უკრაინის პრეზიდენტი ვოლოდიმირ ზელენსკი და კანადის პრემიერ-მინისტრი, ჯასტინ ტრუდო ერთმანეთს შეხვდნენ და ერთობლივი პრესკონფერენცია გამართეს. პრესკონფერენციაზე უკრაინის ლიდერმა აღნიშნა, რომ მარიუპოლის სამხედრო გზით განბლოკვა, შესაბამისი სამხედრო იარაღის არ არსებობის გამო, შეუძლებელია.
პრეზიდენტმა, ასევე აღნიშნა, რომ აზოვსტალიდან ყველა მშვიდობიანი მოქალაქის ევაკუაცია მოხდა და ხაზი გაუსვა, რომ “აგრესორი ქვეყნის პოლიტიკურ ხელმძღვანელობას ჩვენი სამხედროების გათავისუფლება არ სურს”.
“მარიუპოლის განბლოკვა სამხედრო გზით შეუძლებელია. რუსეთი ცვლის სამხედროებს მხოლოდ იმ შემთხვევაში, თუ ისინი ტყვეები არიან. აი, ასეთი სიტუაციაა. ეს არის რუსეთის ფედერაციის პასუხი, სხვა პასუხები არ არსებობს”. – თქვა ვოლოდიმირ ზელენსკიმ.
კანადის პრემიერ-მინისტრმა, ჯასტინ ტრუდომ კი, პრესკონფერენციაზე განაცხადა, რომ კანადა მომავალი წლიდან უკრაინიდან იმპორტირებულ საქონელზე სავაჭრო ტარიფებს მოხსნის.
ჯასტინ ტრუდომ ევროპის გამარჯვების დღეს თავისუფლებისთვის მებრძოლი მილიონობით რუსი გაიხსენა, რომელთა ხსოვნასაც, მისი თქმით, პუტინი არცხვენს.
“დღეს ჩვენ გამარჯვების დღეს ვზეიმობთ ევროპაში, როდესაც ათწლეულების წინ ჯარისკაცები მოკავშირე ქვეყნებიდან, რუსეთიდან, უკრაინიდან – ერთმანეთის მხარ და მხარ იდგნენ ფაშიზმთან ბრძოლაში. ხოლო ის, რასაც ვლადიმირ პუტინი ბოლო კვირების მანძილზე ჩადის, იმ მილიონობით რუსის ხსოვნას არცხვენს, რომლებმაც თავისუფლებისთვის სიცოცხლე გაწირეს. აი, რას დატოვებს პუტინი ევროპაში” – ამბობს ტრუდო.
ტრუდომ ასევე აღნიშნა, რომ კანადა უკრაინისთვის დამატებით სამხედრო დახმარებას გამოყოფს, რომელიც საჰაერო ხომალდებს, სატელიტურ გამოსახულებებს, მცირე იარაღს და სხვა აღჭურვილობებს მოიცავს.
ზელენსკისთან შეხვედრის შემდეგ ტრუდომ ასევე უკრაინის წინააღმდეგ ომთან კავშირში მყოფ რუსეთის მოქალაქეებსა და რუსულ კომპანიებზე დაწესებულ ახალ სანქციებზე ისაუბრა.
“დღეს, მე ვაანონსებ მეტ სამხედრო დახმარებას, დრონის კამერებს, სატელიტურ ფოტოებს, მცირე შეიარაღებას, საბრძოლო მასალასა და სხვა სახის დახმარებას, მათ შორის ოპერაციების დაფინანსებას”, – თქვა ტრუდომ.
კანადის ლიდერი მარიუპოლსა და ბუჩაში ჩადენილ სისასტიკეებსაც შეეხო. მისი სიტყვებით, ვლადიმირ პუტინმა უკრაინაში ჩადენილ, საზარელ ომის დანაშაულებზე პასუხი უნდა აგოს.
“სისასტიკეები, რომლებიც რუსმა სამხედროებმა მარიუპოლში, ბუჩასა და სხვა ქალაქებში ჩაიდინეს, მხოლოდ აძლიერებს ჩვენს სურვილს, დავრწმუნდეთ, რომ პუტინი ამ ომს წააგებს. მან [პუტინმა] არასწორი გათვლები გააკეთა… პუტინმა უკრაინელი ხალხის გამბედაობისა და სიძლიერის გათვალისწინება ვერ შეძლო.
ჩვენ [მოკავშირეები] გავაგრძელებთ მოქმედებას მანამ, სანამ ამის საჭიროება იარსებებს, რათა მთელმა მსოფლიომ, მათ შორის მთელმა რუსეთმა გაიგოს, თუ რამდენად შეცდა ვლადიმირ პუტინი”. – თქვა ტრუდომ კიევში გამართულ პრესკონფერენციაზე.
შეგახსენებთ, რომ 28 აპრილს, კანადის პარლამენტმა რუსეთის მიერ უკრაინაში ჩადენილი ომის დანაშაულები გენოციდად აღიარა.
14 აპრილს, კანადის პრემიერმინისტრმა, ჯასტინ ტრუდომ თქვა, რომ უკრაინაში მიმდინარე პროცესების ფონზე, ტერმინი “გენოციდი” აბსოლუტურად სწორად და ზუსტად მიესადაგება რუსეთის ქმედებებს.
მანამდე, 12 აპრილს, აშშ-ს პრეზიდენტმა, ჯო ბაიდენმა რუსეთის მხრიდან უკრაინაში ჩადენილ ქმედებებს გენოციდი პირველად უწოდა. თუმცა, მოგვიანებით დასძინა, რომ საერთაშორისო სამართლის იურისტებმა უნდა გადაწყვიტონ, აკმაყოფილებს თუ არა ჩადენილი დანაშაულები გენოციდის კრიტერიუმებს.
ავტორი
