17 ივნისს, ოზურგეთის მუნიციპალიტეტის სოფელ ბაილეთში, ერთი საათის განმავლობაში ორი ავტოავარია მოხდა _ ჯერ ორი ტვირთმზიდი შეეჯახა ერთმანეთს, შემდეგ კი _ ტრაილერი და ტაქსი.
_ ორი ტვირთმზიდის შეჯახების ადგილზე შემთხვევით მოვხვდი. ჩემს სახლთან ახლოს მოხდა ავარია.
აღმართზე მიმავალ ხრეშით დატვირთულ სატვირთოს, მეორე სატვირთომ, ეტყობა, გვერდი ვერ აუარა და კაბინა წაჰკრა. ტვირთიანი უცებ გადაყირავდა გვერდზე.
როგორც კი მანქანა გადავარდა, მაშინვე სასწრაფო სამედიცინო სამსახურში დავრეკე. ადგილზე მოსულმა სამაშველო სამსახურის წარმომადგენლებმა მანქანის ძარა და კაბინა გაჭრეს და ისე ამოიყვანეს მძღოლი.
როგორც თქვეს, ფეხები ჰქონდა დაზიანებული და “მედალფაში” წაიყვანეს მაშინვე”, _ გვითხრა ოზურგეთის მუნიციპალიტეტის მერის წარმომადგენელმა ბაილეთში, ზურაბ დარჩიამ.
როგორც კლინიკა “მედალფაში” თქვეს, მძღოლს, ახალგაზრდა მამაკაცს ორივე ფეხი მოტეხილი აქვს, თუმცა, სიცოცხლისთვის საშიში დაზიანება არ გააჩნია.
იმავე დღეს ბაილეთის საავტომობილო გზაზე ტრაილერს ტაქსი შეეჯახა. ამ შემთხვევაშიც, როგორც თვითმხილველები ამბობენ, გაჩერებულ ტვირთმზიდს ტაქსის მძღოლმა მშვიდობიანად ვერ აუარა გვერდი.
მანქანაში მჯდომ ქალბატონს ავარიის დროს თავი დაუზიანდა. ისიც საავადმყოფოში გადაიყვანეს და საბედნიეროდ, გადარჩა.
ორივე ავარიის დროს საკმაოდ მძიმედ დაზიანებული ქალის და მამაკაცის ჯანმრთელობის მდგომარეობა დღეისთვის დამაკმაყოფილებელია.
ოზურგეთი-ლანჩხუთის მაგისტრალის, ბაილეთის მონაკვეთზე ტრანსპორტის გადაჭარბებული სიჩქარით მოძრაობას დიდი ხანია აპროტესტებენ სოფელში.
განსაკუთრებით შიშით არის სოფლის მოსახლეობა შეპყრობილი სუფსის კარიერიდან უამრავი ტრაილერის ხშირი და სწრაფი მოძრაობით.
_ რამდენი წელია, ვდაობთ. რაც ეს გზა გაკეთდა, დაზაფრულები ვართ. უნდა გაგვხარებოდა და პირიქით _ სიკვდილის შიშით ვართ. აწყვეტილი დაქრიან მანქანებით. რამდენი ღორი და ძროხა მოკლეს.
ღმერთმა დაგვიფაროს, ჯერ ადამიანის მსხვერპლი არ ყოფილა, მაგრამ ხომ ნახეთ, ეს ტრაილერები შეასკდნენ ერთმანეთს და მძღოლი ისე ვერ გამოიყვანეს, სანამ კაბინა არ გაჭრეს. იქით, მეორე ტრაილერი და ტაქსი შეეჯახა ერთმანეთს. სანამ უნდა ვიყოთ ამ საფრთხეში _ ვიღაცამ ხომ უნდა მოაგვაროს ეს საკითხი?! _ ბრაზობდნენ ქუჩაში გამოსული ბაილეთელები.
_ მოხდა ასეთი ცუდი ფაქტები, თან ერთ დღეში. პირველ რიგში, უდიდესი სიფრთხილეა საჭირო, როცა საჭესთან ზიხარ. ძალიან სწრაფად მოძრაობენ.
აქ უკვე მაგისტრალი გადის და ყველა მძღოლს განსაკუთრებული პასუხისმგებლობა აკისრია. ორმაგი ყურადღება უნდა გამოიჩინონ. ყველა მონაკვეთზე ხელოვნურ ბარიერებს ხომ არ გააკეთებენ, _ ამბობს ზურაბ დარჩია.
მაია დარჩია, ბაილეთის მცხოვრები: “რაღაც ღონისძიება თუ არ გატარდა, აქ კარგი ამბავი არ მოხდება. ტრაილერები მაღალი სისწრაფით დაქრიან. მათ არ ჩამორჩება მაგისტრალზე მოძრავი ავტომანქანებიც. დიდი ხანია, სოფელი ამაზე წუხს და დაობს.
კარიერზე მომუშავე კომპანიის წარმომადგენელმა გზის მეთვალყურედ ახალგაზრდებს დასაქმებაც შესთავაზა. 500 ლარს გადაუხდიდნენ. რა ვიცი, სამუშაო არაა და 500 ლარი არაა ცოტა ადგილობრივისთვის… რაღაც ღონისძიება უნდა გატარდეს. “სიკვდილის ტრასად” ნუ ვაქცევთ ოზურგეთი-ლანჩხუთის მაგისტრალზე ბაილეთის მონაკვეთს”.
“გურია ნიუსი” კარიერზე მომუშავე კომპანია “ქიუ ემ სის” ხელმძღვანელებს ესაუბრა.
მათ დაადასტურეს, რომ სამი ან ოთხი ადამიანის დასაქმება სურთ:
“გზის მეთვალყურეს მძიმე შრომა არ მოუწევს _ მხოლოდ მოძრაობა უნდა გააკონტროლოს დილიდან საღამოს შვიდ საათამდე.
სამი-ოთხი მონაკვეთია ასეთი, სადაც სწრაფად მოძრაობენ ავტომანქანები. მუშაობის კონკრეტულ დეტალებს ჩვენ შევასწავლიდით, თუმცა, ჯერჯერობით, მსურველი ვერ ვნახეთ”, _ გვითხრეს კომპანიაში.
იგივე აზრი გამოიკვეთა სოფლის ხელმძღვანელებთან საუბრისას _ მათ თქვეს, რომ ვერავინ ნახეს, ვინც დააკვირდებოდა მოძრაობას და გააკეთებდა აღრიცხვას.
“ვეცდებით, სხვა სოფლებიდან, ან თუნდაც ქალაქიდან მოვიწვიოთ მუშაობის მსურველები. რთული არ არის ამ საქმის შესრულება. 500 ლარიც არაა ურიგო ხელფასი. რაღაცას ვიღონებთ”, _ თქვა “გურია ნიუსთან” ზურაბ დარჩიამ.
ავტორი: მარინა ჩიხლაძე
