის მთავრი სლოგანი გახლავთ ,,ნოდარ დუმბაძე-ქართული მწერლობა“. ფესტივალის გახსნის დღეს ნაჩვენები იქნება ნოდარ დუმბაძის შვილიშვილის ნოდარ მაჭარაშვილის სპექტაკლი „ავი მუსაიფი“, რეჟისორი დიმიტრი ხვთისიაშვილი.
სპექტაკლს წარმოადგენს ნოდარ დუმბაძის სახელობის მოზარდ მაყურებელთა სახელმწიფო პროფესიული თეატრი. ნოდარ მაჭარაშვილის კიდევ ერთი რომანის „ქეიფი სოლოლაკში“ მიხედვით დადგმულ სპექტაკლს წარმოადგენს საქართველოს ტექნიკური უნივერსიტეტის სახალხო თეატრ-სტუდია „მოდინახე“. სპექტაკლის რეჟისორია ნიკოლოზ ჰაინე-შველიძე.
„27 სპექტაკლიდან ხუთი სპექტაკლის ჩვენება მოხდება ჩოხატაურის მუნიციპალიტეტში. აქედან ერთ-ერთი სპექტაკლი გახლავთ ოზურგეთის სახელწმიფო დრამატული თეატრისა და ბრაგის თეატრალური კომპანიის კოპროდუქცია„ცის კარი“, რომლის რეჟისორია ელენე მაცხონაშვილი, ხოლო დადგმის ხელმძღვანელი ვასო ჩიგოგიძე (ხელოვნების დამსახურებული მოღვაწე). ყველაფერი კეთდება იმისთვის, რომ ეს ათი დღე იყოს ადამიანებისთვის სადღესასწაულო დღეები. ყველაფერს ვაკეთებთ ფესტივალის გუნდი, რაც შეიძლება ბევრი ადამიანი მოვიდეს თეატრში და მიიღოს ამ დღესასწაულში მონაწილეობა. ეს 10 დღე არაერთ ცნობილ და მაყურებლისთვის საყვარელ სახეს იხილავთ,“ – აღნიშნა ვასილ ჩიგოგიძემ.
ფესტივალზე 9 წევრიანი ჟიური იქნება წარმოდგენილი. აქედან ხუთი იქნება ქართველი და ოთხი მოწვეული სტუმარი უცხოეთიდან. როგორც წინა წელს, წელსაც გრან-პრი გაიცემა, რომლისთვისაც 10 000 ლარი ,,სმარტ კაპიტალ ჯგუფმა“ დააწესა.
ავტორი
