,,ომის დაწყების უფლება არ გვაქვს?“_ დავა სტრასბურგში და ბრალდებები ქართულ მხარეს

10 წელი გავიდა 2008 წლის აგვისტოს ომიდან, 10 წელი იმ პერიოდიდან, როცა ასეულობით ადამიანი  სიცოცხლეს გამოემშვიდობა.

მაშინ, როცა საქართველოს ხელისუფლება აგვისტოს ომში ჩადენილი დანაშაულისთვის   რუსეთს ადანაშაულებს და სტრასბურგის სასამართლოში უპირისპირდება, საქართველოში არსებობენ პოლიტიკოსები, რომლებიც ფიქრობენ, რომ რუსეთს ომი ქართულმა მხარემ გამოუცხადა.

აგვისტოს ომზე ,,გურია ნიუსი“ ფრაქცია „ქართული ოცნება – კონსერვატორების” თავმჯდომარეს, გიგა ბუკიას ესაუბრა.

_ ბატონო გიგა, როგორ შეაფასებთ პარლამენტის დამოუკიდებელი დეპუტატის, სალომე ზურაბიშვილის განცხადებას იმის შესახებ, რომ აგვისტოს ომი ქართულმა მხარემ დაიყო?

_ ომის დაწყება არ არის, თავისთავად, მნიშვნელოვანი. მთავარია, ვინ წააგო და როგორ დამთავრდა ომი. რუსეთთან საქართველომ ომი წააგო ისე, რომ ოკუპირებულ ტერიტორიებს დაემატა ახალგორი და სხვა ტერიტორიები. ეს უფრო მნიშვნელოვანია ჩემთვის. ამ საკითხზე უფრო ვიმსჯელებდი და არა იმაზე, თუ ვინ დაიწყო ომი.

_ ბატონო გიგა, შეგახსენებთ, რომ სტრასბურგის სასამართლო 2008 წელს რუსეთ-საქართველოს შორის მომხდარ კონფლიქტს სწავლობს, რომელიც დაადგენს, რომელმა მხარემ დაიწყო ომი. შესაბამისად, მნიშვნელოვანი რომ არ იყოს საკითხის ასე დაყენება, ქართული მხარე საკუთარ ინტერესებს არ დაიცავდა და არც რუსეთის ფედერაციას დააკისრებდა პასუხისმგებლობას. რატომ ფიქრობთ მასე?

_ სტრასბურგში ასე არ არის საკითხი დაყენებული _ ვინ დაიწყო ომი. საქართველოს ომის დაწყების უფლება არ აქვს? ასე ვაყენებთ საკითხს? საქართველოს ხელი ჰქონდა მოწერილი იარაღის გამოუყენებლობაზე თუ რა? ბუნებრივია, ქვეყანას უფლება აქვს თუ სტრატეგიულ ინტერესშია, ომი დაიწყოს. თუ გვექნება იმის შესაძლებლობა, რომ ტერიტორიები ომით აღვადგინოთ, რატომ უნდა იყოს ვინმესთვის მიუღებელი?

_ ბუნებრივია, საქართველოს ომის დაწყების უფლება ჰქონდა, მაგრამ დაწყების შემთხვევაში რა გამოდის, საქართველომ საკუთარ თანამემამულეებზე მიიტანა იერიში და დაბომბა ქართველი მოსახლეობა?

_ ასე არ ვფიქრობ, ყოფილ ხელისუფლებას ომის დაწყების გამო არ დავადანაშაულებდი. შედეგი როგორი დადგა,  ეს არის მთავარი. როგორც ნათქვამია, გამარჯვებულებს არ ასამართლებენო. იმ შემთხვევაში, თუ ჩვენი ქვეყანა ტერიტორიულ მთლიანობას აღადგენდა, ვინმე იტყოდა, რატომ დაიწყო ომიო? ისრაელმა ომი დაიყო და გამარჯვებულია, კიდევ  სხვა ბევრმა ქვეყანამ.

_ ალბათ, დამეთანხმებით, რომ  საქართველოსნაირმა პატარა ქვეყანამ ომი არ უნდა გამოუცხადოს  ისეთ ძლიერ ქვეყანას, როგორიც რუსეთია, შესაბამისად, რატომ მიგაჩნიათ, რომ თუ  საქართველო ომს დაიწყებდა, სწორი გადაწყვეტილება იქნებოდა?

_ მე ამაზე ხომ არ ვსაუბრობ, ვსაუბრობ, იმაზე, რომ თითქოს, ომის დაწყება სირცხვილი და დანაშაულია. ჩვენ ვინმემ აგვიკრძალა ომის დაწყება? საკითხის ისე დაყენება, თითქოს, ომი სააკაშვილმა  დაიწყო და ის დამნაშავეა, არ მიმაჩნია სწორად. სააკაშვილს ერთი წამითაც კი არ გავკიცხავ ამისთვის. ყველა ამბობს, რომ ომი თუ დაიწყო, დამნაშავეა, რატომ არის დამნაშავე? ტერიტორიების დაბრუნების შემთხვევაში, ვინმე ეტყოდა, დამნაშავე ხარო? დიდი ხანია, ომი რუსეთმა დაიწყო, ჯერ კიდევ 90-იანი წლებიდან.