ქალაქ ოზურგეთში, ჭავჭავაძის ქუჩაზე მდებარე საცხოვრებელი კორპუსის პირველ სართულზე, არც ისე დიდი ხანია, ბილიარდის სახლი “ლუზა” გაიხსნა. ამავე კორპუსის მეორე სართულზე მცხოვრები მზია ჟორჟიკაშვილი, სწორედ ამ ბილიარდის სახლიდან გამონაბოლქვი სიგარეტის კვამლისა და ხმაურის გამოა შეწუხებული.
აღნიშნული პრობლემის მოგვარებაში დახმარება მზია ჟორჟიკაშვილმა “გურია ნიუსს” სთხოვა. ქალბატონი მზიას თქმით, ბილიარდის სახლის კედელზე მოთავსებული კვამლის და მტვრის გამწოვი მოწყობილობა არაპროფესიონალურად არის დადგმული და კვამლი შენობის მეორე სართულზე, პირდაპირ საძინებელ ოთახში შედის:
“რატომ მახრჩობენ? ნუ გამგუდავთ, ასთმა ისეც მახრჩობს, ავადმყოფი ვარ, მარტოხელა, სოციალურად დაუცველი. ერთადერთი ოთახია, რაც მაბადია და იქაც დაძინების და სუნთქვის საშუალებას არ მაძლევენ. დიაბეტით დაავადებული ვარ. ჩემი გასაჭირი რომ ჩამოგითვალოთ, თავს მოგაბეზრებთ. ნაღვლის ბუშტი ამოღებული მაქვს, უმძიმესი ოპერაცია გადავიტანე. სანამ ვეხვეწო ერთს და მეორეს? საჯარო სამსახურებში, ხელისუფლების წარმომადგენლებთან როცა მივდივარ, ყველა პატივს მცემს და მეხმარება. კერძო სტრუქტურამ რატომ უნდა დამახრჩოს? მივედი, დავუძახე და იქ მომუშავე გოგონებმა სიცილი დამაყარეს. შემპირდნენ, მოვაგვარებთო და მაინც არავის გაუქანებია ხელი. სანამ ვიყო ასეთ დღეში?” _ გვითხრა მან და ისიც აღნიშნა, ვიღაცას ეწყინება, ჟურნალისტებს რატომ მიმართაო: “მაგრამ პატრონი არავინ მყავს, მარტოხელა ვარ და ჩემი მარტო ხმა არავინ ისმინა. რა უნდა ამ საქმის მოგვარებას? მით უფრო, შევხვდი საბილიარდოს ხელმძღვანელს და შემპირდა, სასწრაფოდ მოვაგვარებ ამ საკითხსო”.
მზია ჟორჟიკაშვილი აღნიშნავს იმასაც, რომ ვიდრე აქ ბილიარდის სახლი გაიხსნებოდა, მანამდე კაფე-ბარი იყო, საიდანაც მუდმივად ხმაური და ყვირილი ისმოდა და კორპუსის მცხოვრებლები ძალიან შეწუხდნენ. ამიტომ მალე დაიხურა:
“კარგა ხანს დაკეტილი იყო. მერე, როცა ისევ გაიხსნა და შიგ რაღაც სამუშაოებს ასრულებდნენ, ვკითხეთ, რას აკეთებდნენ. გვაინტერესებდა, ისევ ხომ არ შეგვაწუხებდა ხმაური. გვითხრეს, რომ მაღაზიას ხსნიდნენ. მერე კი ვნახეთ, რომ ბილიარდის სახლი გაიხსნა. ხმაური რა მოსატანია იმ გამონაბოლქვთან, რაც პირდაპირ საძინებელში შემოდის. მოკლედ, შველას გთხოვთ”, _ გვითხრა ქალბატონმა მზიამ.
ნათქვამის სიმართლეში დასარწმუნებლად ქალბატონმა მზიამ სახლში მიგვიპატიჟა _
საღამოს საათებში და გვიან ღამით, ბინაში გაჩერება შეუძლებელია. დახურული ფანჯრის პირობებშიც კი, ოთახში თამბაქოს სუნი დგას.
“გურია ნიუსი” ბილიარდის სახლ “ლუზის” დამფუძნებელს, გიორგი ჩხაიძეს დაუკავშირდა და მზია ჟორჟიკაშვილის პრობლემის შესახებ ესაუბრა.
_ ვიცი ამ ქალბატონის პრობლემა. მართალს ამბობს. უბრალოდ, ძალიან მარტივი პრობლემაა, გამწოვი მოწყობილობა არის არასწორად დამონტაჟებული. ის პირდაპირ ქალბატონის ბინისკენაა მიმართული და ოთახში შედის. ამიტომ უნდა დამზადდეს სხვა. მე დავუკვეთე ასეთი მოწყობილობა და ალბათ, ერთ კვირაში გავაკეთებთ.
_ მზია ჟორჟიკაშვილი ამბობს, რომ ათი დღის წინ შეპირდით ამ საქმის მოგვარებას.
_ მაგდენი არა, 4-5 დღე იქნება, რომ ვესაუბრე და ხუთ დღეს ვეღარ ითმენს?
_ თუ თქვენი თქმით, ხუთი დღის უკან გითხრათ, ახლა კიდევ ერთი კვირა ხელოსანს სჭირდება, ეს დროის გაჭიანურებას უფრო ჰგავს…
_ გეუბნებით, მარტივი პრობლემაა და ხუთ დღეში მოგვარებული იქნება, გპირდებით. ხმაურს რაც შეეხება, 11 საათის შემდეგ, გამწოვს აღარ ვართვევინებ. 12 საათზე კი საერთოდ ვკეტავთ. ასე რომ, ძილის დროს, არავინ აწუხებს აქ მცხოვრებთ.
_ აქ მცხოვრებნი იმასაც ამბობენ, რომ მაღალი სართულიდან ქალბატონმა ვედროთი წყალი გადმოასხა საბილიარდოს, ვერაფერი რომ ვერ შეასმინა, ბავშვების დაძინების საშუალება მოგვეცითო.
_ გითხარით, 12 საათზე საერთოდ ვკეტავთ საბილიარდოს. მეტი რა ვქნათ?
“გურია ნიუსი” თვალყურს მიადევნებს მარტოხელა, სოციალურად დაუცველი მზია ჟორჟიკაშვილის პრობლემას რამდენად დროულად მოაგვარებან.
