„ლანჩხუთი საქართველოსთვის“ ფეისბუქის გვერდი ლანჩხუთის საკრებულოს ოპოზიციონერი წევრის, ექს პრემიერ გიორგი გახარიას გუნდიდან, მაკა მშვიდობაძის განცხადებას აქვეყნებს, სადაც საუბარია, რომ მუნიციპალიტეტის ხელმძღვანელობის მხრიდან იკვეთება გარემოებები, რომლებიც ხელს უშლის საკრებულოს წევრებს საკუთარი მოვალეობების სრულფასოვნად განხორციელებაში.
„დღეს მივმართე ლანჩხუთის მუნიციპალიტეტის საკრებულოს თავმჯდომარეს, ვაცნობე გარემოებები, რომლებიც ხელს უშლის საკრებულოს წევრებს, სრულფასოვნად განახორციელონ თავიანთი მოვალეობები, როგორც ეს განსაზღვრულია მოქმედი კანონმდებლობით.
მოვითხოვე მყისიერი რეაგირება აღნიშნულ ფაქტებზე, რათა თავიდან ავიცილოთ მერიის მხრიდან თვითნებური მოქმედებები და შესაბამისად, მომავალი სამართლებრივი გართულებები, რასაც შეიძლება მოჰყვეს სხვა სამართლებრივ ინსტანციაში გადანაცვლება“, -აცხადებს მშვიდობაძე და დასძენს, რომ „დემოკრატია ეფუძნება გამჭვირვალე მმართველობას და ინსტიტუციური ბალანსის დაცვას. ჩვენ არ უნდა მივცეთ შესაძლებლობა პროცესების მიკერძოებასა და ძალაუფლების არასწორ გამოყენებას“.
საგულისხმოა რომ მაკა მშიდობაძის ამ განცხადებამდე ლანჩხუთის საკრებულოს თავმჯდომარეს საჯაროდ, სოციალური ქსელის საშუალებით, მიმართა კიდევ ერთმა ოპოზიციონერმა დეპუტატმა ირმა მგელაძემ, რასაც წინ საკრებულოს ფეისმუქის გვერდზე ოპოზიციური ფრაქციების საქმიანობის გაშუქების აკრძალვა უძღოდა.
მგელაძეც აღნიშნულ საჯარო მიმართვაში აქცენტს მერიის გაუმჭირვალ მუშაობაზეც აკეთებდა.
„როდის მერე აღარ ითვლება საკრებულოს ფრაქციები მის შემადგენელ ნაწილად და რომელი კანონმდებლობით აღარ აშუქებთ თქვენს ფბ. გვერზე ჩვენს მუშაობას?
მინდა ასევე იცოდეს მოსახლეობამ, რომ მიუხედავად ჩვენს მიერ მრავალი მოწვევისა ( რომელზე დასწრებასაც კანონი ავალდებულებს და ანგაშვალდებულია ჩვენთან), ლანჩხუთის მუნიციპალიტეტის მერია, ბატონი მერი ( ოცნების მერი), უბრალოდ დაგვემდურა, არანაირად არ გვეკონტაქტება, მათ შორის არც პასუხებს გვაძლევს ჩვენს მიერ წერილობით დასმულ კითხვებზე, რასაც ასევე განსაზღვრავს კანონი, და რაც დასაბუთებულ ეჭვს აღძრავს მისი გაუმჭვირვალე მუშაობის შესახებ.
ყოველივე ეს გვაფიქრებინებს, რომ მას არა აქვს პასუხები უამრავ კითხვაზე, რომელსაც ზუსტად იცის, რომ საკმაოდ გამოცდილი მისი წინამორბედები დაუსვამენ.
