გასულ პარასკევს ჩოხატაურის მუნიციპალიტეტის სოფელ ზემო სურებში შპს “ენერჯი დეველოფმენტ ჯორჯიამ” 15 მგვტ სიმძლავრის “სურები 2 ჰესის” სკოპინგის ანგარიშის განხილვა მოაწყო.
წინა წლის 16 სექტემბერს სკოპინგის ანგარიშის განხილვა, რომლის ჩატარებას სწორედ ეს კომპანია გეგმავდა, არ შედგა.
“გარემოს დაცვის და სოფლის მეურნეობის სამინისტროს საიტზე არსებული ინფორმაციით, განხილვა გაუქმდა, რადგან “სუფსა 2 ჰესის” შესახებ ადმინისტრაციული წარმოება შეწყდა“, _ ეს არის ამონარიდი 2024 წლის სექტემბერში გავრცელებული ინფორმაციიდან.
რაც შეეხება კომპანიის ახალ გეგმებს, “ენერჯი დეველოფმენტ ჯორჯიამ” აქტიურად დაიწყო ჰესის მშენებლობის მიზნით მოძრაობა. ფეისბუქგვერდ “სურები ჰესზე” გაჩნდა ინფორმაცია, რომ კომპანიასა და მოსახლეობის ერთ ნაწილს შორის გაფორმდა მემორანდუმი. სწორედ, ჰესის მშენებლობის საკითხი იყო განხილვის თემა სოფელ ზემო სურების ადმინისტრაციული შენობის ეზოში.
ადგილობრივი ასმათ სანიკიძე ზემო სურებში ჰესის მშენებლობის წინააღმდეგია, ხოლო მარინა ბარამიძე ამ ეტაპზე იმ ადამიანების სათავეში აღმოჩნდა, რომლებიც ჰესის მშენებლობის მომხრეები არიან. როგორც ასმათ სანიკიძემ გვითხრა, იყო პერიოდი, როდესაც მარინა ბარამიძე მათ გვერდით იდგა.
“ის კომპანია, რომელსაც სურს ჰესის მშენებლობა ზემო სურებში, რაღაც საკითხებში მოდის ჩვენს მხარეს. მაგალითად, გვეუბნება, ჯერ გზას გავაკეთებთ და შემდეგ დავიწყებთ ჰესის მშენებლობასო. მე ამის კატეგორიული წინააღმდეგი ვარ, რადგან ძალიან მძიმე მდგომარეობაა სოფელში _ თითქმის მთელ გზაზე არის მეწყრული ზონები; სოფლიდან დღეში, დაახლოებით, 10-მდე მანქანას გააქვს მორები და სოფლისთვის არაფერი გაუკეთებია. 30 წელზე მეტია, რაც გააქვთ ხე–ტყე სოფლიდან და ხომ ხვდებით, რამდენ მილიონზეა საუბარი?! ვიღაცეები მდიდრდებიან და სოფლისთვის არაფერს აკეთებენ.
ვინმე სერიოზულად დაინტერესდა სოფლის ბედით და მომავლით? სოფელში არის დიდი მიგრაცია. რატომ? სოფელს არ ჰყავს პატრონი და არ ვითარდება“, _ გვითხრა ასმათ სანიკიძემ.
რაც შეეხება მარინა ბარამიძეს, მან სკოპინგის განხილვის დაწყებამდე თქვა, რომ გადაწყვეტილება სოფლის სასიკეთოდ გააკეთა. სურს, ზემო სურებში არსებული პრობლემების მოგვარება და ფონდის შესახებ ისაუბრა:
“ცხოვრებაში არაფერი გამიყიდია და არც გავყიდი. იმიტომ ჩავდექი ამ ფონდის სათავეში, რომ თუ თანხა შემოვა, სოფელს მოვახმარო და ეს ფული არ გაფრენილიყო აქეთ–იქით. ამ სოფელს უნდა მოხმარდეს ეს თანხა და აუცილებლად მოხმარდება. თუ არ გავაკეთებ საქმეს, მერე ჩამქოლონ.
ცოტა ხანი მადროვეთ, მეგობრებო… მარკეტი უნდა გავხსნა და სამუშაო ადგილები გაჩნდება.
აგერ ტრანსფორმატორი ამოვიტანეთ _ თავისით კი არ ამოსულა. ხომ ხედავთ, რა მდგომარეობა არის სოფელში? სოფელი უნდა განვითარდეს და ახალგაზრდობა დაბრუნდეს. მეტი რა გინდათ, ხალხო? ვისაუბროთ და ერთად გადავწყვიტოთ, როგორ მოვიქცეთ“, _ თქვა მარინა ბარამიძემ.
სკოპინგის ანგარიშის განხილვა 15 საათზე დაიწყო. მანამდე გარემოს დამცველ, “ლეიბორისტული პარტიის” ერთ-ერთ ლიდერს, ლაშა ჩხარტიშვილსა და მოსახლეობის შორის დაპირისპირება იქამდე მივიდა, რომ სიტუაცია მხოლოდ პოლიციის ჩარევის შემდეგ განიმუხტა. ლაშა ჩხარტიშვილის თქმით, თუ სოფლის განვითარება სურთ, ხელისუფლებამ და კომპანიის წარმომადგენლებმა ეს ჰესის მშენებლობის გარეშე გააკეთონ.
შელაპარაკება, მოსახლეობას და კომპანიის წარმომადგენლებს შორის, ანგარიშის განხილვის დროსაც არაერთხელ მოხდა.
საუბარი გარემოს ეროვნული სააგენტოს და კომპანიის წარმომადგენლებმა დაიწყეს.
შეხვედრის დროს არაერთხელ აღინიშნა, კომპანია გეგმავს ერთი ჰესის აშენებას, ასევე, გზის მშენებლობას და ამ ეტაპზე მათი ერთ-ერთი წარმატებული ნაბიჯია მემორანდუმის გაფორმება. როგორც შემდეგ გაირკვა, მემორანდუმის გაფორმებაში აქტიურად იყო ჩართული ჩოხატაურის მუნიციპალიტეტის მერი დავით შარაშიძე, რომელიც სიტუაციას შორიდან ადევნებდა თვალყურს.
კომპანიის წარმომადგენლის, დავით ხაჩიძის თქმით, ისინი კანონმდებლობის მიხედვით ყველაფერს აკეთებენ იმისთვის, რომ ჰესი აშენდეს და მოსახლეობაზეც იზრუნონ:
“იქნება ბევრი ტექნიკა, გაჩნდება საშუალებები, რომელიც კონკრეტულ მიმართულებებს მოხმარდება. ხალხს გზის მოწესრიგება სურს და მეგობრული დამოკიდებულების საფუძველზე ამ მიმართულებით ვიმუშავებთ. გზა, რომელიც გაკეთდება ჩოხატაურიდან ზემო სურების ჰესამდე, მუდმივად უნდა იყოს მოვლილი და გაწმენდილი, რაზეც მოსახლეობა იქნება დასაქმებული. ვიღაცებს ახლა ეღიმებათ, მაგრამ ეს ასე იქნება.
გვქონდა კომუნიკაცია მოსახლეობასთან, ვიცით ლომისკარელის ეკლესიის ისტორიული მნიშვნელობა და ვაპირებთ, აღვადგინოთ ეს ეკლესია ადგილობრივების მონაწილეობით.
ასევე, ბიუჯეტში ყოველწლიურად ქონების გადასახადის სახით შევა 800 000 ლარამდე“, _ თქვა დავით ხაჩიძემ.
არასამთავრობო ორგანიზაციის წარმომადგენელი დავით ჭიპაშვილი:
“მე უფრო კომენტარებს გავაკეთებ, სრულ კვლევას კი წერილობით გამოვაგზავნი.
სკოპინგის ეს ანგარიში გაკეთებულია თვითონ უშუალო ჰიდრო ენერგო სადგურზე და არ მოიცავს 35 კილოვოლტიან გადამცემ ხაზს. ეს პრაქტიკა არასწორია და აუცილებელია მისი გამოსწორება _ 8 კილომეტრზე გაჭიმულ 35 კილოვოლტიან გადამცემ ხაზს ძალიან სერიოზული ზემოქმედება ექნება.
აუცილებელია პროექტის დანახარჯებისა და სარგებლების ანალიზის წარმოდგენა ენერგეტიკულ, ეკონომიკურ, სოციალურ და კულტურულ ჭრილში, რომელიც არ არის წარმოდგენილი.
მე ვერ მოვისმინე, მაგალითად, დასაბუთება იმისა, რატომ არის საჭირო ამ ჰესის მშენებლობა _ უკეთესი ხომ არ იქნებოდა, ის საერთოდ არ აშენებულიყო?
არ არის ცნობილი, საბოლოო ჯამში, რა ზემოქმედება მოხდება ბუნებრივ და სოციალურ გარემოზე, ადამიანებზე, ბიომრავალფეროვნებაზე…
ასევე, არ ვიცით, წყლის რა რაოდენობა დარჩება მდინარეში _ ჩემი აზრით, ამ გაშლის მდინარეში, პრაქტიკულად, ეს წყალი დაიკარგება.
ვერ ვხვდები, რა წითელი წიგნის ნუსხის სახეობების და თევზების გადარჩენაზე საუბრობენ“, _ თქვა დავით ჭიპაშვილმა.
შეხვედრაზე კიდევ ერთი აქტიური მოქალაქე ანი ტრაპაიძე იმყოფებოდა, რომელმაც თქვა, რომ მემორანდუმი, რომელიც გაფორმდა ჰესის წარმომადგენლებსა და მოსახლეობის ერთ ნაწილს შორის, არ არის ლეგიტიმური:
“ამ შეხვედრას არ ესწრებოდა სოფლის მოსახლეობის დიდი ნაწილი და აქედან გამომდინარე, არ წარმოადგენს მთელი სოფლის მცხოვრებლების აზრს. გადაწყვეტილებას ყველა საკითხზე, რომელიც ეხება სოფლის განვითარებას თუ სხვა საჭირბოროტო საკითხს, უნდა ესწრებოდეს სოფლის სრული მოსახლეობა“, _ აღნიშნა ანი ტრაპაიძემ.
ჩოხატაურის მუნიციპალიტეტის მერის დავით შარაშიძის თქმით, ამ კომპანიას აქვს უკვე აშენებული ერთი ჰესი ხიდისთავში და სოფელი არაერთი სიკეთით სარგებლობს.
საბოლოო ჯამში, კამათის, დაპირისპირების და ემოციური გამოსვლების შემდეგ, ყველა მხარე გზშ-ს ანგარიშის მოლოდინშია.
ავტორი
