ბევრი ფსიქოლოგის აზრით, სიჯიუტე არის ტერმინი, რომელიც უფროსებმა მოიფიქრეს და ის მათი გადმოსახედიდან შეფასებული მოვლენებითაა ნაკარნახევი. ბავშვის გადმოსახედიდან თუ ვიმსჯელებთ, ის არაფერს აშავებს და ცუდს არაფერს ითხოვს – უბრალოდ თავის სურვილების შენარჩუნება და ასრულება უნდა. ვინაიდან ბავშვს შეზღუდული ცხოვრებისეული გამოცდილება აქვს, ვერ აცნობიერებს თავისი ქმედებების შედეგებს, ვერ ხედავს საფრთხეს. უბრალოდ დაჟინებით მოითხოვს ინტერესისა და შემეცნებითი საჭიროებების გამო.
„არ მინდა ფაფის ჭამა”,” მანქანა მიყიდე”, “ქუდს არ დავიხურავ”, “ქუჩაზე თვითონ გადავალ”, “არ მეძინება”, “ბაღში არ წავალ”… ასევე შეიძლება იყოს ისტერიკები ყვირილით, ტირილით და საზოგადოებრივ ადგილებში იატაკზე გართხმით… ითვლება, რომ სიჯიუტისკენ ბიჭებს მეტი მედრეკილება აქვთ, თუმცა გოგონები ხშირად არ ჩამორჩებიან.
ჯიუტი შვილების ხელში ფსიქლოგიურად მხოლოდ ის დედები და მამები “გადარჩებიან”, რომლებსაც “რკინის” ნერვული სისტემა აქვთ და რომლებიც არ მუშაობენ, ნაკლებად არიან დატვირთულნი საოჯახო საქმეებით და შვილების გაზრდაში სხვები ეხმარებიან – ერთი სიტყვით, ბევრი საქმე არ აქვთ და არსად ეჩქარებათ. მაგრამ დანარჩენებმა რა ვქნათ? როგორ აღვზარდოთ გაჯიუტებული და თავისნათქვამა შვილები და ამ დროს ვაკეთოთ უამრავი საქმე დროულად და ხარისხიანად? სპეციალისტებს გარკვეული რეკომენდაციების “შემოშველება” შეუძლიათ.
ოჯახში, სადაც ბავშვებისგან მკაცრ დისციპლინას მოითხოვენ, მშობლებთან კონფლიქტი შეიძლება პროტესტის ფორმა იყოს შეზღუდვების წინააღმდეგ.
ამერიკელმა მწერალმა ურსულა ლე გუინმა ერთხელ აღნიშნა: „შემოქმედებითი ზრდასრული ის ბავშვია, რომელიც გადარჩა“. ძალიან სწორი განმარტება! ბავშვები სპონტანურები და გაბედულები არიან, გრძნობენ თავიანთ საჭიროებებს და იციან, როგორ მიაღწიონ მათ. მშობლებმა კი საზღვრები დაუწესეს, რომ თავად უკეთ გაართვან თავი მათ აღზრდას, საზოგადოებისთვის კომფორტულები გახადონ, რათა საზოგადოებამ არ გარიყოს ისინი. თუ დაფიქრდებით, აღზრდა არის ის, რაც ბავშვს ზღუდავს, ხდის მას ისეთის, როგორებიც სხვები არიან.
მნიშვნელოვანია გვესმოდეს, რომ ბავშვის სიჯიუტე პირველ რიგში მიზანდასახულობის და ძლიერი ხასიათის ნიშანია. ამ ბავშვებს, თუ არ გატეხეს და ჩაკლეს ეს სულისკვეთება, ძალიან მაღალი შედეგების მიღწევა შეუძლიათ.
