ხვიჩა კვარაცხელიას „ნაპოლის“ უიღბლო ასპარეზობა გრძელდება. იტალიის „სერია ა“-ს მორიგ ტურში ქართველის კლუბი სტუმრად „რომასთან“ დამარცხდა – 0:2 და უკვე მეშვიდე ადგილამდე ჩამოქვეითდა.
ვალტერ მაძარის გუნდი რომის „სტადიო ოლიმპიკოზე“ თითქმის უშანსოდ იყო.
38-ე წუთზე ჟოზე მოურინიომ და ხვიჩა კვარაცხელიამ იკამათეს, ქართველის წინააღმდეგ ბრაიან კრისტანტემ უხეშობისთვის ყვითელი ბარათი მიიღო, რასაც ჟოზეს პროტესტი მოჰყვა და ისიც გააფრთხილეს. გაბრაზებულმა მოურინიომ კვარას დაუყვირა – საკმარისია! შემდეგ შეკამათდნენ, მაგრამ მალევე შერიგდნენ.
66-ე წუთზე არასპორტული მოქმედებისთვის მატეო პოლიტანო გააძევეს, 10 წუთის მერე კი რომაულმა კლუბმა ლორენცო პელეგრინის ულამაზესი გოლით წინ გასვლა მოახერხა. ამის შემდეგ, 88-ე წუთზე ვიქტორ ოსიმენიც გააძევეს და ნეაპოლურმა გუნდმა თამაში ცხრა ფეხბურთელით დაასრულა. ბოლო წუთზე რომელუ ლუკაკუმაც გაიტანა და საბოლოო ანგარიში დააფიქსირა – 2:0.
„ნაპოლი“ 27 ქულით მეშვიდე ადგილზეა და ჩემპიონთა ლიგის ზონას უკვე 4 ქულით ჩამორჩა, მომდევნო ტურში კი პოლიტანოსა და ოსიმენის გარეშე 29 დეკემბერს, „მონცას“ უმასპინძლებს.
ამ შეხვედრაში ერთი საგულისხმო ფაქტი დაფიქსირდა.
ხვიჩა კვარაცხელიას წინააღმდეგ ბრაიან კრისტანტემ თამაშის წესი დაარღვია, რის გამოც „რომას“ ნახევარმცველმა ყვითელი ბარათი მიიღო და რომაელების პროტესტიც მოჰყვა. გააფრთხილეს მოურინიოც. ამის შემდეგ ჟოზე და კვარას შეკამათდნენ. როგორც იტალიური მედია წერს, თავდაპირველად მოურინიომ ხვიჩას დაუყვირა და რამდენჯერმე გაუმეორა: “საკმარისია! საკმარისია! პატივისცემა გამოიჩინე!” შელაპარაკებაც ამას მოჰყვა.
ცხადია, პორტუგალიელი ქართველ ფეხბურთელს სიმულაციაში ადანაშაულებდა. მალევე ჟოზემ ემოცია გააკონტროლა და ხვიჩა ჩაიხუტა. მატჩიც ჩვეულ რიტმში გაგრძელდა.
„ნაპოლის“ მთავარმა მწვრთნელმა ვალტერ მაძარიმ „რომასთან“ მატჩის შემდეგ შემდეგი კომენტარი გააკეთა:
„ძალიან ვწუხვარ, რადგან გაძევებამდე ჩვენ უკეთ ვთამაშობდით. არ მინდა მსაჯებზე საუბარი, მაგრამ მხოლოდ იმას ვიტყვი, რომ პოლიტანოს მაისურზე 15 წუთი ქაჩავდნენ. შემიძლია ვთქვა, რომ კარგად დავიწყეთ თამაში და ბურთის ფლობაც უკეთესი გვქონდა. მჯერა, რომ დღეს ყველა მხრივ სწორ გზაზე ვიყავით, მაგრამ საბოლოოდ, თამაში ისე წავიდა, როგორც წავიდა. ახლა მომდევნო მატჩზე ვიფიქრებთ.
არ ვფიქრობ, რომ გუნდს სქემის შეცვლა სჭირდება. მგონია, რომ ეს გუნდი 4-3-3-ში ძალიან კარგად თამაშობს. ვფიქრობ, შარშანდელივით ვთამაშობთ, მაგრამ ახლა ფეხბურთელები ფორმაში ნაკლებად არიან. ვიმეორებ, 11-11-ზე ჩვენ უკეთესები ვიყავით, მაგრამ დასკვნით ფაზაში გვიჭირდა. როდესაც ყოველ სამ დღეში თამაშობ, თამაშის ხარისხში ბრწყინვალებას ვერ დააბრუნებ, რადგან ვარჯიშისთვის დრო არ გვრჩება. სამწუხაროა ეს წაგება, მაგრამ წინ უნდა გავიხედოთ“. – თქვა მაძარიმ.
„რომას“ მთავარმა მწვრთნელმა ჟოზე მოურინიომ კი შემდეგი განაცხადა:
„თამაშის დაწყებიდან 5-10 წუთში მივხვდი, რომ მოვიგებდით. ყოველთვის ვაკონტროლებდით თამაშს გუნდის წინააღმდეგ, რომელიც ტექნიკურად ჩვენზე ძლიერია. შემდეგ ვისარგებლეთ რიცხობრივი უპირატესობით და დამსახურებულად მოვიგეთ“. – თქვა მოურინიომ.
ცნობილი გახდა, რომ „ნაპოლიმ“ ვიქტორ ოსიმენთან ხელშეკრულება გაახანგრძლივა. ნიგერიელ თავდამსხმელთან კონტრაქტი ერთი წლით, 2026 წლის ზაფხულამდე გააგრძელეს.
„სერია A“-ს წინა სეზონის საუკეთესო ბომბარდირისა და აფრიკის წლის საუკეთესო ფეხბურთელის შეძენის მსურველ კლუბს „ნაპოლისთვის“ 120-130 მილიონი ევროს გადახდა მოუწევს.
რაც შეეხება ნიგერიელის ხელფასს, რომელიც აქამდე წელიწადში 4,5 მილიონ ევროს შეადგენდა, ამიერიდან წლიური 10 მილიონი ევრო იქნება.
ავტორი
