ლანჩხუთში, სოფელ ნიგვზიანში გასულ შაბათს მეზობელმა სანადირო თოფიდან გასროლით მეზობელი მოკლა, შემდეგ კი თავი მოიკლა. ამ ორმაგ მკვლელობასთან დაკავშირებით ირკვევა, რომ დაახლოებით, 65 წლის გ.კ-მ ველოსიპედით მიმავალ თავისი ასაკისვე გვერდით მცხოვრებ მეზობელს, თ. ფ.-ს სანადირო თოფიდან გასროლით სასიკვდილო ჭრილობა მიაყენა. მომხდარი ფაქტიდან ცოტა ხანში მან საკუთარ ეზოში, ნალიის ქვეშ იგივე სანადირო თოფიდან გასროლით თავი მოიკლა.
დაუდასტურებელი ინფორმაციით, იგი ნასვამ მდგომარეობაში იმყოფებოდა.
ნიგვზიანში მომხდარ ორმაგი მკვლელობის ფაქტთან დაკავშირებით გამოძიება განზრახ მკვლელობის მუხლით დაიწყო.
თუ რა გახდა აღნიშნული ქმედების საბაბი, ამაზე სოფელში კონკრეტულს ვერავინ ვერაფერს ამბობს.
მერის წარმომადგენლის ნიგვზიანის ადმინისტრაციულ ერთეულში, ირაკლი გუჯაბიძის თქმით, მეზობლებს შორის არსებული კონფლიქტის შესახებ არაფერი სმენია.
„არავის არაფერი გვსმენია მათ შორის არსებულ კონფლიქტურ სიტუაციაზე, მეზობლები იყვნენ, ერთი ღობე ჰყოფდათ. რა მოხდა, არავინ იცის“, _ ამბობს სოფლის რწმუნებული.
კონკრეტულ მიზეზს ვერც საკრებულოს თავმჯდომარე ბესიკ ტაბიძე ასახელებს, რომელიც თავადაც სოფელ ნიგვზიანის მკვიდრია.
„შოკში ვარ იმით, რა უბედურებაც დატრიალდა სოფელ ნიგვზიანში, აფხაზავების უბანში. ველოსიპედით მომავალ მეზობელს მიჯრით ორჯერ ესროლა და ადგილზე მოკლა. შემდეგ წავიდა სახლში და ნალიის ქვეშ თავი მოიკლა. მეზობლები არიან, 65 წლის ხალხი, ბავშვობიდან ერთად გაზრდილები. მთელი სოფელი შეძრწუნებულია, კარგი მეგობრები იყვნენ და ეს უბედურება მოხდა“, _ ამბობს ბესიკ ტაბიძე.
გარდაცვლილთა ახლობლებისა და მეზობლების ვერსიით, ტრაგედია, სავარაუდოდ, უბედურ შემთხვევას უკავშირდება.
მათი თქმით, შუახნის მამაკაცმა საკუთარი სანადირო თოფიდან უმისამართოდ გაისროლა, ტყვიას კი ველოსიპედით მომავალი მეზობლის სიცოცხლე ემსხვერპლა. ხოლო მას შემდეგ, რაც მკვლელობის შესახებ გახდა ცნობილი, მამაკაცმა თავი მოიკლა.
„ველოსიპედით რომ გაიარა, უცებ ტყვია მოხვდა და ადგილზევე მოკლა. ვიღაცა მოვკალი, დევიღუპე, ვიღაცა მოვკალიო, _ იძახდა, არც იცოდა ვინ მოკლა. ისროლა გულში და მოიკლა თავი… არა, მან არ იცის, ვინ მოკლა… მონადირე იყო, ეზოში ხან რა გადაირბენდა, ხან რა… მიმინო გადაივლიდა თუ სხვა რამე, ესროდა ხოლმე. იცოდა სროლა, მაგრამ ეს როგორ ისროლა, არ ვიცით. არანაირი კონფლიქტი არ ჰქონიათ. ერთი ოჯახია შუაში. კარგი ურთიერთობა ჰქონდათ, ორივე კარგი ადამიანი იყო“, _ ამბობენ გარდაცვლილთა ახლობლები.
